ହଷ୍ଟେଲରେ ପିଲା ଖାଉଛନ୍ତି ପୋକରା ଚାଉଳ: କେବେ ସୁଧୁରିବ ଶିକ୍ଷା ବିଭାଗ

ମାଲକାନଗିରି (ଓଡ଼ିଶା ରିପୋର୍ଟର): ସରକାର ପିଲାଙ୍କ ପାଇଁ କରିଛନ୍ତି ମଧ୍ୟାହ୍ନ ଭୋଜନ ବ୍ୟବସ୍ଥା। ଉଦ୍ଦେଶ୍ୟ, ପାଠପଢା ସହ ପିଲାଙ୍କୁ ସ୍କୁଲ ଆସିବାକୁ ଆଗ୍ରହ ସୃଷ୍ଟି କରିବା। ହେଲେ ପ୍ରଶାସନିକ ଅଧିକାରୀଙ୍କ ଅବହେଳା ଓ ସ୍କୁଲ କର୍ତ୍ତୃପକ୍ଷଙ୍କ ଅପାରଗତା ଯୋଗୁଁ ବାରମ୍ବାର ଏହି ଯୋଜନାରେ ଅବ୍ୟବସ୍ଥା ଦେଖିବାକୁ ମିଳୁଛି। ଆଜି ପୋଲିସ୍‌ କେନ୍ଦ୍ରାପଡ଼ାରେ ମଧ୍ୟାହ୍ନ ଭୋଜନ ଚାଉଳ ହଡପ ଉଦ୍ୟମ ବିଫଳ କରିଦେଇଛି। ସେପଟେ ପୁଣି ଥରେ ମାଲକାନଗିରି ଜିଲ୍ଲାରୁ ଆସିଛି ପିଲାଙ୍କୁ ପୋକରା ଚାଉଳ ଖାଇବାକୁ ଦିଆଯିବା ଅଭିଯୋଗ।

ଲାଗୁଛି ଯେମିତି ମଧ୍ୟାହ୍ନ ଭୋଜନ ବ୍ୟବସ୍ଥା ମାଲକାନଗିରି ଜିଲ୍ଲାରେ ପ୍ରହସନରେ ପରିଣତ ହୋଇଛି। ଖଇରପୁଟ କସ୍ତୁରିବା ଗାନ୍ଧି ହଷ୍ଟେଲରେ ପିଲାଙ୍କୁ ପୋକରା ଚାଉଳର ଭାତ ଖାଇବାକୁ ଦିଆଯାଉଥିବା ଆମେ ରିପୋର୍ଟ ପ୍ରସ୍ତୁତ କରିଥିଲୁ ଗତ ୧୫ ତାରିଖରେ। ଆଜି ସଦର ମହକୁମା ହଷ୍ଟେଲର ସମାନ ଅଭିଯୋଗକୁ ନେଇ ଓଡିଶା ରିପୋର୍ଟର ବିଶେଷ ଉପସ୍ଥାପନା।

ସଦର ମହକୁମା ଅନୁସୂଚିତ ଜାତି ହଷ୍ଟେଲ। ଏଠାରେ ପିଲାମାନଙ୍କ ପାଇଁ ଆସୁଥିବା ଚାଉଳରେ ସାଲୁବାଲୁ ହେଉଛି ପୋକ। ଚାଉଳକୁ ପାଛୁଡି ପିଲାଙ୍କୁ ରାନ୍ଧି ଖାଇବାକୁ ଦିଆଯାଉଛି। ଏଠାରେ ଖୋଲାଖୋଲି ଭାବେ ମଧ୍ୟାହ୍ନ ଭୋଜନ ଗାଇଡ ଲାଇନ୍ ଉଲ୍ଲଂଘନ କରାଯାଉଥିବା ଅଭିଯୋଗ ହେଉଛି। ଏନେଇ ପଚାରିଲେ ଚାଉଳ ୨ରୁ ୩ ମାସ ହେବ ରହି ଯାଇଥିବାରୁ ପୋକ ହୋଇଯାଇଛନ୍ତି ବୋଲି କହିଛନ୍ତି ବିଦ୍ୟାଳୟର ଜଣେ ଶିକ୍ଷୟିତ୍ରୀ। ବିଦ୍ୟାଳୟ କର୍ତ୍ତୃପକ୍ଷ ଠିକ୍‌ରେ ଚାଉଳ ରଖୁ ନଥିବାରୁ ଏମିତି ସମସ୍ୟା ହେଥିବା କହିଛନ୍ତି ମାଲକାନଗିରି ସିଏସ୍‌ଓ ଅଭିମନ୍ୟୁ ମହାନ୍ତି।

ପୂର୍ବରୁ ଖଇରିପୁଟ କସ୍ତୁରବା ଗାନ୍ଧୀ ଆବାସିକ ବିଦ୍ୟାଳୟରେ ପିଲାଙ୍କ ଖାଇବା ଥାଳିରୁ ପୋକରା ଚାଉଳ ବାହାରିଥିବା ବେଳେ ଏବେ ପୁଣି ଥରେ ସମାନ ଘଟଣା ଘଟିଛି। ଯାହା ଜିଲ୍ଲାରେ ପିଲାଙ୍କୁ ଦିଆଯାଉଥିବା ଖାଦ୍ୟର ମାନ ଉପରେ ସନ୍ଦେହ ସୃଷ୍ଟି କରୁଛି।

ଯୋଗାଣ ବିଭାଗ କହୁଛି ୮ ମାସ ହେବ କୌଣସି ସ୍କୁଲକୁ ଉଷୁନା ଚାଉଳ ଦିଆଯାଇନାହିଁ। ତେବେ ଏଭଳି ବସ୍ତା ବସ୍ତା ଚାଉଳ ନଷ୍ଟ ପାଇଁ ଦାୟୀ କିଏ ସେନେଇ ସୃଷ୍ଟି ହୋଇଛି ବଡ ପ୍ରଶ୍ନବାଚୀ।