ମୁମ୍ୱାଇ: ମହାରାଷ୍ଟ୍ରର ବିରୋଧୀ ଦଳ ବିଜେପିକୁ ଶକ୍ତ ଝଟକା ଲାଗିଛି। ବୁଧବାର ଦଳର ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ଏକନାଥ ଖାଡସେ ଦଳରୁ ଇସ୍ତଫା ଦେଇଛନ୍ତି। ଆସନ୍ତା ସପ୍ତାହରେ ସେ ଏନସିପିରେ ସାମିଲ୍ ହେବେ ବୋଲି ଜଣାପଡ଼ିଛି। ଦଳ ଛାଡ଼ିବା ପଛର କାରଣ ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ଼ନାଭିସ ବୋଲି ସେ କହିଛନ୍ତି। କେନ୍ଦ୍ର ନେତୃତ୍ୱ ସହ ତାଙ୍କର କୌଣସି ମତଭେଦ ନଥିବା ପ୍ରେସ କନଫରେସ କରି ସେ ସ୍ପଷ୍ଟ କରିଛନ୍ତି।
ମହାରାଷ୍ଟ୍ର ବିଜେପି ସଭାପତି ଚନ୍ଦ୍ରକାନ୍ତ ପାଟିଲ କହିଛନ୍ତି, ଆଜି ସକାଳେ ଖାଡଗେଙ୍କ ଇସ୍ତଫା ପତ୍ର ମିଳିଛି। ଇସ୍ତଫା ଗୃହୀତ ହୋଇଛି। ଖାଡସେ ତାଙ୍କ ନୂଆ ଇନିଂସ ପାଇଁ ସେ ଏହି ଅବସରରେ ଶୁଭେଚ୍ଛା ଜଣାଇଛନ୍ତି।
ଅନ୍ୟପଟେ ଏନସିପି ରାଜ୍ୟ ସଭାପତି ଜୟନ୍ତ ପାଟିଲ କହିଛନ୍ତି ଯେ ଶୁକ୍ରବାର ଅପରାହ୍ନରେ ଖାଡସେ ଏନସିପିରେ ସାମିଲ୍ ହେବେ। ଦୀର୍ଘ ୩୫ ବର୍ଷ ଧରି ବିଜେପିରେ ରହିବା ପରେ ଏନସିପିରେ ସାମିଲ୍ ହେବାକୁ ଯାଉଛନ୍ତି। ଖାଡସେଙ୍କ ଅନୁଗତ ଏବଂ ଅନ୍ୟାନ୍ୟ ନେତା ମାନେ ମଧ୍ୟ ଖୁବଶୀଘ୍ର ଏନସିପିରେ ସାମିଲ୍ ହେବେ ବୋଲି ସେ କହିଛନ୍ତି।
ମହାରାଷ୍ଟ୍ରରେ ଏକନାଥ ଭାରତୀୟ ଜନତା ଦଳର ଜଣେ ବରିଷ୍ଠ ନେତା ଭାବରେ ଜଣାଶୁଣା। ସେ ୨୦୧୯ ପର୍ଯ୍ୟନ୍ତ କ୍ରମାଗତ ଛଅ ଥର ମହାରାଷ୍ଟ୍ରର ମୁକଟେନଗର ବିଧାନସଭା ନିର୍ବାଚନମଣ୍ଡଳୀରୁ ବିଧାୟକ ଭାବରେ ନିର୍ବାଚିତ ହୋଇଆସିଥିଲେ।
ଖାଡସେଙ୍କ ରାଜନୀତି ତାଙ୍କ ଜାଲଗାଓଁ ଜିଲ୍ଲାର କୋଠାରି ଗାଁରୁ ଆରମ୍ଭ ହୋଇଥିଲା। ଖାଡସେ ତାଙ୍କର ପ୍ରଥମ ଗ୍ରାମ ପଞ୍ଚାୟତ ନିର୍ବାଚନରେ ହାରିଯାଇଥିଲେ। ଏହାପରେ ସେ ୧୯୮୭ ରେ କୋଠାରୀ ଗାଁର ସରପଞ୍ଚ ହୋଇଥିଲେ। ୧୯୮୯ରେ, ସେ ମୁକଟିନଗର ବିଧାନସଭାରୁ ପ୍ରତିଦ୍ୱନ୍ଦ୍ୱିତା କରି ବିଧାୟକ ହୋଇଥିଲେ। ୧୯୮୦ ଦଶକରେ ଭାରତୀୟ ଜନତା ପାର୍ଟି ମାଧ୍ୟମରେ ରାଜନୀତିରେ ପ୍ରବେଶ କରିଥିବା ଏକନାଥ ଉତ୍ତର ମହାରାଷ୍ଟ୍ରରେ ଦଳକୁ ମଜବୁତ କରିଥିଲେ।
ଏକନାଥ ନିଜକୁ ମହାରାଷ୍ଟ୍ର ରାଜନୀତିରେ ଓବିସି ନେତା ଭାବରେ ପରିଚିତ କରିଥିଲେ। ୧୯୯୫-୧୯୯୯ ରୁ ମହାରାଷ୍ଟ୍ର ରାଜ୍ୟ ସରକାରରେ ଶିବସେନା-ବିଜେପି ମିଳିତ ମଞ୍ଚର ନେତୃତ୍ୱରେ ଖାଡସେ ଉଭୟ ଅର୍ଥ ଏବଂ ଜଳସେଚନ ବିଭାଗର ପରିଚାଳନା କରିଥିଲେ। ସେ ନଭେମ୍ବର ୨୦୦୯ରୁ ଅକ୍ଟୋବର ୨୦୧୪ ପର୍ଯ୍ୟନ୍ତ ବିରୋଧୀ ଦଳର ନେତା ଭାବରେ ମଧ୍ୟ କାର୍ଯ୍ୟ କରିଥିଲେ।
୨୦୧୪ରେ, ସେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ପଦ ପାଇଁ ଅନ୍ୟତମ ପ୍ରତିଯୋଗୀ ଥିଲେ। ତେବେ ଶେଷରେ ଏହି ପଦ ପାଇଁ ଦେବେନ୍ଦ୍ର ଫଡନାଭିସ୍ ନିର୍ବାଚିତ ହୋଇଥିଲେ। ଯଦିଓ ସେ ରାଜସ୍ୱ ମନ୍ତ୍ରଣାଳୟ ପାଇଥିଲେ। ଜୁନ୍ ୩, ୨୦୧୬ରେ ଦୁର୍ନୀତି ଏବଂ କାର୍ଯ୍ୟାଳୟର ଅପବ୍ୟବହାର ଅଭିଯୋଗ ପରେ ଏକନାଥ ରାଜସ୍ୱ ମନ୍ତ୍ରୀ ପଦରୁ ଇସ୍ତଫା ଦେଇଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
