ନୂଆଦିଲ୍ଲୀ: ପଶ୍ଚିମବଙ୍ଗ ଓ କେନ୍ଦ୍ର ସରକାରଙ୍କ କଳିରେ ଫିସିଥିବା ପ୍ରଶାସନିକ ଅଧିକାରୀ ଅଲପନ ବନ୍ଦୋପାଧ୍ୟୟ ଶେଷରେ ମୁହଁ ଖୋଲିଛନ୍ତି। ଗତ ଶୁକ୍ରବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ୟାସ ବାତ୍ୟାର ସମୀକ୍ଷା ବୈଠକରେ ସେ ଯୋଗ ଦେଇ ନଥିବାରୁ ତାଙ୍କୁ କେନ୍ଦ୍ର ସରକାର ନୋଟିସ୍ କରିଥିଲେ।
ଏବେ ବେଙ୍ଗଲର ପୂର୍ବତନ ମୁଖ୍ୟ ଶାସନ ସଚିବ ଅଲପନ ବନ୍ଦୋପାଧ୍ୟୟ ଏହାର ଜବାବ ଦେଇଛନ୍ତି। ସେ କେନ୍ଦ୍ରକୁ ଚିଠି ଲେଖି କହିଛନ୍ତି ଯେ ସେ ପ୍ରଧାନମନ୍ତ୍ରୀଙ୍କ ୟାସ ସମୀକ୍ଷା ବୈଠକରେ ଆଦୌ ଅନୁପସ୍ଥିତ ନଥିଲେ। ମୁଖ୍ୟମନ୍ତ୍ରୀ ସମୀକ୍ଷା ବୈଠକରେ ଥିବା ଯାଏ ସେ ସେଠାରେ ଉପସ୍ଥିତ ରହିଥିଲେ।
ଅଲପନ ଆହୁରି କହିଛନ୍ତି, ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ନିର୍ଦ୍ଦେଶକ୍ରମେ ସେ ପ୍ରଧାନମନ୍ତ୍ରୀଙ୍କ ସମୀକ୍ଷା ବୈଠକକୁ ଛାଡ଼ିଥିଲେ। ଏହାପରେ ଦିଘା ସହରକୁ ବାତ୍ୟା ଜନିତ କ୍ଷୟକ୍ଷତିର ଆକଳନ କରିବାକୁ ଯାଇଥିଲେ। କେନ୍ଦ୍ରରୁ ଅଲପନ ପଠାଇଥିବା ଚିଠିରେ ସେ ଏକଥା ଲେଖିଥିବା ପିଟିଆ ପକ୍ଷରୁ ରିପୋର୍ଟ ପ୍ରକାଶ ପାଇଛି।
ଶୁକ୍ରବାର ବୈଠକରେ ଅଲପନ ଯୋଗ ନଦେବାରୁ ତାଙ୍କୁ କେନ୍ଦ୍ରକୁ ବଦଳି କରାଯାଇଥିଲା। ଏହାର ଗୋଟିଏ ଦିନ ପରେ ସେ ଅବସର ନେବାର ଥିଲା। କେନ୍ଦ୍ରର ନିର୍ଦ୍ଦେଶ ସତ୍ତ୍ୱେ ମମତା ବାନାର୍ଜୀ ବ୍ୟୁରୋକ୍ରାଟ ଅଲପନଙ୍କୁ ରିଲିଜ୍ କରିବାକୁ ମନା କରିଥିଲେ। ଏଥିସହ ସେ ୩୧ ତାରିଖରେ ଅବସର ନେବା ପରେ ତାଙ୍କୁ ମମତା ନିଜର ମୁଖ୍ୟ ପରାମର୍ଶଦାତା ଭାବେ ନିଯୁକ୍ତି ଦେଇଥିଲେ।
ଏହାସତ୍ତ୍ୱେ ମଧ୍ୟ କେନ୍ଦ୍ର ସରକାର ତାଙ୍କୁ ନୋଟିସ କରି ଜବାବ ତଲବ କରିଥିଲେ। କାହିଁକି ସେ ପ୍ରଧାନମନ୍ତ୍ରୀଙ୍କ ସମୀକ୍ଷା ବୈଠକରେ ଅନୁପସ୍ଥିତ ଥିଲେ, ତା’ର କାରଣ କହିବାକୁ ସ୍ୱରାଷ୍ଟ୍ର ମନ୍ତ୍ରଣାଳୟ ଅଲପନଙ୍କୁ ନୋଟିସ କରିଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
