ନୂଆଦିଲ୍ଲୀ: ବୁଧବାର କେନ୍ଦ୍ର ମନ୍ତ୍ରିମଣ୍ଡଳ ସଂପ୍ରସାରଣ ପୂର୍ବରୁ କେନ୍ଦ୍ରର ମୋଦି ସରକାର ନୂଆ କରି ସମବାୟ ମନ୍ତ୍ରାଳୟ ତିଆରି କରିଛନ୍ତି। ଆଉ ଏହି ମନ୍ତ୍ରାଳୟର ପ୍ରଥମ ମନ୍ତ୍ରୀ ହୋଇଛନ୍ତି ଅମିତ ଶାହ। ଏହି ବିଭାଗକୁ ଅତିରିକ୍ତ ବିଭାଗ ଭାବରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗୃହ ମନ୍ତ୍ରୀ ଅମିତ ଶାହଙ୍କୁ ଦେଇଛନ୍ତି। ଅନେକ ମନ୍ତ୍ରୀ ନୂଆ ଭାବରେ ସ୍ଥାନ ପାଇଥିବା ବେଳେ ପ୍ରଧାନମନ୍ତ୍ରୀ ଅମିତ ଶାହଙ୍କୁ ଏହି ବିଭାଗ କାହିଁକି ଦେଲେ ଏ ନେଇ ପ୍ରଶ୍ନ ଉଠିଥିଲା। କିନ୍ତୁ ଶାହଙ୍କୁ ଯେଉଁ ବିଭାଗର ଦାୟିତ୍ୱ ଦିଆଯାଇଛି, ପୂର୍ବରୁ ସେ ସେହି ବିଭାଗରେ କାମ କରି ସାରିଛନ୍ତି। ସେ ଗୁଜରାଟର କୋଅପରେଟିଭ ସୋସାଇଟିର ଅଧ୍ୟକ୍ଷ ରହିଥିଲେ।
ଗୁଜରାଟରେ ଶାହ କୁଆଡେ ଏହି ବିଭାଗକୁ ବହୁତ ଦକ୍ଷତାର ସହ ତୁଲାଇ ସେତେବେଳେ ରାଜ୍ୟରେ ପ୍ରଶଂସା ସାଉଁଟିଥିଲେ। ସମବାୟ ଆନ୍ଦୋଳନକୁ ମଜଭୁତ କରିବା ଓ ଏହାକୁ ନୀତିଗତ ଢାଞ୍ଚା ଦେବାକୁ ଏହି ମନ୍ତ୍ରଣାଳୟ ଗଠନ କରାଯାଇଛି। ଏହି ବିଭାଗ ତୃଣମୂଳ ସ୍ତରରେ ଲୋକଙ୍କୁ ସହଯୋଗ କରିବ ବୋଲି କୁହାଯାଉଛି। କୃଷି ଏବଂ ଗ୍ରାମୀଣ ମନ୍ତ୍ରାଳୟର ଗୁରୁତ୍ୱ ଯେପରି ରହିଛି ଏହି ସମବାୟ ମନ୍ତ୍ରାଳୟର ଗୁରୁତ୍ୱ ମଧ୍ୟ ସମାନ ରହିବ ବୋଲି ଜଣାପଡ଼ିଛି। ବିଭିନ୍ନ ରାଜ୍ୟରେ ଏହି ବିଭାଗ ରହିଛି। ହେଲେ କେନ୍ଦ୍ରରେ ମୋଦି ସରକାର ଏହାକୁ ଏକ ମନ୍ତ୍ରାଳୟର ରୂପ ଦେଇଛନ୍ତି। ଏହି ଇଜ୍ ଅଫ୍ ଡୁଇଙ୍ଗ ବିଜନେସ ଦିଗରେ ମଧ୍ୟ କାମ କରିବ ବୋଲି ଜଣାପଡ଼ିଛି।
ସୂଚନାଯୋଗ୍ୟ, ଅମିତ ଶାହ ଗୁଜରାଟର ବିଜେପି କୋଅପରେଟିଭ ସେଲର ଅଧ୍ୟକ୍ଷ ରହିଥିଲେ। ସେ ଅହମଦାବାଦ ଜିଲ୍ଲା କୋପରେଟିଭ ବ୍ୟାଙ୍କ (ଏଡିସିବି)ର ଅଧ୍ୟକ୍ଷ ଥିଲେ। ସବୁଠୁ କମ୍ ବୟସରେ ଶାହ (୩୬) ଏହି ଦାୟିତ୍ୱ ନେଇଥିଲେ ବୋଲି ଜଣାପଡ଼ିଛି। ଶାହ ତାଙ୍କର ପ୍ରଥମ ବର୍ଷ କାର୍ଯ୍ୟକାଳରେ ୬.୬୦ କୋଟି ଟଙ୍କାର ଲାଭ ଦେଖାଇଥିଲେ। ଏହା ପୂର୍ବରୁ ଏଡିସିବିର କ୍ଷତି ୨୦.୨୮ କୋଟି ଥିଲା ବୋଲି ଜଣାପଡ଼ିଛି। ଏହାପରେ ଗୁଜରାଟରେ ଅମିତ ଶାହ ଫାଦର ଅଫ୍ କୋଭରେଟିଭ୍ ମୁଭମେଣ୍ଟ ଭାବରେ ପରିଚିତ ହୋଇଥିଲେ।