ଜେରୁଜେଲମ୍: ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ଦଳ ସଂସଦୀୟ ନିର୍ବାଚନ ଜିତିବା ସହିତ ସେ ପଞ୍ଚମ ଥର ପାଇଁ ପ୍ରଧାନମନ୍ତ୍ରୀ ହୋଇପାରିଛନ୍ତି। ସେ ତାଙ୍କର ପ୍ରମୁଖ ପ୍ରତିଦ୍ୱନ୍ଦ୍ୱୀ ବେନ୍ନି ଗାଣ୍ଟଜଙ୍କୁ କଡ଼ା ଟକ୍କର ଦେଇ ଏହି ବିଜୟ ହାସଲ କରିଛନ୍ତି। ଆସନ ସଂଖ୍ୟା ଦୃଷ୍ଟିରୁ ପାଖାପାଖି ସଂଖ୍ୟାରେ ଆସନ ହାତେଇଥିବା ଉଭୟ ପ୍ରାର୍ଥୀ ବିଜୟ ଦାବି କରିଥିଲେ। କିନ୍ତୁ ନେତାନ୍ୟାହୁଙ୍କ ଦଳ ଲିକୁଡ୍ ଏବଂ ଇସ୍ରାଏ ନୀସେଟ୍ରେ ତାଙ୍କ ମେଣ୍ଟ ସହଯୋଗୀ ସଂସଦରେ ସଂଖ୍ୟା ଗରିଷ୍ଠତା ହାସଲ କରିବାକୁ ସମର୍ଥ ହୋଇଛନ୍ତି। ଇସ୍ରାଏଲରେ ପ୍ରାୟତଃ ମେଣ୍ଟ ସରକାର ହିଁ ଆସିଥାଏ।
ଏହି ବିଜୟ ବାବଦରେ ସେ କହିଛନ୍ତି, “ଏହି ରାତ୍ରି ବିଜୟର ରାତ୍ରି। ମୁଁ ଅଭିଭୂତ ଯେ, ମୋର ଦେଶବାସୀ ଲଗାତାର ୫ମ ଥର ପାଇଁ ମୋ ଉପରେ ଆସ୍ଥା ପ୍ରଦର୍ଶନ କରିଛନ୍ତି। ମୁଁ ସ୍ପଷ୍ଟ କରିବାକୁ ଚାହେଁ ଏହା ଦକ୍ଷିଣପନ୍ଥୀ ସରକାର ହେବ, କିନ୍ତୁ ମୁଁ ସମସ୍ତଙ୍କ ପ୍ରଧାନମନ୍ତ୍ରୀ ହେବାକୁ ସଂକଳ୍ପବଦ୍ଧ। ସେମାନେ ଦକ୍ଷିଣ ପନ୍ଥୀ ହେଉ କି ବାମ ପନ୍ଥୀ, ଇହୁଦୀ ଏବଂ ଅଣଇହୁଦୀ ସମସ୍ତେ ସମାନ।”
ନେତାନ୍ୟାହୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ନିକଟବର୍ତ୍ତୀ ହୋଇଥିବାରୁ ସେ ଆଗକୁ ପାଲେଷ୍ଟାଇନ୍-ଇସ୍ରାଏଲ ବିବାଦର ସମାଧାନ କରିବାରେ ସହାୟକ ହେବେ ବୋଲି ଆଶା କରାଯାଉଛି। ଅନ୍ୟପକ୍ଷରେ ଆମେରିକା ପୂର୍ବରୁ ଜେରୁଜେଲମ୍କୁ ଦୂତାବାସ ସ୍ଥାନାନ୍ତର କରି ଏହି ଆଶଙ୍କାକୁ ଦୃଢ଼ କରିସାରିଛି। ଜେରୁଜେଲମ୍ ସହରକୁ ଉଭୟ ପାଲେଷ୍ଟାଇନ୍ ଏବଂ ଇସ୍ରାଏଲ ନିଜର ରାଜଧାନୀ ଦାବି କରି ଆସୁଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
