ଶ୍ରୀନଗର: ଜମ୍ମୁ ଓ କାଶ୍ମୀରର କୁପୱାଡ଼ା ଜିଲ୍ଲାର ଲଂଗେଟ୍ ତହସିଲ୍ ଅନ୍ତର୍ଗତ କ୍ରାଲ୍ଗୁଣ୍ଡ ଗାଁ ନିକଟରେ ଆଜି ସେନାର ଏକ କାଫଲା ଉପରକୁ ଆତଙ୍କବାଦୀମାନେ ଆକ୍ରମଣ କରିବାରୁ ୩ ଜଣ ଯବାନ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ଜଣଙ୍କ ଅବସ୍ଥା ଗୁରୁତର ରହିଛି। ତାଙ୍କୁ ଶ୍ରୀନଗର ସ୍ଥିତ ସେନା ହସ୍ପିଟାଲ୍ରେ ଭର୍ତ୍ତି କରାଯାଇଛି।
ସେନାର ଏହି ଟିମ୍ କୁପୱାଡ଼ା ଅଭିମୁଖେ ଯାଉଥିବା ବେଳେ ଆତଙ୍କବାଦୀମାନେ ଆକ୍ରମଣ କରିଥିଲେ। ଆତଙ୍କବାଦୀମାନେ କ୍ରାଲଗୁଣ୍ଡରେ ଛପି ରହିଥିଲେ। ଯବାନଙ୍କ ଉପରେ ଗୁଳି କରି ସେମାନେ ଫେରାର ହୋଇଯାଇଥିଲେ। ସୁରକ୍ଷାକର୍ମଚାରୀମାନେ ଆତଙ୍କବାଦୀମାନଙ୍କୁ ଧରିବା ପାଇଁ ଉକ୍ତ ଅଞ୍ଚଳରେ ସର୍ଚ୍ଚ ଅପେରସନ୍ ଚଳାଇଛନ୍ତି।
ଏହା ପୂର୍ବରୁ ଅଗଷ୍ଟ ୧୯ ତାରିଖରେ ମଧ୍ୟ କୁପୱାଡ଼ା ଜିଲ୍ଲାରେ ଆତଙ୍କବାଦୀମାନେ ସେନା ଉପରେ ଆକ୍ରମଣ କରିଥିଲେ। ଫଳରେ ୪ ଜଣ ଯବାନ ଆହତ ହୋଇଥିଲେ।