ନୂଆଦିଲ୍ଲୀ: ପ୍ରସିଦ୍ଧ କବି ତଥା ଏକଦା ଆମ୍ ଆଦ୍ମୀ ପାର୍ଟି ସହିତ ଜଡ଼ିତ ଥିବା କୁମାର ବିଶ୍ୱାସଙ୍କ ଫର୍ଚ୍ୟୁନର କାର୍ ତାଙ୍କ ଘର ସାମ୍ନାକୁ ଚୋରି ହୋଇଯାଇଛି। ଗାଜିଆବାଦର ଇନ୍ଦିରାପୁରମ ସ୍ଥିତ ତାଙ୍କ ବାସଭବନ ସମ୍ମୁଖରେ କାର୍ଟି ଥିବା ବେଳେ କେହି ନେଇ ପଳାଇଥିବା ଅଭିଯୋଗ ହୋଇଛି। ପୁଲିସ୍ ଏନେଇ ମାମଲା ରୁଜୁ କରିଛି ଓ ଘଟଣାର ତଦନ୍ତ କରିବା ପାଇଁ ଏକ ଟିମ୍ ଗଠନ କରିଛି। ତେବେ ଏ ଚୋରି ସଂପର୍କରେ ଅଧିକ ସୂଚନା ମିଳିପାରି ନାହିଁ।
ଜଣେ କବି ଭାବେ କୁମାର ବିଶ୍ୱାସଙ୍କର ବେଶ୍ ପ୍ରସିଦ୍ଧି ରହିଛି। ଦେଶ-ବିଦେଶରେ ସେ ମଞ୍ଚରେ କବିତା ପଢ଼ନ୍ତି। ଏ ଦିଗରେ ସେ ବହୁତ ସକ୍ରିୟ। ଜଣେ କବି ଭାବେ ସୋଶାଲ୍ ମିଡିଆରେ ତାଙ୍କର ଫ୍ୟାନ୍ଙ୍କ ସଂଖ୍ୟା ବହୁତ ଅଧିକ। କବିତା ମାଧ୍ୟମରେ ସମାଜର ବିଭିନ୍ନ ପ୍ରସଙ୍ଗକୁ ସେ ଉଠାନ୍ତି ଓ ସରକାରଗୁଡ଼ିକୁ ଘେରନ୍ତି।
ଅନ୍ନା ହଜାରେଙ୍କ ଆନ୍ଦୋଳନ ଓ ଆମ୍ ଆଦ୍ମୀ ପାର୍ଟି ସହିତ ବି ସେ ଜଡ଼ିତ ଥିଲେ। ଆପ୍ର ପ୍ରାରମ୍ଭିକ ଦିନଗୁଡ଼ିକରେ ସେ ସବୁଠୁ ସକ୍ରିୟ ନେତା ଥିଲେ। ତେବେ ଦଳରେ ଥାଇ ସେ ବାରମ୍ବାର କେଜ୍ରିୱାଲଙ୍କ ସରକାରକୁ ଘେରିଥିଲେ।