ନୂଆଦିଲ୍ଲୀ: ସୋମବାର ଇଦ୍-ଉଲ-ଫିତର। ପବିତ୍ର ରମଜାନ ମାସର ପ୍ରାର୍ଥନା ଏବଂ ଉପବାସ ପରେ ଆସୁଥିବା ଇଦ-ଉଲ-ଫିତର ପାଇଁ ବିଦେଶରେ ବାସକରୁଥିବା ଭାରତୀୟଙ୍କ ସମେତ ସମସ୍ତ ଦେଶବାସୀଙ୍କୁ ଶୁଭେଚ୍ଛା ଏବଂ ଶୁଭକାମନା ଜଣାଇଛନ୍ତି ରାଷ୍ଟ୍ରପତି ରାମନାଥ କୋବିନ୍ଦ। ଏହି ପର୍ବ ପ୍ରେମ, ଶାନ୍ତି, ଭାତୃତ୍ଵ ଏବଂ ଏକତାର ନିଦର୍ଶନ। ଏହି ଅବସରରେ ଆମେ ସମାଜର ସବୁଠାରୁ ଦୁର୍ବଳଙ୍କ ପ୍ରତି ଯତ୍ନବାନ ହେବା ନେଇ ଆମର ବିଶ୍ଵାସକୁ ସୁନିଶ୍ଚିତ କରିଥାଉ ବୋଲି କୋବିନ୍ଦ ତାଙ୍କ ବାର୍ତ୍ତାରେ କହିଛନ୍ତି।
କରୋନା ଭୂତାଣୁ ଦ୍ଵାରା ସୃଷ୍ଟି ହୋଇଥିବା ସଙ୍କଟର ମୁକାବିଲା ପାଇଁ ସାମାଜିକ ଦୂରତା ନିୟମ ଏବଂ ଅନ୍ୟ ସମସ୍ତ ସତର୍କତା ପାଳନ କରିବା ପାଇଁ ଶପଥ ନେବା ଦରକାର ବୋଲି ସେ କହିଛନ୍ତି। ଏହି ଇଦ-ଉଲ-ଫିତର ବିଶ୍ଵରେ ଦୟା, ପରୋପକାର ଏବଂ ପ୍ରେମର ପଥପ୍ରଦର୍ଶକ ହେଉ ବୋଲି ରାଷ୍ଟ୍ରପତି ଲେଖିଛନ୍ତି।