ଅମ୍ରିତସର: କଂଗ୍ରେସ ଉପାଧ୍ୟକ୍ଷ ରାହୁଲ ଗାନ୍ଧି ପଞ୍ଜାବର ସବୁଠୁ ବଡ଼ ଶତ୍ରୁ। ପଞ୍ଜାବର ଉପ-ମୁଖ୍ୟମନ୍ତ୍ରୀ ସୁଖବୀର ସିଂହ ବାଦଲ ଆଜି ଏହି ଅଭିଯୋଗ କରିଛନ୍ତି। ସେ କହିଛନ୍ତି,“ରାହୁଲ ପଞ୍ଜାବର ଯୁବବର୍ଗକୁ ନିଶାଖୋର ବୋଲି କହିଛନ୍ତି। ସେ ପଞ୍ଜାବ ବିରୋଧୀ ଓ ଶିଖ ବିରୋଧୀ ବୋଲି ଅନେକ ପ୍ରମାଣ ରହିଛି।”
ସେ କହିଛନ୍ତି,“ଯଦି କଂଗ୍ରେସ ଉପାଧ୍ୟକ୍ଷ ସତରେ ଭାବୁଛନ୍ତି ଯେ ପଞ୍ଜାବର ଯୁବବର୍ଗ ନିଶାଖୋର, ତା’ହେଲେ ସେ ଯୁବ କଂଗ୍ରେସ ନେତାଙ୍କ ଡୋପ୍ ଟେଷ୍ଟ୍ କରାଇ ନେବା ଉଚିତ୍।”
ଉପ-ମୁଖ୍ୟମନ୍ତ୍ରୀ କହିଛନ୍ତି,“ଶିରୋମଣି ଅକାଳୀ ଦଳ ଓ ବିଜେପିର ମିଳିତ ସରକାର ଅମଳରେ ପଞ୍ଜାବରେ ଅନେକ ଉନ୍ନୟନମୂଳକ କାମ ହୋଇଛି। କିନ୍ତୁ କଂଗ୍ରେସକୁ ସେସବୁ କିଛି ଦେଖାଯାଉନି। କଂଗ୍ରେସ କେବଳ ମିଛ କଥା କହୁଛି।”