ହାଇଦ୍ରାବାଦ: ବୁଧବାର ରାତିରେ ତେଲେଙ୍ଗାନାରେ ଦୁଷ୍କର୍ମ ଏବଂ ହତ୍ୟାର ଶିକାର ହୋଇଥିବା ଡାକ୍ତରଙ୍କ ସହ ହୋଇଥିବା ବୀଭତ୍ସ କାଣ୍ଡ ବାବଦରେ ବିଭିନ୍ନ ତଥ୍ୟ ସାମ୍ନାକୁ ଆସିବାରେ ଲାଗିଛି। ସାରା ଦେଶକୁ ଚହଲାଇ ଦେଇଥିବା ଏହି ଅଘଟଣ ପୂର୍ବରୁ ଦୁଷ୍କର୍ମକାରୀମାନେ ଜୋର କରି କୋଲ୍ଡ ଡ୍ରିଙ୍କସ୍ ମିଶା ମଦ ପିଆଇଦେଇଥିଲେ ବୋଲି ବର୍ତ୍ତମାନ ଜଣାପଡ଼ିଛି। ପୁଲିସ୍ ସୂତ୍ରରୁ ଏପରି ସୂଚନା ମିଳିଥିବା ଜାତୀୟ ଗଣମାଧ୍ୟମ ଇଣ୍ଡିଆ ଟୁଡେ ପକ୍ଷରୁ କୁହାଯାଇଛି। ସେମାନେ ହ୍ୱିସ୍କି ବୋତଲ କିଣି ଏହି ପୀଡ଼ିତା ଭେଟେରିନାରୀ ଡାକ୍ତରଙ୍କୁ ପିଆଇଥିଲେ ବୋଲି ଜଣାପଡ଼ିଛି।
ଗୁରୁବାର ସକାଳେ ହିଁ ଯୁବତୀଙ୍କ ପୋଡ଼ିଯାଇଥିବା ଶରୀର ଏକ କଲ୍ଭର୍ଟ ତଳୁ ମିଳିଥିଲା। ହାଇଦ୍ରବାଦ-ବେଙ୍ଗାଲୁରୁ ଜାତୀୟ ରାଜପଥରେ ହିଁ ଏହି ଘଟଣା ଘଟିଥିଲା। ଏହାପରେ ସାଇବରାବାଦ ପୁଲିସ୍ ୪ ଜଣ ଅଭିଯୁକ୍ତଙ୍କୁ ସେମାନଙ୍କ ଘରୁ ଉଠେଇଆଣିଥିଲା। ଏହାପରେ ଅଭିଯୁକ୍ତମାନଙ୍କୁ ବିଚାର ବିଭାଗୀୟ ହାଜତକୁ ପଠାଇଦିଆଯାଇଛି।
ଜାତୀୟ ଗଣମାଧ୍ୟମରେ ପ୍ରକାଶ ପାଇଛି, ଶମସାବାଦ୍ ପ୍ଲାଜା ପାଖ ତୋନ୍ଦୁପାଲ୍ଲୀ ଗାଁରୁ ୪ ଜଣ ଅଭିଯୁକ୍ତ ଦେଢ଼ ବୋତଲ ହ୍ୱିସ୍କି, କୋଲ୍ଡ ଡ୍ରିଙ୍କସ୍ ଏବଂ ଚାଖଣା କିଣିଥିଲେ। ଅପରାଧ ଘଟାଇବା ସମୟରେ ସମସ୍ତେ ନିଶାରେ ଥିଲେ।
ସାଇବରାବାଦ ପୁଲିସ୍ କହିବା ଅନୁଯାୟୀ, “ସେମାନେ ଏହାପରେ ଯୁବତୀଙ୍କ ସହ ଦୁଷ୍କର୍ମ କରିଥିଲେ। ତେବେ ଜଣେ ଅଭିଯୁକ୍ତ ଅପରାଧ ଘଟାଇବା ସମୟରେ ଯୁବତୀଙ୍କ ମୁହଁ ଓ ନାକ ବନ୍ଦ କରିଦେବାରୁ ତାଙ୍କର ମୃତ୍ୟୁ ହୋଇଥିଲା। ଏହାପରେ ଅଭିଯୁକ୍ତମାନେ ପେଟ୍ରୋଲ କିଣି ପୀଡ଼ିତାଙ୍କ ଶରୀରକୁ ପୋଡ଼ିଦେଇଥିଲେ।”