କୋଲକତା: ପଶ୍ଚିମବଙ୍ଗ କଂଗ୍ରେସ ଅଧ୍ୟକ୍ଷ ତଥା ପୂର୍ବତନ ସାଂସଦ ଶ୍ରୀ ସୋମନ୍ ମିତ୍ରଙ୍କର ବୁଧବାର ବିଳମ୍ବିତ ରାତିରେ ପରଲୋକ ହୋଇଛି। ମୃତ୍ୟୁ ବେଳକୁ ତାଙ୍କୁ ୭୮ ବର୍ଷ ହୋଇଥିଲା।
କିଛି ଦିନ ପୂର୍ବେ ରୁଟିନ୍ ଚେକଅପ୍ ନିମନ୍ତେ ଏକ ପ୍ରାଇଭେଟ ହସ୍ପିଟାଲ ଯାଇଥିବା ବେଳେ ସାମାନ୍ୟ ଅସୁସ୍ଥତା ହେତୁ ସେ ଆଡମିଟ ହୋଇଥିଲେ। ସେଠାରେ ଚିକିତ୍ସାଧୀନ ଥିବା ବେଳେ ଗତକାଲି ବିଳମ୍ବିତ ରାତିରେ ହୃଦଘାତ ଯୋଗୁ ତାଙ୍କ ମୃତ୍ୟୁ ହୋଇଥିବା ହସ୍ପିଟାଲ ପକ୍ଷରୁ କୁହାଯାଇଛି।
୧୯୬୦ ଦଶକରୁ ଛାତ୍ର ଜୀବନରୁ ରାଜନୈତିକ କ୍ୟାରିଅର ଆରମ୍ଭ କରିଥିଲେ ମିତ୍ର । ଏହାପରେ ଦୀର୍ଘ ଦଶନ୍ଧି ଧରି ନିଜ ରାଜନୈତିକ ଜୀବନରେ ଲମ୍ବା ଯାତ୍ରା କରିଥିବା ବେଳେ ଆଉ ପଛକୁ ଫେରି ଚାହିଁ ନାହାନ୍ତି।
ପଶ୍ଚିମବଙ୍ଗ କଂଗ୍ରେସ ଦଳର ୩ ଥର ପ୍ରେସିଡେଣ୍ଟ ରହିଥିବା ମିତ୍ର ୭ ଥର ବିଧାୟକ ଭାବେ ନିର୍ବାଚିତ ହୋଇଥିଲେ। ହେଲେ ୨୦୦୮ ମସିହାରେ ସେ କଂଗ୍ରେସ ଛାଡ଼ି ପ୍ରଗତିଶୀଳ ଇଣ୍ଡିଆନ କଂଗ୍ରେସ ପାର୍ଟି ଗଠନ କରିଥିଲେ। ଏହାପରେ ୨୦୦୯ ମସିହାରେ ତୃଣମୂଳ କଂଗ୍ରେସ ପାର୍ଟି ସହ ମିଶି ଲୋକସଭାକୁ ଜିତିଥିଲେ। କିନ୍ତୁ ସେଠାରେ ସେ ବେଶି ଦିନ ତିଷ୍ଠି ପାରି ନ ଥିଲେ। ୨୦୧୪ ମସିହାରେ ପୁଣି ଥରେ ତୃଣମୂଳ କଂଗ୍ରେସ ପାର୍ଟି ଛାଡ଼ି ସେ କଂଗ୍ରେସରେ ମିଶିଥିଲେ।
ତାଙ୍କ ବିୟୋଗ କଂଗ୍ରେସ ଦଳ ପାଇଁ ଏକ ଅପୂରଣୀୟ କ୍ଷତି ବୋଲି ପଶ୍ଚିମବଙ୍ଗରେ AICCର ମଙ୍ଗ ଧରିଥିବା ଗୌରବ ଗୋଗାଇ କହିଛନ୍ତି। ମିତ୍ରଙ୍କ ଦେହାନ୍ତ ଖବର ଖୁବ୍ ଦୁଃଖ ଦେଇଥିବା ବେଳେ ପରିବାର ଏବଂ ବନ୍ଧୁବର୍ଗଙ୍କୁ ଗଭୀର ସମବେଦନା ଜଣାଇଛନ୍ତି ଗୋଗାଇ। ଏଥିସହ ତାଙ୍କର ପରଲୋକ କଂଗ୍ରେସ ନେତୃତ୍ୱରେ ଏକ ଶୂନ୍ୟସ୍ଥାନ ସୃଷ୍ଟି କରିଛି, ଯାହା ପୂରଣ କରିବା କଷ୍ଟକର ହେବ ବୋଲି କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
