ଓ୍ୱାଶିଂଟନ: ଏପ୍ରିଲ ଶେଷ ସୁଦ୍ଧା ୧୦୦ଟି ଦେଶରେ ବିଶ୍ୱ ବ୍ୟାଙ୍କ ଜରୁରୀକାଳୀନ ସ୍ୱାସ୍ଥ୍ୟ କାର୍ଯ୍ୟକ୍ରମ ଆରମ୍ଭ କରିବାକୁ ଯାଉଛି। ମହାମାରୀ କରୋନାର ମୁକାବିଲା କରିବା ପାଇଁ ଏଭଳି କାର୍ଯ୍ୟକ୍ରମ କରିବାକୁ ବିଶ୍ୱ ବ୍ୟାଙ୍କ ନିଷ୍ପତ୍ତି ନେଇଛି। ଏବେ ୬୪ଟି ଦେଶରେ ଜରୁରୀକାଳୀନ ସ୍ୱାସ୍ଥ୍ୟ କାର୍ଯ୍ୟକ୍ରମ ଚାଲିଛି। ଆଗାମୀ ଦିନରେ ଏହା ବୃଦ୍ଧି ପାଇ ୧୦୦ ହେବ। ଏ ନେଇ ସୂଚନା ଦେଇଛନ୍ତି ବିଶ୍ୱବ୍ୟାଙ୍କର ସଭାପତି ଡାଭିଡ ମଲପାସ। ୧୭ ତାରିଖରେ ଓ୍ୱାଶିଂଟନରେ ଆଇଏମଏଫ ଏବଂ ବିଶ୍ୱ ବ୍ୟାଙ୍କ ଗ୍ରୁପଙ୍କ ସହିତ ମିଳିତ ବୈଠକ ବସିଥିଲା। ଏହାପରେ ଜରୁରୀକାଳୀନ ସ୍ୱାସ୍ଥ୍ୟ କାର୍ଯ୍ୟକ୍ରମ ବାବଦରେ ସୂଚନା ଦେଇଛନ୍ତି ବିଶ୍ୱ ବ୍ୟାଙ୍କର ସଭାପତି।
https://twitter.com/ians_india/status/1251276262548504578
କରୋନା କାରଣକୁ ସ୍ୱାସ୍ଥ୍ୟାବସ୍ଥା, ଅର୍ଥନୀତି ଏବଂ ସାମାଜିକ ଚାଲିଚଳଣି ପ୍ରଭାବିତ ହୋଇଛି। ଏହାର ସୁଧାର ପାଇଁ ଆଗାମୀ ୧୫ ମାସ ଯାଏ ବିଶ୍ୱବ୍ୟାଙ୍କ ୧୬୦ ବିଲିଅନ ଡଲାର ଖର୍ଚ୍ଚ କରିବ ବୋଲି ଡାଭିଡ ମଲପାସ କହିଛନ୍ତି।
ବିଶ୍ୱ ବ୍ୟାଙ୍କ ବ୍ୟତୀତ ଏସିଆନ୍ ଡେଭଲପମେଣ୍ଟ ବ୍ୟାଙ୍କ ଏବଂ ଇଣ୍ଟର ଆମେରିକାନ ଡେଭଲପମେଣ୍ଟ ବ୍ୟାଙ୍କ ମିଶି ୮୦ ବିଲିଅନ ଡଲାରର ଫଣ୍ଡ ତିଆରି କରିଛନ୍ତି। ବିଶ୍ୱବ୍ୟାଙ୍କ ଏବଂ ଏହି ବ୍ୟାଙ୍କ ଗୁଡ଼ିକର ଫଣ୍ଡକୁ ମିଶାଇଲେ ମୋଟ ୨୪୦ ବିଲିଅନ ଡ଼ଲାରର ସହାୟତା ୧୦୦ଟି ଦେଶ ପାଇବେ ବୋଲି ଜଣାପଡ଼ିଛି।
କରୋନା କାରଣରୁ ସମଗ୍ର ବିଶ୍ୱର ଅର୍ଥନୀତି ଭୁଷୁଡ଼ି ପଡ଼ିଛି। ଗ୍ରୁପ୍ ଅଫ୍ ଟ୍ୱେଣ୍ଟି (ଜି -୨୦) ଦେଶ ଏଭଳି ସଂକଟ ସମୟରେ ଋଣ ଦେବା ଏବଂ ନେବା ଉପରେ ସ୍ଥଗିତାଦେଶ ପ୍ରଦାନ କରିବାକୁ ନିଷ୍ପତ୍ତି ନେଇଛି। ଏହାଦ୍ୱାରା ଗରିବ ଲୋକମାନେ ଉପକୃତ ହେବେ ବୋଲି କହିଛନ୍ତି ବିଶ୍ୱବ୍ୟାଙ୍କର ସଭାପତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
