ଗୋଟିଏ ପରିବାରର ୪ ଜଣଙ୍କୁ ହତ୍ୟା! ମହାନଦୀରୁ ମିଳିଲା ବନ୍ଧା ହୋଇଥିବା ମୃତଦେହ

ପାରାଦୀପ(ଏନ୍‌.ଏମ୍‌ ବୈଶାଖ): ମହାନଦୀରେ ଭାସୁଛି ଗୋଟିଏ ପରିବାରର ୪ ଜଣଙ୍କ ମୃତଦେହ। ସେମାନଙ୍କ ମଧ୍ୟରେ ଅଛନ୍ତି ମାଆ, ଦୁଇ ଝିଅ ଓ ପୁଅ। ମୃତଦେହ ଗୁଡ଼ିକ ବନ୍ଧା ଯାଇଥିବା ଦେଖିବାକୁ ମିଳିଛି। ସମ୍ପତ୍ତି ପାଇଁ ସେମାନଙ୍କୁ ଯୋଜନାବଦ୍ଧ ଭାବେ ହତ୍ୟା କରାଯାଇଥିବା ମୃତ ମହିଳାଙ୍କ ଭାଇ ଅଭିଯୋଗ କରିଛନ୍ତି। ଜଗତସିଂହପୁର ଜିଲ୍ଲା କୁଜଙ୍ଗ ଥାନା ପୋଲିସ୍‌ ମୃତଦେହ ଜବତ କରି ଘଟଣାର ତଦନ୍ତ ଆରମ୍ଭ କରିଛି।

ଅଭିଯୋଗରୁ ପ୍ରକାଶ, ଜଗନ୍ନାଥପୁର ଗାଁର ଅନନ୍ତ ସେଠୀଙ୍କର କିଛିଦିନ ତଳେ ଏକ ସଡ଼କ ଦୁର୍ଘଟଣାରେ ମୃତ୍ୟୁ ହୋଇଥିଲା। ଗତକାଲି ରାତିରୁ ଅନନ୍ତଙ୍କ ସ୍ତ୍ରୀ ମାମିନା, ୯ ବର୍ଷର ଝିଅ ବର୍ଷା, ୭ ବର୍ଷର ଝିଅ ଲିତା ଓ ୫ ବର୍ଷର ପୁଅ ସନାତକ ଗାଏବ ହୋଇଯାଇଥିଲେ। ଆଜି ସେମାନଙ୍କ ମୃତଦେହ ଜଗନ୍ନାଥପୁର ଶନିମନ୍ଦିର ନିକଟ ମହାନଦୀରେ ଭାସୁଥିବା ସ୍ଥାନୀୟ ଲୋକେ ଦେଖି ପୋଲିସକୁ ଖବର ଦେଇଥିଲେ। ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରି ଘଟଣାର ତଦନ୍ତ ଆରମ୍ଭ କରିଛି।