ନୟାଗଡ଼(ଆର୍ତ୍ତତ୍ରାଣ ପ୍ରଧାନ): ପୁଣି ମିଳିଲା ନଦୀ ଅବବାହିକାରେ ମାନବ ସଭ୍ୟତାର ପ୍ରମାଣ । ନୟାଗଡ଼ ଜିଲ୍ଲାରେ ମହାନଦୀ ଗର୍ଭରୁ ଆବିଷ୍କୃତ ପ୍ରାୟ ୫ଶହ ବର୍ଷ ତଳର ଏକ ମନ୍ଦିରକୁ ଦେଖି ଆଶ୍ଚର୍ଯ୍ୟ ହୋଇଛନ୍ତି ଐତିହାସିକ ଓ ଗବେଷକ । କେଉଁଠି ଅଛି ସେ ମନ୍ଦିର ଓ କଣ ତାହାର ଐତିହାସିକ ପୃଷ୍ଠଭୂମୀ ଆସନ୍ତୁ ଜାଣିବା।
ଅଥଳ ମହାନଦୀ ଗର୍ଭରେ ଲୁଚିଛି କାରୁକାର୍ଯ୍ୟ ପୂର୍ଣ୍ଣ ପ୍ରାଚୀନ ମନ୍ଦିର । ସୁଅ କାଟି ଚାଲିଥିବା ପାଣିରୁ ଅଁଳା ବେଢ଼ା ଓ ଚୂଡ଼ା ସ୍ପଷ୍ଟ ଦୃଶ୍ୟମାନ ହେଉଛି। ଯାହା କି ସାଧାରଣ ଜନମାନସ ଓ ଐତିହାସିକଙ୍କୁ ବେଶ୍ ଆନ୍ଦୋଳିତ କରିଛି। ନୟାଗଡ଼ ଜିଲ୍ଲାର ପଦ୍ମାବତୀ ଗାଁ ନିକଟ ମହାନଦୀ ଗର୍ଭରେ ଠାବ ଏ ମନ୍ଦିର ୧୧ବର୍ଷର ବ୍ୟବଧାନ ପରେ ପୁଣି ଦେଖିବାକୁ ମିଳିବାର କାରଣ, ଏବେ ନଦୀରେ ପାଣି କମିଛି।
ପୁରୁଖା ଲୋକଙ୍କ ମତରେ ଏହା ପ୍ରାୟ ୫ଶହ ବର୍ଷ ତଳର ଗୋପୀନାଥ ମନ୍ଦିର । ଯିଏକି ପୁରୁଣା ପଦ୍ମାବତୀ ଗାଁର ଥିଲେ ଆରାଧ୍ୟ ଦେବତା । ଗାଁ ମଝିରେ ଥିବା ଏଇ ମନ୍ଦିର ପାଖରେ ଥିଲା ଆଉ ଏକ ଛୋଟ ମନ୍ଦିର। ତେବେ ୧୯୩୩ ମସିହାରେ ମହାନଦୀରେ ଆସିଥିବା ପ୍ରଳୟଙ୍କରୀ ବନ୍ୟାରେ ପଦ୍ମାବତୀ ସମେତ ସାତ ପାଟଣା ଲୀନ ହୋଇଗଲା, ନଦୀ ଗର୍ଭରେ ମନ୍ଦିର ରହିଗଲା । ଗାଁ ଲୋକେ ଏ ନଦୀ କୂଳରେ ପୁଣି ବସତି ସ୍ଥାପନ କଲେ, ଯାହାକି ଆଜିର ନୂଆ ପଦ୍ମାବତୀ ଭାବେ ପରିଚିତ।
ନଦୀରେ ଯେବେ ପାଣି କମେ, ସେବେ ଦୃଶ୍ୟମାନ ହୁଏ ଗୋପୀନାଥ ଜୀଉ ମନ୍ଦିରର ଚୂଡ଼ା । ତେବେ ଐତିହାସିକଙ୍କ ମଧ୍ୟରେ ସପ୍ତଦଶ କିମ୍ବା ଅଷ୍ଟାଦଶ ଶତାବ୍ଦୀରେ ଖଣ୍ଡପଡ଼ା ରାଜାଙ୍କ ଦେଓ୍ୱାନଙ୍କ ଦ୍ୱାରା ନିର୍ମାଣ ହୋଇଥିଲା ଏହି ମନ୍ଦିର । ଯାହାର ନିର୍ମାଣ ଶୈଳୀକୁ ଅନୁଧ୍ୟାନ କଲେ ଏହା ଏକ ବିଷ୍ଣୁ ମନ୍ଦିର ବୋଲି ବି ସ୍ପଷ୍ଟ ଅନୁମେୟ । ତାଛଡ଼ା ନଦୀ ଗର୍ଭରେ ମନ୍ଦିରର ପଶ୍ଚିମ ଭାଗ ବୁଡ଼ି ରହିଛି ଓ ପୂର୍ବ ଭାଗ ଢଳି ରହିଛି । ତେଣୁ ଯେତିକି ଅଂଶ ଦୃଶ୍ୟମାନ ହେଉଛି ତାହା ଜଗମୋହନ ନା ମୁଖ୍ୟମନ୍ଦିରର ଚୂଡ଼ା, ତାହା ପ୍ରତ୍ନତତ୍ୱ ବିଭାଗ ପକ୍ଷରୁ ଅନୁଧ୍ୟାନ ପରେ ଜଣାପଡିବ ବୋଲି ମତ ପ୍ରକାଶ ପାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
