କଟକରୁ ଝାମ୍ପିନେଲେ ୬ ଲକ୍ଷ, ବାଲେଶ୍ୱରୁ ଲୁଟିଲେ ୩୬

ବାଲେଶ୍ୱର(ଓଡିଶା ରିପୋର୍ଟର): ଲୁଟେରାଙ୍କ ଟାର୍ଗେଟରେ ଏଟିଏମ୍ । ବାଲେଶ୍ୱର ସହରରେ ଗତକାଲି ବିଳମ୍ବିତ ରାତିରେ ଦୁଇଟି ଏଟିଏମ୍‌ରୁ ୩୬ ଲକ୍ଷ ଟଙ୍କା ଲୁଟ୍ ହେବା ଘଟଣାରେ ପୋଲିସର ଏକ ସ୍ୱତନ୍ତ୍ର ଟିମ୍‌ ଗଠନ କରାଯାଇ ତନାଘନା ଜାରି ରହିଛି ।

ଲୁଟେରାମାନେ ପ୍ରଥମେ ସୁନହଟ ଏଟିଏମ୍‌କୁ ଯାଇ ପ୍ରାୟ ୨୬ଲକ୍ଷ ଲୁଟିବା ପରେ ପ୍ରମାଣ ନଷ୍ଟ ପାଇଁ ଏଟିଏମ୍‌ରେ ନିଆଁ ଲଗାଇ ଦେଇଥିଲେ। ଏହାସହ କିଛି ଯନ୍ତ୍ରାଂଶକୁ ନିକଟରେ ଥିବା ଡ୍ରେନ୍‌ରେ ଫୋପାଡି ଦେଇଥିଲେ ।

ଏହାପରେ ଦୁର୍ବୃତ୍ତଙ୍କ ଟାର୍ଗେଟକୁ ଆସିଥିଲା ସହରର ଆଇଟିଆଇ ଛକ ନିକଟରେ ଥିବା ଏଟିଏମ୍।  ଏଠାରେ ଗ୍ୟାସ କଟର ମାଧ୍ୟମରେ ଏଟିଏମ୍ କାଟିବା ପରେ ୧୦ଲକ୍ଷ ଟଙ୍କା ଲୁଟ୍ କରି ଦୁର୍ବୃତ୍ତମାନେ ଘଟଣାସ୍ଥଳରୁ ଫେରାର ହୋଇଯାଇଥିଲେ । ଆଜି ସକାଳେ ସାଇଣ୍ଟିଫିକ୍ ଟିମ୍ ଏବଂ ପୋଲିସ ଉଭୟ ଏଟିଏମ୍‌କୁ ଯାଇ ଛାନଭିନ୍ କରିଛନ୍ତି । କିଛି ଦୁର୍ବୃତ୍ତ ନମ୍ବର ବିହୀନ ବୋଲେରୋ ଗାଡିରେ ଆସି ଲୁଟ୍ କରିଥିବା ପ୍ରାଥମିକ ତଦନ୍ତରୁ ଜଣାପଡିଛି।

ଏପଟେ କଟକରେ ମଧୁପାଟଣା ଥାନା ସାମ୍ନାରୁ ୬ ଲକ୍ଷ ଟଙ୍କା ଝାମିନେଇଛନ୍ତି ଲୁଟେରା । ଜଣେ ମହିଳା ଅରୁଣୋଦୟ ମାର୍କେଟ SBIରୁ ଟଙ୍କା ଉଠାଇ ନିଜର ସମ୍ପର୍କୀୟ ଭାଇ ସହ ବାଇକ୍‌ରେ ଫେରୁଥିବା ବେଳେ ଦୁର୍ବୃତ୍ତ ୬ଲକ୍ଷ ଟଙ୍କା ଲୁଟି ଫେରାର ହୋଇଯାଇଥିଲେ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।