ପାଣ୍ଡିଆନଙ୍କ ପରେ ବବି ପାୱାରଫୁଲ୍‌, ବିଜେଡିର ଏ ଟୁ ଜେଡ୍‌!

ଭୁବନେଶ୍ୱର (ଓଡ଼ିଶା ରିପୋର୍ଟର): ବିଜେଡିରେ ଏବେ ଚାଲିଛି କି ପାଣ୍ଡିୟାନ୍-ବବି ରାଜ୍?  ବୈଜୟନ୍ତଙ୍କ କ୍ୟାମ୍ପ ଛାଡିଥିବା ଦେବାଶିଷ ମଲ୍ଲିକ ଓ ଅନୁଗତ ସଲିମ୍ ଖାନଙ୍କ ମଧ୍ୟରେ ହୋଇଥିବା ବାର୍ତ୍ତାଳାପର ଅଡିଓ ଟେପ୍ ବାହାରକୁ ଆସିବା ପରେ ବିଜେଡିରେ ପାଣ୍ଡିୟାନ୍ ଓ ପ୍ରଣବ ପ୍ରକାଶ ଓରଫ୍ ବବି ଦାସଙ୍କ ଭୂମିକା କ’ଣ ତାର ଗୁମର ବି ଖୋଲିଥିବା ଚର୍ଚ୍ଚା ହେଉଛି। ଅଡିଓ ଟେପ୍‌ରେ ବୈଜୟନ୍ତଙ୍କ କ୍ୟାମ୍ପ ଛାଡ଼ିଥିବା ଦେବାଶିଷ କହିଥିଲେ, ‘ବବି ଏବେ ନେକ୍ସଟ୍  ଟୁ ପି।   ଦଳରେ ସେ ଏ ଟୁ ଜେଡ୍।’  ଏହି ଅଡିଓ ଟେପ୍ ଅନୁଯାୟୀ, ବୈଜୟନ୍ତଙ୍କ ହୁଅନ୍ତୁ କି ଆଉ କିଏ, ବିଜେଡିରେ ଚାଲିଥିବା ବିଭିନ୍ନ ପ୍ରକାର ଷଡ଼ଯନ୍ତ୍ରର ମାଷ୍ଟରମାଇଣ୍ଡ ହେଉଛନ୍ତି ବବି-ପାଣ୍ଡିୟାନ୍।   ଅର୍ଥାତ୍ ପ୍ଲାନ ପାଣ୍ଡିୟାନଙ୍କର, ଆଉ କାର୍ଯ୍ୟକାରୀ କରିବା କାମ ବବିଙ୍କର।   ତେଣିକି କୌଣସି ବିବାଦରେ ମଧ୍ୟସ୍ଥତା ହେଉ କି କାହା ବିରୋଧରେ ଲାଗିବା ହେଉ।  କିଛି ଦିନ ପୂର୍ବରୁ ବ୍ରାହ୍ଣଣ ବିରୋଧୀ ମନ୍ତବ୍ୟ ଦେଇ ମନ୍ତ୍ରିମଣ୍ଡଳରୁ ବିଦା ହୋଇଥିବା ଦାମୋଦର ରାଉତ ଲେଖିଥିବା ‘ଅନର୍ଥର ଅନ୍ତରାଳେ’ ସ୍ତମ୍ଭରେ ବି ଏହାର ଆଭାସ ରହିଥିଲା।  ଦାମ ତାଙ୍କ ସ୍ତମ୍ଭରେ ଯେଉଁ ଯୁବନେତାଙ୍କ ଯୋଗୁଁ ସେ ବିଦା ହୋଇଥିବା ଲେଖିଛନ୍ତି, ସେଥିରୁ ବବି ଅନ୍ୟତମ ନୁହେଁ ତ?

pandiyanବିଜେଡି ରାଜନୀତିରେ ସାମ୍ନାକୁ ଆସିଥିବା ଏହି ନୂଆଯୋଡ଼ି  ଏବେ ବେଶ୍ ପାଓ୍ୱରଫୁଲ୍ ବୋଲି ଚର୍ଚ୍ଚା ହେଉଛି।  ସବୁବେଳେ ପାଣ୍ଡିୟାନଙ୍କ ପାଖେପାଖେ ରହି ନିଜକୁ କ୍ଷମତାଶାଳୀ  ପ୍ରତିପାଦିତ କରୁଛନ୍ତି ବବି।  ଗତବର୍ଷ ମନ୍ତ୍ରିମଣ୍ଡଳରୁ ବିଦା ହେବା ପରେ ସବୁ ଗୁରୁତ୍ୱପୂର୍ଣ୍ଣ ବୈଠକରେ ବବିଙ୍କୁ ଦେଖିବାକୁ ମିଳୁଛି।   ତେବେ ପ୍ରଶ୍ନ ବବି-ପାଣ୍ଡିୟାନଙ୍କ କାର୍ଯ୍ୟ ଦଳରେ କନ୍ଦଳ ସୃଷ୍ଟି କରୁ ନାହିଁ କି? କାରଣ ବିଜେଡିରେ ବରିଷ୍ଠ ଓ ଅଭିଜ୍ଞ ନେତାଙ୍କ ଅଭାବ ନାହିଁ। ଏମାନଙ୍କ କାର୍ଯ୍ୟ ବିଜେଡିକୁ ଛବିକୁ ବିଗାଡ଼ୁଛି ନା ସୁଧାରୁଛି? ଆଉ ସବୁଠାରୁ ଗୁରୁତ୍ୱପୂର୍ଣ୍ଣ ଏସବୁ ବିଜେଡି ସୁପ୍ରିମୋଙ୍କ ଜାଣତରେ ଚାଲିଛି ତ?