ସମ୍ବଲପୁର(ଓଡ଼ିଶା ରିପୋର୍ଟର): ଦିନ ଦ୍ୱିପ୍ରହରରେ ଚାଲିଚାଲି ଯାଉଥିଲେ ମହିଳା । ହଠାତ୍ ସାମନା ପଟୁ ଏକ ବାଇକ୍ରେ ଆସି ଦେଢ ଲକ୍ଷର ଚେନ୍ ଝାମ୍ପିନେଲେ ୨ ଯୁବକ । ଏପରି ଘଟଣା ସମ୍ବଲପୁର ଜିଲ୍ଲା ଅଇଁଠାପାଲି ଅଂଚଳରେ ଘଟିଛି। ଲୁଟ୍ର ଶିକାର ହୋଇଥିବା ମହିଳାଜଣକ ହେଲେ ନିବେଦିତା ସାହୁ ।
ନିବେଦିତାଙ୍କ କହିବାନୁଯାୟୀ, ସେ ଏକ ଦୋକାନରୁ ବାହାରି ରାସ୍ତାରେ ଚାଲି ଚାଲି ଯାଉଥିବାବେଳେ ଲୁଟେରାମାନେ ତାଙ୍କୁ ଟାର୍ଗେଟ କରିଥିଲେ । ଏହାପରେ ଏକ ବାଇକ୍ରେ ୨ ଜଣ ସାମ୍ନା ପଟୁ ଆସିଲେ। ସେମାନଙ୍କ ମଧ୍ୟରୁ ପଛରେ ବସିଥିବା ଯୁବକ ତାଙ୍କ ବେକରୁ ସୁନା ଚେନ ଝାମ୍ପି ନେଇଥିଲା। ଲୁଟ୍ ହୋଇଥିବା ସୁନା ଚେନ୍ର ମୂଲ୍ୟ ପ୍ରାୟ ଦେଢ ଲକ୍ଷ ଟଙ୍କା ହେବ ବୋଲି ମହିଳାଜଣକ କହିଛନ୍ତି।
ଏ ନେଇ ସେ ଅଇଁଠାପାଲି ଥାନାରେ ଅଭିଯୋଗ କରିଛନ୍ତି । ଲୁଟ୍ ସ୍ଥଳରେ ଡ୍ୟୁଟିରେ ଥିବା ୨ ଟ୍ରାଫିକ କର୍ମଚାରୀ ଲୁଟେରାକୁ ପିଛା କରିବାକୁ ଚେଷ୍ଟା କରିଥିଲେ ମଧ୍ୟ ସେମାନେ ଆଖି ପିଛୁଳାକେ ଫେରାର ହୋଇଯାଇଥିଲେ । ଆଖ ପାଖରେ ଥିବା ସିସିଟିଭି ଭିଡିଓକୁ ଯାଂଚ କରି ତଦନ୍ତ ଆରମ୍ଭ କରିଛି ପୋଲିସ । ଦିନଦ୍ୱିପ୍ରହରରେ ଏପରି ଘଟଣା ଘଟୁଥିବା ବେଳେ ସମ୍ବଲପୁରରେ ସାଧାରଣ ଲୋକ କେତେ ସୁରକ୍ଷିତ ବୋଲି ପ୍ରଶ୍ନ ଉଠିଛି।