ଦାବିପୂରଣ ପାଇଁ ଇମ୍ଫାରେ ଚାଲିଛି ଆନ୍ଦୋଳନ ନା ପଛରେ ରହିଛି ଷଡ଼ଯନ୍ତ୍ର ?

<p>ରାୟଗଡ଼ା (ମନୋଜ ପାତ୍ର): ଦୁଇଦିନ ତାଲା ପକାଇବା ପରେ ଶେଷରେ ହିଂସାକାଣ୍ଡକୁ ଓହ୍ଲାଇଛନ୍ତି ଥେରୁବାଲି ଇମ୍ଫା କମ୍ପାନୀ ଆଗରେ ଧାରଣାରତ ଆନ୍ଦୋଳନକାରୀ। ଆଜି କମ୍ପାନୀରେ ଭଙ୍ଗାରୁଜା କରିବା ସହିତ ଗେଟ୍ ଉପରକୁ ଢେଲାପଥର ମାଡ଼ କରିଛନ୍ତି। ଆଶ୍ଚର୍ଯ୍ୟର କଥା ହେଲା, ପୂର୍ବରୁ ଧମକ ଦେଇ ପୋଲିସ୍ ଉପସ୍ଥିତିରେ ଆନ୍ଦୋଳନକାରୀ ହିଂସା ଭିଆଇଥିଲେ ବି ପ୍ରଶାସନ ନିରବଦ୍ରଷ୍ଟା ସାଜିଥିଲା। ତେବେ କେବଳ ଦାବିପୂରଣ ପାଇଁ ଏହି ଆନ୍ଦୋଳନ ଚାଲିଛି ନା ଏହା ପଛରେ କିଛି ଷଡଯନ୍ତ୍ର ରହିଛି ତାକୁ ନେଇ ଏବେ ପ୍ରଶ୍ନ ଉଠିବାରେ ଲାଗିଛି।</p><p>ଦୁଇଦିନର ଅଚଳାବସ୍ଥା ପରେ ଆଜି ରାୟଗଡ଼ା ଥେରୁବାଲି ସ୍ଥିତ ଇମ୍ଫା କାରଖାନା ଆଗରେ ଦେଖିବାକୁ ମିଳିଥିଲା ଉତ୍ତେଜନା। ଆନ୍ଦୋଳନକାରୀ ଫାଟକ ବାହାରେ ଲାଗିଥିବା ସିସି କ୍ୟାମେରା, ଲାଇଟ୍, ଆଉ କିଛି ଯନ୍ତ୍ରାଂଶକୁ ବାଡ଼େଇ ଭାଙ୍ଗି ଦେଇଛନ୍ତି। ଆନ୍ଦୋଳନକାରୀ ଗେଟ୍ ଉପରକୁ ବି ଢେଲାପଥର ମାଡ଼ କରିଛନ୍ତି। ଅପରାହ୍ନ ୨ଟା ସୁଦ୍ଧା ଦାବିପୂରଣ ପାଇଁ ପଦକ୍ଷେପ ନିଆ ନଗଲେ ସ୍ଥିତି ଅଣାୟତ୍ତ ହେବ ବୋଲି ପୂର୍ବରୁ ଖୋଲାଖୋଲି କହିଥିଲେ ଆନ୍ଦୋଳନକାରୀ। ଏସ୍&zwnj;ଡିପିଓଙ୍କୁ ଦାବିପତ୍ର ବି ଦେଇଥିଲେ। ଆଉ ଆଜି ପୋଲିସ୍ ଉପସ୍ଥିତିରେ ଆନ୍ଦୋଳନକାରୀ ଘଟାଇଥିଲେ ଏଭଳି ହିଂସାକାଣ୍ଡ।</p><p>ସୂଚନାଯୋଗ୍ୟ ଯେ, ୯ଦଫା ଦାବିରେ କାରଖାନାର ସମସ୍ତ ଗେଟ୍&zwnj;ରେ ତାଲା ପକାଇ ଗତ ରବିବାର ଠାରୁ ଧାରଣାରେ ଆନ୍ଦୋଳନକାରୀ ବସି ରହିଥିଲେ ବି&nbsp; କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇ ନଥିବାରୁ ଏଭଳି ସ୍ଥିତି ଉପୁଜିଥିବା ଦେଖିବାକୁ ମିଳିଥିଲା।</p><p>ସେପଟେ ଆନ୍ଦୋଳନ ପଛରେ ନ୍ୟସ୍ତସ୍ୱାର୍ଥ ଗୋଷ୍ଠୀଙ୍କ ହାତ ଥିବା ଅନୁଭବ କରି, ଆଜି ସୋସିଆଲ୍ ମିଡିଆରେ ମତ ରଖିଛନ୍ତି ଆଦିବାସୀ ନେତା ଜୟରାମ ପାଙ୍ଗୀ। ଇମ୍ଫା ଭଳି ଭାତହାଣ୍ଡିରେ ବିଷ ପକାଇ କାହାରି ବି ଲାଭ ହେବନି, ବରଂ କ୍ଷତି ହେବ। ନିରୀହ ଲୋକଙ୍କ କାନ୍ଧରେ ବନ୍ଧୁକ ରଖି ଶିକାର ନକରି ସାମ୍ନାକୁ ଆସ, ମିଳିମିଶି ଆନ୍ଦୋଳନ କରିବା ବୋଲି ସେ ଲେଖିଛନ୍ତି।</p><p>ଉତ୍ତେଜନା ଓ ଭଙ୍ଗାରୁଜା ପରେ ପ୍ରଶାସନ ପକ୍ଷରୁ ସଫେଇ ଦିଆଯାଇଛି। ଘଟଣାର ସମାଧାନ ପାଇଁ ଉଦ୍ୟମ ଚାଲିଥିବା ଅତିରିକ୍ତ ତହସିଲଦାର କହିଛନ୍ତି।</p><p>ଏଠାରେ ପ୍ରଶ୍ନ ଉଠୁଛି, କେଉଁ ଉଦ୍ଦେଶ୍ୟ ସାଧନ ପାଇଁ ଚାଲିଛି ଏହି ଆନ୍ଦୋଳନ ? କେବଳ ୯ ଦଫା ଦାବି ପୂରଣ, ନା ଏହା ପଛରେ ରହିଛି ବାହାର ଷଡ଼ଯନ୍ତ୍ର ? ଆନ୍ଦୋଳନକାରୀ କାରଖାନା ସମେତ କାହିଁକି କଲୋନୀ ଓ ହସ୍ପିଟାଲ ଗେଟ୍&zwnj;ରେ ତାଲା ପକାଇଛନ୍ତି ? ଏହାଦ୍ୱାରା କାରଖାନା ଭିତରେ ଲୋକେ ଆତଙ୍କିତ ଓ ଏକ ପ୍ରକାର ବନ୍ଦୀ ଅବସ୍ଥାରେ ରହିଛନ୍ତି।</p><p>କିଛି ନ୍ୟସ୍ତସ୍ୱାର୍ଥ ବ୍ୟକ୍ତିଙ୍କ ଏହି ଆନ୍ଦୋଳନ ଯୋଗୁଁ ଇମ୍ଫା କମ୍ପାନୀ ଉପରେ ନିର୍ଭର କରୁଥିବା ଶହ ଶହ ଶ୍ରମିକ ଏବେ କାମରୁ ବଞ୍ଚିତ ହୋଇଛନ୍ତି। ତେବେ ପ୍ରଶାସନ କିଭଳି ଏଥିରେ ହସ୍ତକ୍ଷପ କରି ସ୍ଥିତି ସ୍ୱାଭାବିକ କରିପାରୁଛି, ତା ଉପରେ ଏବେ ସମସ୍ତଙ୍କ ନଜର।</p>

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।