ପାଣି ଭର୍ତ୍ତି ମୋରମ ଖାଦାନରେ ପଡ଼ି ଶିଶୁ ପୁତ୍ର ମୃତ

ବଣାଇ (ଓଡ଼ିଶା ରିପୋର୍ଟର): ପାଣି ଭର୍ତ୍ତି ମୋରମ ଖାଦାନରେ ପଡ଼ି ଏକ ଶିଶୁ ପୁତ୍ରର ମୃତ୍ୟୁ ଘଟିଛି। ଏହି ଦୁଃଖଦ ଘଟଣା ଘଟିଛି ସୁନ୍ଦରଗଡ଼ ଜିଲ୍ଲା ବଣାଇ ଥାନା ଅନ୍ତର୍ଗତ ବାବୁନୂଆଗାଁରେ।

ମୃତ ଶିଶୁର ନାଁ ଲିକାଶ ପାତ୍ର। ତାକୁ ୫ ବର୍ଷ ହୋଇଥିଲା।

ମିଳିଥିବା ସୂଚନା ଅନୁଯାୟୀ ପାର୍ଥବ ପାତ୍ରଙ୍କ ଏହି ପାଞ୍ଚ ବର୍ଷର ଶିଶୁ ପୁତ୍ର ଗାଁ ନିକଟସ୍ଥ ପଡ଼ିଆକୁ ଶୌଚ ହେବାକୁ ଯାଇଥିଲା। ଶୌଚ ପରେ ଧୋଇ ହେବାକୁ ପଡ଼ିଆ ପାଖରେ ଥିବା ପାଣି ଭର୍ତ୍ତି ମୋରମ ଖାଦାନକୁ ଯାଇଥିଲା ଓ ସେଥିରେ ବୁଡ଼ି ଯାଇଥିଲା।

ସେ ପାଣିରେ ବୁଡ଼ିଯିବା କିଛି ଲୋକ ଦେଖିଥିଲେ। ସେମାନେ ତୁରନ୍ତ ତାକୁ ପାଣିରୁ ଉଦ୍ଧାର କରିଥିଲେ ଓ ବଣାଇ ଡାକ୍ତରଖାନା ନେଇ ଯାଇଥିଲେ। ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।

ଶିଶୁଟିର ମୃତ୍ୟୁକୁ ନେଇ ବାବୁନୂଆଗାଁ ଅଞ୍ଚଳରେ ଶୋକର ଛାୟା ଖେଳି ଯାଇଥିବା ବେଳେ ବଣାଇ ପୁଲିସ୍ ଘଟଣାର ତଦନ୍ତ କରୁଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।