ପ୍ରଭାତଙ୍କୁ ମିଳିଲା ଜାମିନ, ହେଲେ…

ଭୁବନେଶ୍ୱର (ଓଡ଼ିଶା ରିପୋର୍ଟର): ସି ସୋର ଚିଟଫଣ୍ଡ୍ ମାମଲାରେ ଗିରଫ ବିଧାୟକ ପ୍ରଭାତ ବିଶ୍ୱାଳଙ୍କୁ ଜାମିନ ମିଳିଛି। ପ୍ରାୟ ୭ ମାସ ପରେ ହାଇକୋର୍ଟ ତାଙ୍କୁ ୨ ମାସ ଲାଗି ଅନ୍ତରୀଣ ଜାମିନ ଦେଇଛନ୍ତି। ଗିରଫଦାରୀ ପରେ ସ୍ୱାସ୍ଥ୍ୟାବସ୍ଥା ଖରାପ ହେବାରୁ ତାଙ୍କୁ ଏସ୍‌ସିବିରେ ଭର୍ତ୍ତି କରାଯାଇଥିଲା। ପ୍ରଭାତଙ୍କୁ ଜାମିନ ମିଳିବା ଖବର ଜଣାପଡିବା ପରେ ପରିବାର ଲୋକେ ଓ ସମର୍ଥକଙ୍କ ମଧ୍ୟରେ ଖୁସିର ଲହରୀ ଖେଳି ଯାଇଛି। ପ୍ରଭାତଙ୍କୁ ଜାମିନି ମିଳିଛି ସତ, ହେଲେ ସେ ଘରକୁ ଫେରି ପାରିବେ ନାହିଁ। କାରଣ ସେ ଏବେ ଏସ୍‌ସିବିରେ ଚିକିତ୍ସାଧୀନ ଅଛନ୍ତି। ଜାମିନ ମିଳିବାକୁ ନେଇ ପରିବାର ଲୋକେ ଖୁସି ଥିବା ବେଳେ ଘରକୁ ଫେରି ନ ପାରିବା କାରଣରୁ ପ୍ରଭାତଙ୍କ ମନରେ ଦୁଃଖ ରହିଛି।

ସୂଚନାଯୋଗ୍ୟ, କଟକ ଚୌଦ୍ୱାର ବିଧାୟକ ଥିବା ପ୍ରଭାତଙ୍କୁ ସିବିଆଇ ସି ସୋର କମ୍ପାନୀକୁ ଅହେତୁକ ଅନୁକମ୍ପା ଅଭିଯୋଗରେ ଗତବର୍ଷ ସେପ୍ଟେମ୍ବରରେ ଗିରଫ କରିଥିଲା। ତେବେ ପତ୍ନୀଙ୍କ ଆକାଉଣ୍ଟକୁ ଟଙ୍କା ଯାଇଥିବାରୁ ଏଥିରେ ପ୍ରଭାତଙ୍କ କୌଣସି ଭୂମିକା ନଥିବା ଆଜି କୋର୍ଟରେ ଯୁକ୍ତି ଦର୍ଶାଇଥିଲେ ତାଙ୍କ ଓକିଲ। ଅଭିଯୋଗର ଠୋସ ପ୍ରମାଣ ସିବିଆଇ ପାଇ ନଥିବାରୁ ଆଜି କୋର୍ଟରେ ପ୍ରଭାତଙ୍କ ବିରୋଧରେ କେସ୍ ଡାଏରୀ ବି ଦାଖଲ କରିପାରି ନଥିଲା। ଅନ୍ୟପକ୍ଷରେ ତାଙ୍କ ସ୍ୱାସ୍ଥ୍ୟାବସ୍ଥା ଠିକ୍ ନଥିବା ସମ୍ପର୍କରେ ଏସସିବି କର୍ତ୍ତୃପକ୍ଷ ଦେଇଥିବା ରିପୋର୍ଟକୁ ବି କୋର୍ଟରେ ଉପସ୍ଥାପନ କରାଯାଇଥିଲା।

ପୂର୍ବରୁ ଅର୍ଥତତ୍ତ୍ୱ ଲିଙ୍କରେ ବିଧାୟକ ପ୍ରଭାତ ତ୍ରିପାଠୀ, ନବଦିଗନ୍ତ ମାମଲାରେ ସାଂସଦ ରାମଚନ୍ଦ୍ର ହାଁସଦା, ପୂର୍ବତନ ବିଧାୟକ ସୁବର୍ଣ୍ଣ ନାୟକ ଓ ହୀତେଶ ବଗର୍ତ୍ତି ଗିରଫ ହୋଇଥିଲେ। କେବଳ ରାମଚନ୍ଦ୍ର ହାଁସଦାଙ୍କୁ ଛାଡ଼ିଦଲେ ଅନ୍ୟମାନେ ଜାମିନ୍‌ରେ ମୁକୁଳି ସାରିଛନ୍ତି। ହାଁସଦାଙ୍କ ଜାମିନ ଆବେଦନ ସୁପ୍ରିମକୋର୍ଟରେ ୩ ଥର ଓ ହାଇକୋର୍ଟରେ ୪ ଥର, ଏଭଳି ୭ଥର ଖାରଜ ହୋଇସାରିଛି। ଏପଟେ ପ୍ରଭାତ ବିଶ୍ୱାଳଙ୍କୁ ଜାମିନ୍ ପରେ ସିବିଆଇର ତଦନ୍ତ ପ୍ରକ୍ରିୟାକୁ ନେଇ ପ୍ରଶ୍ନ ଉଠାଉଛି କ୍ଷତିଗ୍ରସ୍ତ ମିଳିତ ମଞ୍ଚ।

୨୦୧୭ ସେପ୍ଟେମ୍ବର ୧୯ ତାରିଖରେ ପ୍ରଭାତ ଗିରଫ ହେବା ପରେ ସିବିଆଇ ତାଙ୍କୁ ୫ ଦିନ ପାଇଁ ରିମାଣ୍ଡରେ ନେଇଥିଲା। ତେବେ ସ୍ୱାସ୍ଥ୍ୟଗତ କାରଣରୁ ପ୍ରଭାତ ଝାରପଡ଼ା ଜେଲ ବଦଳରେ କଟକ ଏସ୍‌ସିବିରେ ମେରୁଦଣ୍ଡ ବିଭାଗରେ ଚିକିତ୍ସାଧୀନ ଅଛନ୍ତି।