ଶେଷ ହେଲା ଭକ୍ତଙ୍କ ପ୍ରତୀକ୍ଷା: ୨ ବର୍ଷ ପରେ ଭିତରକାଠ ନିକଟରୁ ଆରମ୍ଭ ହେଲା ଦର୍ଶନ

ପୁରୀ(ଓଡିଶା ରିପୋର୍ଟର):  ଖୋଲିଲା ଶ୍ରୀମନ୍ଦିର ଜଗମୋହନ। ହାଇକୋର୍ଟଙ୍କ ନିର୍ଦ୍ଦେଶ ପରେ ଦୀର୍ଘ ଦୁଇ ବର୍ଷ ଦୁଇ ମାସ ପରେ ଆଜିଠୁ ଭିତର କାଠ ପାଖରୁ ଦିଅଁ ଦର୍ଶନ ସୁଯୋଗ ପାଇଛନ୍ତି ଭକ୍ତ । ହେଲେ ଗର୍ଭଗୃହ ପ୍ରବେଶ ଉପରେ ଥିବା କଟକଣା ପାଇଁ ସେବାରେ ବ୍ୟାଘାତ ହେବାରୁ ଆଜି ନୀତିରେ ପ୍ରାୟ ୫ ଘଣ୍ଟା ବିଳମ୍ବ ହୋଇଥିଲା । ପ୍ରାୟ ସାଢ଼େ ୪ଟାରେ ସକାଳ ଧୂପ ସରିବା ପରେ ୫ଟା ୧୦ରେ ସର୍ବସାଧାରଣଙ୍କ ପାଇଁ ଜଗମୋହନ ଖୋଲିଥିଲା।

କାଳିଆକୁ ପାଖରୁ ଦେଖିବାର ଖୁସି ଭକ୍ତଙ୍କ ମୁହଁରୁ ଝଟକୁଥିଲା। କଳାବଦନକୁ ଦେଖି କେହି ଭାବବିହ୍ୱଳ ହୋଇ କାନ୍ଦୁଥିଲା ତ ପୁଣି କିଏ ଆନନ୍ଦରେ ହାତ ଟେକି ନିଜ ଦୁଃଖ ଜଣାଉଥିଲା। ଦୀର୍ଘ ୨ ବର୍ଷ ପରେ ଆଜି ଭାଗ୍ୟ ଜୁଟିଥିବାରୁ ଅନେକ ଶ୍ରଦ୍ଧାଳୁ ଶ୍ରୀମନ୍ଦିର ଜଗମୋହନରେ ପ୍ରବେଶ କରି ମହାପ୍ରଭୁଙ୍କ ଦର୍ଶନ କରିଥିଲେ।

ହାଇକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ସକାଳ ଧୂପ ପରେ ଭକ୍ତଙ୍କୁ ଜଗମୋହନକୁ ଛଡ଼ାଯାଇଥିଲା। ହେଲେ ଆରମ୍ଭରୁ ନୀତିରେ ବିଳମ୍ବ ପାଇଁ ସକାଳଧୂପ ସରୁ ସରୁ ୫ ଘଣ୍ଟା ବିଳମ୍ବ ହୋଇ ଅନ୍ୟନୀତି ବଢିବା ବେଳକୁ ପ୍ରାୟ ସାଢ଼େ ୪ଟା ବାଜିଗଲା । ଆଜି ଅମାବାସ୍ୟା ଥିବାରୁ ଅମାବାସ୍ୟା ନାରାୟଣଙ୍କ ସାଗରବିଜେ ନୀତି ପରେ ହିଁ ଭକ୍ତଙ୍କୁ ଭିତରକାଠରୁ ଦର୍ଶନ ସୁଯୋଗ ମିଳିଥିଲା । ଫଳରେ ସେତେବେଳକୁ ଘଣ୍ଟା ଘଣ୍ଟା ଧରି ଲାଇନ୍‌ରେ ରହି ବି ପାଖରୁ ଶ୍ରୀଜିଉଙ୍କୁ ଦେଖି ନ ପାରି ନିରାଶ ଫେରିଥିଲେ ବହୁ ଭକ୍ତ।

ସେବାୟତଙ୍କ ଗର୍ଭଗୃହ ପ୍ରବେଶ ଉପରେ ଲାଗିଥିବା କଟକଣାକୁ ଏଥିପାଇଁ ଦାୟୀ କରିଛନ୍ତି ସେବାୟତ। ହାଇକୋର୍ଟଙ୍କ ନିର୍ଦ୍ଦେଶ ଅନୁଯାୟୀ କେବଳ ପାଳିଆ ସେବାୟତଙ୍କ ବ୍ୟତିତ ଅନ୍ୟ ସେବାୟତଙ୍କୁ ଗର୍ଭଗୃହ ପ୍ରବେଶ ବାରଣ ରହିଛି। ତେବେ ଆଜି ଜଣେ ପାଳିଆ ସେବାୟତ ଅଶୌଚ ଥିବାରୁ ତାଙ୍କ ସ୍ଥାନରେ କିଏ ନୀତି ସଂପାଦନ କରିବେ ସେ ନେଇ ବିବାଦ ଉପୁଜିଥିଲା।  ତେବେ ଜିଲ୍ଲାପାଳ ଓ ଏସ୍‌ପିଙ୍କ ହସ୍ତକ୍ଷେପ ପରେ ନୀତି ତ୍ୱରାନ୍ୱିତ ହୋଇଥିଲା।

ସୂଚନାଯୋଗ୍ୟ, ୨୦୧୬ ମସିହା ଜାନୁଆରୀ ମାସରୁ ଏଏସ୍ଆଇ ପକ୍ଷରୁ ଜଗମୋହନ ମରାମତି କାମ ଆରମ୍ଭ ହେବା ପରଠାରୁ ବନ୍ଦ ଥିଲା ଜଗମୋହନ ଦର୍ଶନ। ବାହାରକାଠ ପାଖରୁ ହିଁ ଦର୍ଶନ କରୁଥିଲେ ଭକ୍ତ।