ଢେଙ୍କାନାଳ (ରାଜଶ୍ରୀ ଶତପଥୀ): ଭିଣୋଇର କଟୁରି ଚୋଟରେ ଶଳାର ଜୀବନ ଗଲା। ଏଭଳି ଏକ ଘଟଣା ଘଟିଛି ଢେଙ୍କାନାଳ ଜିଲ୍ଲା ସଦର ଥାନା ଅନ୍ତର୍ଗତ ବିଦ୍ୟାବନ୍ଧ ଗାଁରେ।
ମୃତ ବ୍ୟକ୍ତିଙ୍କ ନାଁ ନଗେଶ ରାଉତ। ତାଙ୍କ ଭିଣୋଇ ନାଁ ଦୁର୍ଯ୍ୟୋଧନ ବିଶ୍ୱାଳ।
ଏହି ଘଟଣାରେ ଦୁର୍ଯ୍ୟୋଧନର ସ୍ତ୍ରୀ ଓ ଶାଶୂ ବି ଆହତ ହୋଇଛନ୍ତି। ସେମାନେ ନଗେଶଙ୍କୁ ବଞ୍ଚାଇବାକୁ ଉଦ୍ୟମ କରି ଆହତ ହୋଇଛନ୍ତି। ଘରେ ସମସ୍ତେ ଶୋଇପଡ଼ିଥିବା ବେଳେ ଦୁର୍ଯ୍ୟୋଧନ ତା’ ଶଳା ଉପରେ ଆକ୍ରମଣ କରିଥିଲା।
ମିଳିଥିବା ସୂଚନା ଅନୁଯାୟୀ, ପୂର୍ବରୁ ଦୁର୍ଯ୍ୟୋଧନ ଓ ନଗେଶଙ୍କ ମଧ୍ୟରେ ତିକ୍ତତା ଥିଲା। ଦୁର୍ଯ୍ୟୋଧନ ଦୋଳ ପୂର୍ଣ୍ଣିମାରେ ଶ୍ୱଶୁର ଘରକୁ ବୁଲିବାକୁ ଆସିଥିବା ବେଳେ ପୂର୍ବ ଶତ୍ରୁତାରୁ ନଗେଶଙ୍କୁ ହତ୍ୟା କରିଛି। ସେ ୭ ଦିନ ହେଲା ସେଠାରେ ଥିଲା।
ଦୁର୍ଯ୍ୟୋଧନ ଫେରାର ହୋଇଯାଇଛି। ପୁଲିସ୍ ଘଟଣାର ତଦନ୍ତ କରୁଛି।