ଖାଣ୍ଟି ଓଡ଼ିଆ ହେବାକୁ ଅନୁରୋଧ କଲେ ବାଣୀବିହାର ଛାତ୍ର

 

ଭୁବନେଶ୍ୱର(ଓଡ଼ିଶା ରିପୋର୍ଟର): ଓଡ଼ିଆ ନୂଆ ବର୍ଷରେ ଲୋକଙ୍କୁ ସଚେତନତାର ବାର୍ତ୍ତା ବାଣ୍ଟିଲେ ସାମ୍ବାଦିକତା ଛାତ୍ର। ଧୀରେ ଧୀରେ ଆଧୁନିକତାକୁ ଆପଣେଇବାକୁ ଯାଇ ଓଡ଼ିଆମାନେ ଓଡ଼ିଆ ଭାଷାକୁ ଭୁଲି ଇଂରାଜୀ ବା ହିନ୍ଦୀରେ କଥା ହେବାକୁ ପସନ୍ଦ କରୁଛନ୍ତି। ସେମାନଙ୍କ ଅନୁଯାୟୀ ଆଜିର ଆଧୁନିକ ଯୁଗରେ ଇଂରାଜୀ ନ କହି ଓଡ଼ିଆ କହିଲେ କୁଆଡ଼େ ସମ୍ମାନ ତଳେ ପଡ଼ିଯିବ। ଆଜିକାଲି ପିଲାଙ୍କ ଧାରାଣା ଯେ,  ଓଡ଼ିଆରେ କଥା ହେଲେ ଲୋକେ କାଳେ ମୂର୍ଖ ଓ ପୁରୁଣା ଜମାନାର ବା ଆଉଟ୍‌ଡେଟେଡ୍ ବୋଲି କହିବେ। ତେବେ ଏଭଳି ସ୍ଥିତିରେ ଉତ୍କଳ ବିଶ୍ୱବିଦ୍ୟାଳୟର ସାମ୍ବାଦିକତା ଛାତ୍ରମାନେ ଓଡ଼ିଆ ଭାଷାକୁ ନେଇ ସଚେତନତାର ବାର୍ତ୍ତା ବାଣ୍ଟିଛନ୍ତି।

ଓଡ଼ିଆ ଭାଷାରେ ସ୍ୱାକ୍ଷର କରିବା, ଘରେ ଓ ବାହାରେ ଓଡ଼ିଆ ଭାଷା ବ୍ୟବହାର କରିବା, ନିମନ୍ତ୍ରଣ ପତ୍ର ଓଡ଼ିଆରେ ଛାପିବା, ନାମଫଳ ଓଡ଼ିଆରେ ଲେଖିବା, ଉଚ୍ଚଶିକ୍ଷା କ୍ଷେତ୍ରରେ ଇଂରାଜୀ ଭାଷା ସହ ଓଡ଼ିଆ ଭାଷାକୁ ସମଗୁରୁତ୍ୱ ଦେବା, ଘରକୁ ନିୟମିତ ଓଡ଼ିଆ ପତ୍ରପତ୍ରିକା ନେବା ଓ ପିଲାଙ୍କୁ ଓଡ଼ିଆ ଭାଷା କହିବାକୁ ପ୍ରେରଣା ଦେବାକୁ ସଂକଳ୍ପ ନେବା ପାଇଁ ରାଜ୍ୟବାସୀଙ୍କୁ ପ୍ରେରିତ କରିଛନ୍ତି।`

ଉତ୍କଳ ବିଶ୍ୱବିଦ୍ୟାଳୟର ସାମ୍ବାଦିକତା ଛାତ୍ର ଶିବରାମ ମହାପାତ୍ରଙ୍କ ନେତୃତ୍ୱରେ ଆୟୋଜିତ ଏହି କାର୍ଯ୍ୟକ୍ରମରେ ଅସିତ ଦାସ, ସତ୍ୟରଞ୍ଜନ ଜେନା, କମଳାକାନ୍ତ ସାହୁ, ସୁନୀଲ କୁମାର ସେଠି, ଦେବୀପ୍ରସାଦ ମହାନ୍ତି, ବିଶ୍ୱଜିତ ବରାଳ ପ୍ରମୁଖ ସାମିଲ ହୋଇ ବାଣିବିହାର ଛକରେ ଲୋକମାନଙ୍କୁ ସଚେତନତାର ବାର୍ତ୍ତା ଲେଖାଥିବା ଲିଫ୍‌ଲେଟ୍ ବାଣ୍ଟିଛନ୍ତି।