‘ସରକାରୀ ହେଉ ବା ଘରୋଇ, ସବୁ କୋଭିଡ୍ ପରୀକ୍ଷା ରିପୋର୍ଟ ଠିକ୍’

ଭୁବନେଶ୍ୱର(ଓଡ଼ିଶା ରିପୋର୍ଟର): ସରକାରୀ ହସ୍ପିଟାଲ ଓ ଘରୋଇ ହସ୍ପିଟାଲରେ କୋଭିଡ୍ ନମୂନା ପରୀକ୍ଷା ରିପୋର୍ଟରେ ତାଳମେଳ ରହୁନଥିବା ନେଇ କେତେକ ଅଭିଯୋଗ ଆସିବାପରେ ଆଜି ରାଜ୍ୟ ସରକାର ମୁହଁ ଖୋଲିଛନ୍ତି। କୋଭିଡ୍ ନମୂନା ପରୀକ୍ଷା ରିପୋର୍ଟ କଦାପି ଭୁଲ୍ ନଥାଏ ଓ ଏହା ଆଇସିଏମଆର ଗାଇଡଲାଇନ୍ ଅନୁସାରେ ସଠିକ୍ ପ୍ରକ୍ରିୟାରେ ସମ୍ପାଦନ ହୋଇଥାଏ ବୋଲି କହିବା ସହ ରାଜ୍ୟରେ ଦିନକୁ ୨୦ହଜାର ନମୂନା ପରୀକ୍ଷା ପାଇଁ ଆବଶ୍ୟକ ଭିତ୍ତିଭୂମି ରହିଥିବା ସ୍ପଷ୍ଟ କରିଛନ୍ତି।

ଏନଆରଏଚଏମ୍ ନିର୍ଦ୍ଦେଶିକା ଶାଳିନୀ ପଣ୍ଡିତ ଆଜି ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, ସରକାରୀ ଲ୍ୟାବରେ ପରୀକ୍ଷା ଓ ଘରୋଇ ଲ୍ୟାବରେ ପରୀକ୍ଷାରେ ଭିନ୍ନ ଭିନ୍ନ ରିପୋର୍ଟ ଆସୁଥିବାର ଦେଖାଯାଉଛି। କିନ୍ତୁ ଏହି ରିପୋର୍ଟରେ କିଛି ଭୁଲ୍ ନଥାଏ। ବରଂ ନମୂନା ପରୀକ୍ଷା ହେଉଥିବା ବ୍ୟକ୍ତିର ଶରୀରରେ ଭାଇରସ୍ ସଂକ୍ରମଣର ପ୍ରଭାବ ଉପରେ ନମୂନା ରିପୋର୍ଟ ନିର୍ଭର କରିଥାଏ। କେନ୍ଦ୍ର ସରକାରଙ୍କ ଆଇସିଏମଆର ଦ୍ୱାରା ନିର୍ଦ୍ଧାରିତ ଗାଇଡଲାଇନ୍ ଅନୁସାରେ ସମସ୍ତ ଲ୍ୟାବରେ ସଠିକ୍ ପ୍ରକ୍ରିୟାରେ ନମୂନା ପରୀକ୍ଷା ହେଉଛି। କୌଣସି ବ୍ୟକ୍ତିଙ୍କ ଶରୀରରେ ଭାଇରସର ପ୍ରଭାବ ଜଣାପଡ଼ିବା ପାଇଁ ୪-୫ଦିନ ସମୟ ଲାଗୁଛି। ତେଣୁ ଏହି ସମୟ ମଧ୍ୟରେ ପରୀକ୍ଷା କରାଯିବା ଉଚିତ୍ ବୋଲି ସେ କହିଛନ୍ତି।

ଶ୍ରୀମତୀ ପଣ୍ଡିତ କହିଛନ୍ତି ଯେ, ରାଜ୍ୟରେ ଏବେ ଦୈନିକ ୨୦ହଜାର ନମୂନା ପରୀକ୍ଷା କରିବା ଭଳି ଭିତ୍ତିଭୂମି ରହିଛି। ଏବେ ରାଜ୍ୟର ୩୦ଟି ଜିଲ୍ଲାରେ ମୋଟ ୫୪ଟି ଲ୍ୟାବ୍ ରହିଛି। ଏଥିରେ ୪୫ଟି ସରକାରୀ ଓ ୯ଟି ଘରୋଇ ଲ୍ୟାବ୍ ଅଛି। ଏସବୁ ସ୍ଥାନରେ ନମୂନା ପରୀକ୍ଷା ହେଉଛି। ଅଧିକରୁ ଅଧିକ ସଂଖ୍ୟକ ଲୋକ ଏଠାରେ ପରୀକ୍ଷା କରାନ୍ତୁ ବୋଲି ସରକାର ଚାହୁଁଛନ୍ତି। ଏବେ ଗଞ୍ଜାମ ଜିଲ୍ଲାରେ ମୋବାଇଲ୍ ଭ୍ୟାନ୍ ମାଧ୍ୟମରେ ନମୂନା ପରୀକ୍ଷା ହେଉଛି।
ସେହିପରି ପ୍ଲାଜମା ଥେରାପୀ ଯୋଗୁ ଏବେ ସଫଳତା ମଧ୍ୟ ମିଳିବାରେ ଲାଗିଛି। ୨୮ଜଣ ଡୋନରଙ୍କଠୁ ନିଆଯାଇଥିବା ପ୍ଲାଜମା ୩୩ଜଣ ସଂକ୍ରମିତଙ୍କୁ ଦିଆଯାଇଛି। ସେମାନଙ୍କ ମଧ୍ୟରୁ ୨୩ଜଣ ସୁସ୍ଥ ହେବାରେ ଲାଗିଛନ୍ତି। ୮ଜଣ ସୁସ୍ଥ ହୋଇ ଘରକୁ ଫେରିଛନ୍ତି। ରାଜ୍ୟର ପ୍ରମୁଖ ହସ୍ପିଟାଲରେ ପ୍ଲାଜମା ଥେରାପୀ ବ୍ୟବସ୍ଥା ଥିବାବେଳେ କଟକସ୍ଥିତ ଏସସିବି ମେଡିକାଲ ଓ କ୍ୟାପିଟାଲ ହସ୍ପିଟାଲରେ ପ୍ଲାଜମା ବ୍ୟାଙ୍କ ସ୍ଥାପନ ହୋଇଛି। ଆସନ୍ତାକାଲି ରାଉରକେଲା ସରକାରୀ ହସ୍ପିଟାଲରେ ମଧ୍ୟ ଅନୁରୂପ ପ୍ଲାଜମା ବ୍ୟାଙ୍କ ସ୍ଥାପନ ହେବ।

ସେହିପରି ରାଜ୍ୟରେ ଏବେ ନମୂନା ପରୀକ୍ଷା ମୋଟ ୫ଲକ୍ଷ ଅତିକ୍ରମ କରିଛି। ପ୍ରଥମ ୧୦ସପ୍ତାହରେ ୧ଲକ୍ଷ ନମୂନା ପରୀକ୍ଷା ହୋଇଥିବାବେଳେ ମାତ୍ର ୧୦ଦିନରେ ଶେଷ ଏକ ଲକ୍ଷ ନମୂନା ପରୀକ୍ଷା ସମ୍ଭବପର ହୋଇପାରିଛି।ରାଜ୍ୟରେ ପର୍ଯ୍ୟାପ୍ତ ପରିମାଣର ପରୀକ୍ଷା କିଟ୍ ରହିଛି ଓ ଲୋକମାନେ ଆଗକୁ ଆସି ଏହି ପରୀକ୍ଷା କରିବାକୁ ସେ ପରାମର୍ଶ ଦେଇଛନ୍ତି। ରାଜ୍ୟରେ ସ୍ୱାସ୍ଥ୍ୟ ଭିତ୍ତିଭୂମିର ଅଭାବ ନାହିଁ ବୋଲି ସେ କହିବା ସହ ଗତ ୭ଦିନ ମଧ୍ୟରେ କଟକ,ଗଞ୍ଜାମ ଓ ଖୋର୍ଦ୍ଧା ଜିଲ୍ଲାରେ ୭ଟି ନୂଆ ମେଡିକାଲ ସ୍ଥାପନ କରି ଏକ ହଜାର ନୂଆ ବେଡ୍ ସ୍ଥାପନ କରାଯାଇ ପାରିଛି।

ରାଜ୍ୟରେ ଏବେ ସଂକ୍ରମିତଙ୍କ ମଧ୍ୟରେ ୬୨.୪୨% ବ୍ୟକ୍ତି ସୁସ୍ଥ ହୋଇଥିବାବେଳେ ୩୭.୦୩% ବ୍ୟକ୍ତି ଏବେ ସକ୍ରିୟ ସଂକ୍ରମିତ ଅଛନ୍ତି। ୦.୫୬ % ଲୋକଙ୍କ ମୃତ୍ୟୁ ଘଟିଛି। ସଂକ୍ରମିତଙ୍କ ମଧ୍ୟରେ ୬୦ ବର୍ଷ ବୟସରୁ ଅଧିକ ଲୋକଙ୍କ ସଂଖ୍ୟା ମାତ୍ର ୭% ହୋଇଥିବାବେଳେ ୦ରୁ ୪୦ ବର୍ଷ ମଧ୍ୟରେ ୬୪% ଓ ୪୧ରୁ ୬୦ବର୍ଷ ମଧ୍ୟରେ ୨୯% ଲୋକ ରହିଛନ୍ତି। ମୋଟ ସଂକ୍ରମିତଙ୍କ ମଧ୍ୟରେ ୭୨% ପୁରୁଷ ଓ ୨୮% ମହିଳା ଅଛନ୍ତି।

ଶ୍ରୀମତୀ ପଣ୍ଡିତ କହିଥିଲେ ଯେ, ବିବାହ ଓ ଅନ୍ତେଷ୍ଟି କାର୍ଯ୍ୟରେ ସାମିଲ ହେଉଥିବା ଲୋକମାନେ ବେଶୀ ସଂଖ୍ୟାରେ ସଂକ୍ରମିତ ହେଉଥିବା ସରକାରଙ୍କ ଦୃଷ୍ଟିକୁ ଆସିଛି। ତେଣୁ ଏସବୁ ସ୍ଥାନକୁ ଯିବାବେଳେ ଓ ବାହାରକୁ ଯିବା ସମୟରେ ମାସ୍କ ଓ ସାମାଜିକ ଦୂରତ୍ୱ ଅବଲମ୍ବନ କରିବାକୁ ସେ ପରାମର୍ଶ ଦେଇଛନ୍ତି।

ଆହୁରି ପଢ଼ନ୍ତୁ

ରାଜ୍ୟସଭାରେ ବିରୋଧୀଙ୍କ ଆଚରଣ ସଂସଦର ଗାରିମାକୁ ନଷ୍ଟ କରିଛି: ରାଜନାଥ

ରାଜ୍ୟସଭା ଉପାଧ୍ୟକ୍ଷ ହରିବଂଶଙ୍କ ବିରୋଧରେ ଅବିଶ୍ୱାସ ପ୍ରସ୍ତାବ ଆଣିଲେ ବିରୋଧୀ

ଭାରତୀୟ କୂଟନୀତିଜ୍ଞଙ୍କୁ ଭିସା ଦେଲାନି ପାକିସ୍ତାନ

ଶତକୀୟ ବିଜୟ ସହ କ୍ୟାପଟେନ୍ କୁଲଙ୍କ ସଫଳ କମ୍ ବ୍ୟାକ୍

କୃଷି ବିଲ୍‌କୁ ବିରୋଧ କଲା ବିଜେଡି

ଆଉ ୧୦ ଜଣଙ୍କ ଜୀବନ ଗଲା, ରାଜ୍ୟରେ କରୋନା ଜନିତ ମୃତ୍ୟୁ ସଂଖ୍ୟା ୭୦୦ ଟପିଲା

ଆରମ୍ଭ ମ୍ୟାଚରେ ହାରିବା ପରେ ଖୁସି ହୋଇଗଲେ ମୁମ୍ୱାଇ ଇଣ୍ଡିଆନ୍ସ ଫ୍ୟାନ୍ !

ରୋମାଞ୍ଚକର ବିଜୟରୁ ଆଇପିଏଲ ଆରମ୍ଭ କଲା ଚେନ୍ନାଇ

ବାଇକ୍‌ ଉପରେ ଚଢ଼ିଗଲା ସ୍କର୍ପିଓ, ରାସ୍ତାରେ ଚାଲିଗଲା ଦୁଇ ଯୁବକଙ୍କ ଜୀବନ

ଆଇପିଏଲରୁ କ୍ୟାରିଅର ଆରମ୍ଭ କଲେ ଓଡ଼ିଆ ପୁଅ

ଏଥର ବିଧାନସଭାର ଅନୁମୋଦନ ପାଇଁ ଆସିବ ୧୨ଟି ଅଧ୍ୟାଦେଶ

ମୁମ୍ବାଇ ଇଣ୍ଡିଆନ୍ସକୁ ୧୬୨ ରନରେ ଅଟକାଇଲା ଚେନ୍ନାଇ