ଭୁବନେଶ୍ୱର(ଓଡ଼ିଶା ରିପୋର୍ଟର): ବିଜୁଳି ଶୁଳ୍କ କମାଇବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖା ଅଭିଯାନ ଆରମ୍ଭ ହୋଇଛି। ସାମାଜିକ ନ୍ୟାୟ ଅଭିଯାନ ପକ୍ଷରୁ ଆଜିଠାରୁ ଭୁବନେଶ୍ୱରରେ ଆରମ୍ଭ ହୋଇଛି ଏହି ଅଭିଯାନ। ଏଥିରେ ସଦସ୍ୟ ତଥା ସାଧାରଣ ଲୋକେ ଏକ ପୋଷ୍ଟକାର୍ଡରେ ବିଜୁଳି ଦର କମାଇବା ପାଇଁ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଛନ୍ତି।
ଭୁବନେଶ୍ୱର ରେଡକ୍ରସ ଭବନରେ ଆୟୋଜିତ ଏକ ସ୍ୱତନ୍ତ୍ର ଉତ୍ସବରେ ଏହି କାର୍ଯ୍ୟକ୍ରମ ଆରମ୍ଭ ହୋଇଛି। ଆଗାମୀ ଦିନରେ ରାଜ୍ୟର ବିଭିନ୍ନ ଗ୍ରାମାଞ୍ଚଳ ଓ ସହରାଞ୍ଚଳରେ ଥିବା ବସ୍ତି ପ୍ରଭୃତି ଅଞ୍ଚଳକୁ ଏହା ପରିବ୍ୟାପ୍ତ କରାଯିବ ବୋଲି ଅଭିଯାନର ଉପଦେଷ୍ଟା ଶ୍ରୀକାନ୍ତ ଜେନା କହିଛନ୍ତି। ଓଡ଼ିଶାରେ ବିଜୁଳି ଉତ୍ପାଦନ ହେଉଥିବା ବେଳେ ଦିଲ୍ଲୀରେ ଉତ୍ପାଦିତ ହେଉନାହିଁ। କିନ୍ତୁ ଦିଲ୍ଲୀରେ ଓଡ଼ିଶାଠାରୁ ବିଜୁଳି ବେଶ୍ କମ୍ ଦରରେ ଉପଲବ୍ଧ ହେଉଛି। ତେଣୁ ଓଡ଼ିଶା ସରକାରଙ୍କ ସଦ୍ବୁଦ୍ଧି ଉଦୟ ହେଉ ଓ ବିଜୁଳି ଦର କମ୍ କରନ୍ତୁ ବୋଲି ଅଭିଯାନର ସଦସ୍ୟମାନେ ଅପିଲ୍ କରିଛନ୍ତି। ଯେ ପର୍ଯ୍ୟନ୍ତ ଦର କମ୍ ନ ହୋଇଛି, ଏଭଳି କାମ ଜାରି ରହିବ ବୋଲି ଅଭିଯାନ ପକ୍ଷରୁ ଚେତାବନୀ ଦିଆଯାଇଛି।