ପୁଞ୍ଜିଲାଲଙ୍କ ଆଖିରେ ଲୁହ!

ଭୁବନେଶ୍ୱର (ଓଡ଼ିଶା ରିପୋର୍ଟର): ପାଟଣାଗଡ଼ ପାର୍ସଲ ବୋମା ବିସ୍ଫୋରଣ ଘଟଣାର ମାଷ୍ଟରମାଇଣ୍ଡ ଅଧ୍ୟାପକ ପୁଞ୍ଜିଲାଲ ମେହେରଙ୍କ ବିରୋଧରେ ପ୍ରମାଣ ଯୋଗାଡ଼ କରିବାରେ ଲାଗିପଡ଼ିଛି କ୍ରାଇମବ୍ରାଞ୍ଚ। ଏବେ କ୍ରାଇମ୍‌ବ୍ରାଞ୍ଚର ଏକ ଟିମ୍ ରାୟପୁରରେ ଡେରା ପକାଇ ଉକ୍ତ ଅଟୋ ଡ୍ରାଇଭରଙ୍କୁ ଖୋଜୁଛି ଯିଏ ପୁଞ୍ଜିଲାଲଙ୍କ ପାଇଁ ଉକ୍ ପାର୍ସଲ ବୋମାକୁ ଏକ କୋରିୟର ସଂସ୍ଥାରେ ବୁକ୍ କରାଇଥିଲେ। ତେବେ ତାଙ୍କୁ ନପାଇଲେ ବି ପୁଞ୍ଜିଲାଲଙ୍କୁ ଦୋଷୀ ସାବ୍ୟସ୍ତ କରିବା ପାଇଁ ଯଥେଷ ପ୍ରମାଣ ରହିଥିବା କ୍ରାଇମବ୍ରାଞ୍ଚ ଆଇଜି ଅରୁଣ ବୋଥ୍ରା କହିଛନ୍ତି। ରାୟପୁରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ସେ ଏ କଥା କହିଛନ୍ତି।

ଆଇଜି ଏହା ବି କହିଛନ୍ତି ଯେ ପୁଞ୍ଜିଲାଲ ତାଙ୍କର ସମସ୍ତ ଦୋଷ ସ୍ୱୀକାର କରିସାରିଛନ୍ତି। ଦିନେ ପଚରାଉଚରା ବେଳେ ସେ କାନ୍ଦି ପକାଇଥିଲେ ଓ କହିଥିଲେ ଯେ ସେ ବହୁବଡ଼ ଅପରାଧ କରି ଦେଇଛନ୍ତି। ତାଙ୍କ ଦ୍ୱାରା ବହୁତ ବଡ଼ ଭୁଲ୍ ହୋଇଯାଇଛି। ଏମିତି ଆଦୌ କରିବାର ନଥିଲା।

ଗତକାଲି ମଧ୍ୟ  ଟିଟିଲାଗଡ ଜି.ଆର୍.ପି ଥାନା ଅଧିକାରୀ ମୋହନ ନାଏକ ଏଭଳି କିଛି କହିଥିଲେ।  କ୍ରାଇମବ୍ରାଞ୍ଚର ଡାକରାରେ ସେ ଗତକାଲି ପାଟଣାଗଡ କେନ୍ଦୁଲିଫ୍‌ ଆଇ.ବିରେ ପହଞ୍ଚି ତଦନ୍ତର ସାମ୍ନା କରିଥିଲେ। ସେଠାରୁ ବାହାରିବା ପରେ ସେ ଗଣମାଧ୍ୟମକୁ କହିଥିଲେ ଯେ ତାଙ୍କର ପୁଞ୍ଜିଲାଲଙ୍କ ସହିତ ଭେଟ ହୋଇଥିଲା। ଏମିତି କାହିଁକି କଲ ବୋଲି ସେ ପୁଞ୍ଜିଲାଲଙ୍କୁ ପଚାରିଥିଲେ। ଜବାବରେ ପୁଞ୍ଜିଲାଲ କହିଥିଲେ ଯେ ସେ କରୁ କରୁ କରି ଦେଇଛନ୍ତି। ଏବେ ଅନୁତାପ କରୁଛନ୍ତି।

ତେବେ ପୁଞ୍ଜିଲାଲ ସତରେ ଦୋଷ ମାନିଛନ୍ତି କି ନାହିଁ ଓ ସତରେ ଅନୁତପ୍ତ କି ନୁହଁନ୍ତି ତାହା ଆଗାମୀ ଦିନରେ ଜଣାପଡ଼ିଯିବ। ଆସନ୍ତାକାଲି ତାଙ୍କର ଦ୍ୱିତୀୟ ପର୍ଯ୍ୟାୟର ରିମାଣ୍ଡ ସରିଯାଉଛି। ତାଙ୍କୁ କ୍ରାଇମବ୍ରାଞ୍ଚ ଆଉ ଥରେ ରିମାଣ୍ଡରେ ନେବ କି ନାହିଁ ତାହା ଜଣାପଡ଼ିନାହିଁ।

ଏ ଭିଡିଓରେ ଆଇଜି ଅରୁଣ ବୋଥ୍ରା କ’ଣ କହୁଛନ୍ତି ଶୁଣନ୍ତୁ-

ଆହୁରି ପଢ଼ନ୍ତୁ: ଠିକଣା ବଦଳାଉଛି ତଦନ୍ତ, କଣ୍ଟାବାଞ୍ଜି ମୁହାଁ କ୍ରାଇମ୍‌ବ୍ରାଞ୍ଚ ଟିମ୍‌