ରାଉରକେଲା (ସତ୍ୟାନନ୍ଦ ମହାନ୍ତି): ରୋଷେଇ ଗ୍ୟାସ୍ ବିସ୍ଫୋରଣରେ ଜଣେ ମହିଳାଙ୍କ ମୃତ୍ୟୁ ଘଟିଥିବା ବେଳେ ୮ ଜଣ ଗୁରୁତର ଆହତ ହୋଇଛନ୍ତି। ସେମାନଙ୍କୁ ବିଭିନ୍ନ ମେଡିକାଲରେ ଭର୍ତ୍ତି କରାଯାଇଛି। ତେବେ ବିସ୍ଫୋରଣ ଏତେ ଭୟଙ୍କର ଥିଲା ଯେ, ଆଖପାଖ ଅଞ୍ଚଳର ୪୦ ଘରର ଛାତ ଉଡ଼ି ଯାଇଛି। ଆଜି ଏମିତି ଏକ ଭୟଙ୍କର ଘଟଣା ଷ୍ଟିଲ୍ ସିଟି ରାଉରକେଲାରେ ଘଟିଛି।
ବିସ୍ଫୋରଣ ସମୟରେ ଜଣେ ୫ ବର୍ଷର ପିଲା ଜବାହରଙ୍କ ଘରେ ଆଗରେ ଖେଳୁଥିଲେ। ସେ ମଧ୍ୟ ଗୁରୁତର ଆହତ ହୋଇଛି। ତାଙ୍କୁ ପ୍ରଥମେ ଆଇଜିଏଚ୍ରେ ଭର୍ତ୍ତି କରାଯାଇଥିଲା। ତା’ର ସ୍ୱାସ୍ଥ୍ୟ ଅବସ୍ଥା ଗୁରୁତର ହେବାରୁ ଭୁବନେଶ୍ୱରକୁ ସ୍ଥାନାନ୍ତରିତ କରାଯାଇଛି।
ଏହି ବିସ୍ଫୋରଣରେ ଜବାହରଙ୍କ ଘର ଆଖପାଖରେ ରହୁଥିବା ୪୦ ପରିବାରଙ୍କ ଘରର ଛାଡ଼ ଉଡି ଯାଇଛି। କାହାର ଆଜ୍ବେଷ୍ଟସ୍ ଛାତ ଭାଙ୍ଗି ପଡ଼ିଛି ତ ଆଉ କାହାର ଘରର କାନ୍ଥ ଭାଙ୍ଗି ଯାଇଛି। ଉଦ୍ଧାରକାରୀ ଦଳ ବସ୍ତିରେ ପହଞ୍ଚି ବିଭିନ୍ନ ସ୍ଥାନରୁ ୫ ଜଣ ଆହତ ବ୍ୟକ୍ତିଙ୍କୁ ଉଦ୍ଧାର କରି ମେଡ଼ିକାଲରେ ଭର୍ତ୍ତି କରିଛି।
ସ୍ଥାନୀୟ ଲୋକଙ୍କ କହିବା ଅନୁସାରେ ଜବାହର ଘରେ ବାଣ ରଖିଥିଲେ। ଯେଉଁଥିରେ ନିଆଁ ଲାଗିବା ପରେ ଏପରି ଭୟଙ୍କର ବିସ୍ଫୋରଣ ଘଟିଥିବା ଅନୁମାନ କରାଯାଉଛି।