ଶିଶୁ ମୃତ୍ୟୁ ଘଟଣା: ସେପ୍ଟେମ୍ବର ୨ରେ ସବୁ ବ୍ଲକ୍ ଅଫିସ୍ ସମ୍ମୁଖରେ ଧାରଣା ଦେବ ବିଜେପି

ଭୁବନେଶ୍ୱର: କଟକ ଶିଶୁ ଭବନରେ ଶିଶୁ ମୃତ୍ୟୁ ଘଟଣାର ପ୍ରତିବାଦରେ ଆନ୍ଦୋଳନକୁ ଓହ୍ଲାଇବ ବିଜେପି। ସେପ୍ଟେମ୍ବର ୨ ତାରିଖରେ ରାଜ୍ୟର ୩୧୪ଟି ବ୍ଳକ୍ କାର୍ଯ୍ୟାଳୟ ଆଗରେ ଦଳ ପକ୍ଷରୁ ଧାରଣା ଏବଂ ପ୍ରତିବାଦ ସଭା କରାଯିବ। ଭୁବନେଶ୍ୱରରେ ଆୟୋଜିତ ଏକ ସାମ୍ୱାଦିକ ସମ୍ମିଳନୀରେ ଏହି ସୂଚନା ଦେଇଛନ୍ତି ଦଳର ବରିଷ୍ଠ ନେତା ବିଜୟ ମହାପାତ୍ର। ତା'ସହ ସହରାଞ୍ଚଳରେ ସିଡିଏମ୍ଓ ଏବଂ ଏଡିଏମ୍ଓଙ୍କ କାର୍ଯ୍ୟାଳୟ ଆଗରେ ମଧ୍ୟ ପ୍ରତିବାଦ ସଭା କରାଯିବ ବୋଲି ସେ କହିଛନ୍ତି। ଶିଶୁ ଭବନରେ କ୍ରମାଗତ ଶିଶୁମୃତ୍ୟୁ ଘଟଣା ନେଇ ରାଜ୍ୟ ସରକାର ଉପରେ ବର୍ଷିଛନ୍ତି ବିଜୟ। ସେ ଅଭିଯୋଗ କରିଛନ୍ତି ଯେ, ଶିଶୁମୃତ୍ୟୁ ସଂଖ୍ୟା ବଢି ଚାଲୁଥିଲେ ହେଁ, ରାଜ୍ୟ ସରକାର ନୀରବ ସାଜିଛନ୍ତି। ତା'ସହ ଆବଶ୍ୟକ ଡାକ୍ତରୀ ପଦବୀ ପୂରଣ କରାଯାଉ ନାହିଁ।