ବିଗିଡ଼ି ଗଲାଣି ଆଇନ୍‌ ଶୃଙ୍ଖଳା: ପ୍ରତିଦିନ ଦୁଷ୍କର୍ମରେ ଶିକାର ହେଉଛନ୍ତି ୬ ମହିଳା

<p>ଭୁବନେଶ୍ୱର(ଓଡ଼ିଶା ରିପୋର୍ଟର): ବିଗିଡ଼ି ଗଲାଣି ରାଜ୍ୟର ଆଇନ ଶୃଙ୍ଖଳା ସ୍ଥିତି। ଦିନକୁ ୬ଜଣ ମହିଳା ଦୁଷ୍କର୍ମର ଶିକାର ହେଉଛନ୍ତି। ଗୃହ ବିଭାଗର ଶ୍ୱେତପତ୍ର ତଥ୍ୟ ଅନୁଯାୟୀ, ୨୦୧୭ରେ ପଞ୍ଜୀକୃତ ହୋଇଛି ମୋଟ୍ ୨,୨୨୧ଟି ଦୁଷ୍କର୍ମ ମାମଲା। ସେଥିମଧ୍ୟରୁ ମାତ୍ର ୧୪୦୧ଟି ମାମଲାରେ ଚାର୍ଜସିଟ୍ ଦାଖଲ ହୋଇଛି। ଏହାର ଅର୍ଥ ୩୭ ପ୍ରତିଶତ ମାମଲାରେ ପୋଲିସ୍ ଅଭିଯୋଗ ଫର୍ଦ୍ଦ ଦାଖଲ କରିପାରି ନାହିଁ। ୨୦୧୬ ତୁଳନାରେ ରାଜ୍ୟରେ ଦୁଷ୍କର୍ମ ବଢିଛି।</p> <p>ଥାନାକୁ ଆସିଥିବା ୫,୫୬୨ଟି ଯୌତୁକ ଜନିତ ମାମଲାରୁ କେବଳ ୩ ହଜାର ୩୪୭ ମାମଲାରେ ଦାଖଲ ହୋଇଛି ଚାର୍ଜସିଟ୍। ହତ୍ୟା ମାମଲାରେ ମଧ୍ୟ ପୋଲିସକୁ ଆଖି ଦୃଶିଆ ସଫଳତା ମିଳିନାହିଁ। ରୁଜୁ ହୋଇଥିବା ମୋଟ୍ ୧୨୬୭ଟି ହତ୍ୟା ମାମଲାରୁ ମାତ୍ର ୬୪୩ଟିରେ ଚାର୍ଜସିଟ୍ ଦାଖଲ କରିପାରିଛି ପୋଲିସ୍। ଏହାର ଅର୍ଥ ପାଖାପାଖି ୫୦ ପ୍ରତିଶତ ମାମଲାରେ ପୋଲିସ୍ ହତ୍ୟାକାରୀ ବିରୋଧରେ ପ୍ରମାଣ ଯୋଗାଡ଼ କରିପାରି ନାହିଁ।</p> <p>ଗତବର୍ଷରେ ଚୋରି, ଡକାୟତି, ଲୁଟ୍ ଘଟଣା କିଛି କମ୍ ନୁହେଁ। ପୋଲିସ୍ ପାଟ୍ରୋଲିଂକୁ ଫୁ କରି ଦୁର୍ବୃତ୍ତମାନେ ମନଇଚ୍ଛା ଅପରାଧ ଘଟାଇଛନ୍ତି। ବର୍ଷକ ମଧ୍ୟରେ ଘଟିଛି ୫୩୪ଟି ଡକାୟତି, ୨୦୪୮ଟି ଲୁଣ୍ଠନ, ୩୯୫୩ଟି ସିନ୍ଧିଚୋରି ଓ ୯୦୮୩ଟି ଚୋରି ଘଟଣା। ଏହାର ଅର୍ଥ ଦିନକୁ ଘଟୁଛି ପାଖାପାଖି ୪୩ଟି ଲୁଟ୍&zwnj;ରାଜ ଘଟଣା।</p> <p>ଚିଟ୍&zwnj;ଫଣ୍ଡ ଭଳି ଠକେଇ ରୋକିବାକୁ କଡ଼ା ଆଇନ ଅଣାଯାଇଥିବା ସତ୍ତ୍ୱେ ଗତବର୍ଷ ବି ରାଜ୍ୟରେ ବିଭିନ୍ନ ଠକ ଅର୍ଥ ଲଗାଣକାରୀ ସଂସ୍ଥା ଲୋକଙ୍କୁ ଚୂନ ଲଗାଇଛନ୍ତି। ଏହାସହ ସଂସ୍ଥାଗୁଡ଼ିକୁ ଭାଙ୍ଗି ପଳାଇ ଯାଇଛନ୍ତି। ୨୦୧୭ରେ ଏଭଳି ୨୯୬୦ଟି ପ୍ରତାରଣା ଓ ଠକେଇ ମାମଲା ଥାନାକୁ ଆସିଛି। ଏହା ମଧ୍ୟରୁ&nbsp; ୮୨୭ଟି ମାମଲାରେ ଚାର୍ଜସିଟ୍ ଦାଖଲ ହୋଇପାରିଛି।</p> <p>ଆଜି ଗୃହ ବିଭାଗର ଖର୍ଚ୍ଚଦାବି ଆଲୋଚନା ବେଳେ ମୁଖ୍ୟମନ୍ତ୍ରୀ ଓ ସରକାରଙ୍କୁ ଟାର୍ଗେଟ କରିଥିଲେ ବିରୋଧୀ। ନାବାଳିକା ଦୁଷ୍କର୍ମ, ଖଣି ଦୁର୍ନୀତି, ଚିଟଫଣ୍ଡ, ଡାଲି ଓ ପାଣି ଦୁର୍ନୀତି କଥା ଉଠାଇ ମୁଖ୍ୟମନ୍ତ୍ରୀଙ୍କୁ ନିଶାନା କରିଥିଲେ ବିରୋଧୀ ଦଳ ନେତା। ତେବେ ଶାସକ ଦଳର ବିଧାୟକ ଯୁକ୍ତି ବାଢିଥିଲେ- ରାଜ୍ୟରେ ହତ୍ୟା, ଲୁଣ୍ଠନ, ଡକାୟତି ମାମଲା କମିଛି।</p> <p>ଲୋକାୟୁକ୍ତ ନିଯୁକ୍ତି ନେଇ ସରକାର ବିଧାନସଭା ଓ ସୁପ୍ରିମକୋର୍ଟକୁ ଠକିଛନ୍ତି ବୋଲି ଆଜି ବିଧାନସଭାରେ ଅଭିଯୋଗ କରିଥିଲେ ବିରୋଧୀ ଦଳ ନେତା ନରସିଂହ ମିଶ୍ର। ସୁପ୍ରିମକୋର୍ଟରେ ମିଥ୍ୟା ସତ୍ୟପାଠ କରାଯାଇଥିବାରୁ ଆଇନ ସଚିବଙ୍କୁ ସମନ କରିବାକୁ ଦାବି କରିଥିଲେ ନରସିଂହ।</p>