ବିଶାଖାପାଟଣା-କିରଣ୍ଡୁଲ ପାସେଞ୍ଜର ଲାଇନଚ୍ୟୁତ

କୋରାପୁଟ (ସୂର୍ଯ୍ୟନାରାୟଣ ପଣ୍ଡା): ଲାଇନ୍‌ଚ୍ୟୁତ ହୋଇଛି ବିଶାଖାପାଟଣା-ଜଗଦଲପୁର ୦୮୮୫ ପାସେଞ୍ଜର ଟ୍ରେନ୍। କୋରାପୁଟ ଜିଲ୍ଲା ଜୟପୁର ନିକଟ ଛତ୍ରିପୁଟ ପାଖରେ ଏହି ଟ୍ରେନର ୪ଟି ବଗି ଲାଇନଚ୍ୟୁତ ହୋଇଛି। ସେଥିରୁ ଗୋଟିଏ ସ୍ଲିପର କ୍ଲାସ୍ ବଗି ହୋଇଥିବା ବେଳେ ବାକି ୩ଟି ଜେନେରାଲ ବଗି। ତେବେ ଏହି ଦୁର୍ଘଟଣାରେ କିଛି କ୍ଷୟକ୍ଷତି ହୋଇ ନଥିବା ଜଣାପଡ଼ିଛି। ସମସ୍ତ ଯାତ୍ରୀ ସୁରକ୍ଷିତ ଅଛନ୍ତି।

ସୋମବାର ଅପରାହ୍ଣ ପ୍ରାୟ ୨ଟା ବେଳେ ଏହି ଘଟଣା ଘଟିଛି। ତେବେ କିପରି ଏହି ଘଟଣା ଘଟିଲା, ତାହା ଜଣାପଡ଼ିନି। ଟ୍ରେନ୍ ଲାଇନ୍‌ଚ୍ୟୁତ ହେବା ପରେ ସେଠାରେ ଜୟପୁର ଓ ଛତ୍ରିପୁଟ ରେଳ ଷ୍ଟେସନର ରେଳ ଅଧିକାରୀ ଓ କର୍ମଚାରୀମାନେ ପହଞ୍ଚିଛନ୍ତି। ମରାମତି କାମ ଆରମ୍ଭ ହୋଇଛି। ଫସିଥିବା ଯାତ୍ରୀଙ୍କୁ ଗନ୍ତବ୍ୟସ୍ଥଳରେ ପହଞ୍ଚାଇବା ପାଇଁ ବିକଳ୍ପ ବ୍ୟବସ୍ଥା କରାଯାଉଛି ବୋଲି ରେଳବାଇ ପକ୍ଷରୁ କୁହାଯାଇଛି।

ଏହି ଘଟଣାରେ ଦୁଇ ଜଣ ରେଳ କର୍ମଚାରୀକୁ ନିଲମ୍ବନ କରାଯାଇଛି। ସେମାନଙ୍କ ମଧ୍ୟରୁ ଜଣେ ଗ୍ୟାଙ୍ଗମ୍ୟାନ୍ ହୋଇଥିବା ବେଳେ ଅନ୍ୟ ଜଣେ ହେଉଛନ୍ତି ସେକ୍ସନ ଇଞ୍ଜିନିୟର। ଏହି ଦୁଇ ଜଣଙ୍କୁ ନିଲମ୍ବନ କରାଯାଇଥିବା ନେଇ ଡିଆର୍‌ଏମ୍ ଅନୁପ ଶତପଥୀ ସୂଚନା ଦେଇଛନ୍ତି।

 

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।