ଜଣେ କାମ କରିବ, ଆଉ ଜଣେ ବାହାବା ନେବ: ବୈଜୟନ୍ତ

ସାଲେପୁର(ଓଡ଼ିଶା ରିପୋର୍ଟର): କଟକ ଜିଲ୍ଲା ସାଲେପୁର ବ୍ଲକ୍ ମହାଜନପୁରରେ ପାନୀୟ ଜଳ ପ୍ରକଳ୍ପ ଉଦ୍‌ଘାଟନ କରିଛନ୍ତି କେନ୍ଦ୍ରାପଡ଼ା ସାଂସଦ ବୈଜୟନ୍ତ ପଣ୍ଡା। ସାଂସଦ ପାଣ୍ଠିରେ ନିର୍ମିତ ଏହି ପାଣି ଟାଙ୍କି ଉଦ୍‌ଘାଟନ କାର୍ଯ୍ୟକ୍ରମରେ ସାଂସଦଙ୍କ ସହ ଯୁବନେତା ପ୍ରଫୁଲ୍ଲ ସ୍ୱାଇଁ ଓ ଶତାଧତ୍କ କର୍ମୀ ସାମିଲ ହୋଇଥିଲେ। ସାଂସଦଙ୍କ ଦ୍ୱାରା ଆଜି ଏହି ପାଣି ଟାଙ୍କିର ବିଧିବଦ୍ଧ ଉଦଘାଟନ କାର୍ଯ୍ୟକ୍ରମ ଥିଲେ ବି ଗତକାଲି ସାଲେପୁର ବ୍ଲକ ଉପାଧ୍ୟକ୍ଷ ରମେଶ ଜେନା ଏହାକୁ ଆଗୁଆ ଉଦ୍‌ଘାଟନ କରିଥିଲେ।

ପାଣି ଟାଙ୍କି ଉଦ୍‌ଘାଟନ ପରେ ସାଂସଦ ବୈଜୟନ୍ତ ପଣ୍ଡା ପ୍ରତିକ୍ରିୟା ରଖିଛନ୍ତି।

ସେ କହିଛନ୍ତି,“ ଜଣେ କାମ କରିବ, ଆଉ ଜଣେ ବାହାବା ନେବ ଏବେ ଏହା ପରମ୍ପରା ହୋଇଯାଇଛି। ତୁଛା ବାହାବା ନେବାକୁ ଏବେ କିଛି ଲୋକ ବେନିୟମ କାମ କରୁଛନ୍ତି। ସାଂସଦ ପାଣ୍ଠିରେ ପାଣି ଟାଙ୍କି ନିର୍ମିତ ହୋଇଥିବାରୁ  ସାଂସଦ ଉପସ୍ଥିତ ରହିବା ଦରକାର। ଏହା ସରକାରୀ ପ୍ରକଳ୍ପ ହୋଇଥିବାରୁ ସରକାର ଏଥିପାଇଁ ସୁରକ୍ଷା ଦେବା କଥା। ଲୋକ ଜାଣିଛନ୍ତି କିଏ ପାଣି ଯୋଗାଉଛି କିଏ ପାଣି ଅଟକାଉଛି। ମୋର କିଛି ଆପତ୍ତି ନାହିଁ, ମୋର ଉଦ୍ଦେଶ୍ୟ ଲୋକେ ପାଣି ପାଆନ୍ତୁ।”