ଏସୀୟ କ୍ରୀଡ଼ାରେ ଇତିହାସ ରଚିଲା ଭାରତୀୟ ପୁରୁଷ ବ୍ୟାଡମିଣ୍ଟନ ଟିମ୍‌

ଚଳିତ ଏସୀୟ କ୍ରୀଡ଼ରେ ଇତିହାସ ରଚିଛି ଭାରତୀୟ ପୁରୁଷ ବ୍ୟାଡମିଣ୍ଟନ ଦଳ। ଏସୀୟ କ୍ରୀଡ଼ା ଇତିହାସରେ ପ୍ରଥମ ଥର ପାଇଁ ବ୍ୟାଡମିଣ୍ଟନର ପୁରୁଷ ଟିମ୍ ଇଭେଣ୍ଟରେ ଭାରତୀୟ ଦଳ ଫାଇନାଲରେ ପ୍ରବେଶ କରିଛି।

ଆଜି କୋରିଆ ଭଳି ଶକ୍ତିଶାଳୀ ଟିମ୍‌କୁ ୩-୨ରେ ପରାସ୍ତ କରି ଭାରତ ଏହି ଇଭେଣ୍ଟର ଫାଇନାଲରେ ପ୍ରବେଶ କରିଛି। ଦଳ ଆସନ୍ତାକାଲି ଫାଇନାଲରେ ଚୀନକୁ ଭେଟିବ।

ଭାରତକୁ ଫାଇନାଲରେ ପହଞ୍ଚାଇବାରେ ମୁଖ୍ୟ ଭୂମିକା ଗ୍ରହଣ କରିଥିଲେ କିଦାମ୍ବି ଶ୍ରୀକାନ୍ତ। ସେମି ଫାଇନାଲରେ ଭାରତ ଦ୍ୱିତୀୟ ପୁରୁଷ ଡବଲ୍ସ ମ୍ୟାଚ୍‌ରେ ହାରିଯିବା ପରେ ୨-୨ରେ ପ୍ରତିଯୋଗିତା ଟାଇ ରହିଥିଲା। ଏହା ପରେ ସବୁ କିଛି ନିର୍ଭର କରୁଥିଲା ଶ୍ରୀକାନ୍ତଙ୍କ ଉପରେ। ସେ ଭେଟିଥିଲେ ବିଶ୍ୱର ୧୬୩ ନମ୍ବର ମାନ୍ୟତାପ୍ରାପ୍ତ ଚୋ ଜିଓନୀଓପଙ୍କୁ।

ବିଶ୍ୱର ୨୧ ନମ୍ବର ମାନ୍ୟତାପ୍ରାପ୍ତ ଶ୍ରୀକାନ୍ତଙ୍କ ପାଇଁ ଏହା ସହଜ ହେବ ବୋଲି ମନେ ହେଉଥିଲା। କିନ୍ତୁ ପ୍ରଥମରୁ ଚୋ ଦେଇଥିଲେ ବଡ଼ ଧକ୍କା। ପ୍ରଥମ ଗେମ୍ ହାରିଯାଇଥିଲେ ଶ୍ରୀକାନ୍ତ। ଚୋ ତାଙ୍କୁ ୨୧-୧୨ରେ ପରାସ୍ତ କରିଥିଲେ। ତେବେ ଶ୍ରୀକାନ୍ତ ଲୟକୁ ଫେରିଥିଲେ ଓ ପରବର୍ତ୍ତୀ ଦୁଇଟି ଗେମ୍‌କୁ ୨୧-୧୬ ଓ ୨୧-୧୪ରେ ଜିତି ଥିଲେ।

ଚୀନର ହାଙ୍ଗଝୌରେ ଚାଲିଥିବା ଏସୀୟ କ୍ରୀଡ଼ାରେ ଭାରତ ୩୮ଟି ପଦକ ଜିତି ସାରିଲାଣି। ତା’ମଧ୍ୟରେ ୧୦ଟି ସ୍ୱର୍ଣ୍ଣ ପଦକ ରହିଥିବା ବେଳେ ୧୪ଟି ଲେଖାଏଁ ରୌପ୍ୟ ଓ ବ୍ରୋଞ୍ଜ ପଦକ ରହିଛି।