ନୂଆଦିଲ୍ଲୀ: ଏସିଆ କପ୍ ଇତିହାସର ସବୁଠାରୁ ସଫଳ ଟିମ୍ ଭାବେ ଭାରତ ଏପର୍ଯ୍ୟନ୍ତ ସାତଥର ଟାଇଟଲ୍ ଜିତିସାରିଛି। ଆଜକୁ ଠିକ୍ ୨୫ ବର୍ଷ ତଳେ ଅର୍ଥାତ୍ ଏପ୍ରିଲ୍ ୧୪, ୧୯୯୫ରେ ଭାରତ ଚତୁର୍ଥଥର ଏସିଆ କପ୍ ଟାଇଟଲ୍ ଜିତିଥିଲା। ଶାରଜାରେ ମହମ୍ମଦ ଆଝାରୁଦ୍ଦିନଙ୍କ ନେତୃତ୍ୱରେ ଭାରତ ଫାଇନାଲରେ ଶ୍ରୀଲଙ୍କାକୁ ୮ ୱିକେଟରେ ହରାଇ ପୁଣିଥରେ ଦବବଦା କାଏମ୍ ରଖିଥିଲା।
ଏହା ପୂର୍ବରୁ ଭାରତ ୧୯୮୪ ଏସିଆ କପର ପ୍ରଥମ ସଂସ୍କରଣ ଜିତିବା ପରେ ୧୯୮୮ ଏବଂ ୧୯୯୦/୯୧ରେ ମଧ୍ୟ ଏହି ଟାଇଟଲ୍ କବଜା କରିଥିଲା। ତେବେ ୧୯୮୬ରେ ଶ୍ରୀଲଙ୍କାରେ ଆୟୋଜିତ ଏହି ଟୁର୍ଣ୍ଣାମେଣ୍ଟରେ ଭାରତ ଭାଗ ନେଇନଥିଲା। ସେହି ସମୟରେ ଶ୍ରୀଲଙ୍କା ସହ କ୍ରିକେଟ୍ ତିକ୍ତତା ଯୋଗୁ ଭାରତ ଟୁର୍ଣ୍ଣାମେଣ୍ଟରୁ ନାଁ ପ୍ରତ୍ୟାହାର କରିନେଇଥିଲା ଏବଂ ଏହା ବଦଳରେ ବାଂଲାଦେଶକୁ ସାମିଲ୍ କରାଯାଇଥିଲା।
#OnThisDay in 1995, India won their fourth Asia Cup title 🏆
They restricted Sri Lanka to 230/7 in the final in Sharjah, and chased it down with eight wickets to spare 👏 pic.twitter.com/8HAWZqmcH0
— ICC (@ICC) April 14, 2020
ଏସିଆ କପରେ ଶତପ୍ରତିଶତ ପ୍ରଦର୍ଶନ ରଖିଥିବା ଭାରତୀୟ ଟିମ୍ ୧୯୯୫ରେ ଟାଇଟଲ୍ କବଜା କରିଥିଲା। ଫାଇନାଲ୍ ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଶ୍ରୀଲଙ୍କା ଟିମ୍ ନିର୍ଦ୍ଧାରିତ ୫୦ ଓଭରରେ ୭ ୱିକେଟ୍ ହରାଇ ୨୩୦ ରନ୍ କରିଥିଲା। ଭାରତ ଏହି ଲକ୍ଷ୍ୟକୁ ୪୧.୫ ଓଭରରେ ୨ ୱିକେଟ୍ ହରାଇ ହାସଲ କରିନେଇଥିଲା ଏବଂ ପୁଣିଥରେ ଏସିଆର ବିଜେତା ହୋଇଥିଲା।
ଓପ୍ନର ମନୋଜ ପ୍ରଭାକର (୯) ଓ ସଚିନ ତେନ୍ଦୁଲକର (୪୧) ଭାରତକୁ ଭଲ ଆରମ୍ଭ ଦେଇଥିଲେ। ତେବେ ମଧ୍ୟକ୍ରମରେ କ୍ୟାପଟେନ୍ ଆଝାରୁଦ୍ଦିନ ଓ ନବଜୋତ୍ ସିଂହ ସିଦ୍ଧୁ ଦମଦାର ବ୍ୟାଟିଂ କରି ଭାରତକୁ ବିଜୟୀ କରାଇଥିଲେ। ଦୁହେଁ ଅପରାଜିତ ୧୭୫ ରନର ଭାଗୀଦାରୀ କରିଥିଲେ। ସିଦ୍ଧୁ ୧୦୬ ବଲରେ ୫ ଚୌକା ସହ ୮୪ ଓ ଆଝାରୁଦ୍ଦିନ ୮୯ ବଲରେ ୫ ଚୌକା ଓ ୨ ଛକା ସହ ୯୦ ରନ୍ କରି ଅପରାଜିତ ଥିଲେ।