ଲକ୍ଷ୍ନୌ: ଆଫଗାନିସ୍ତାନ ଓ ୱେଷ୍ଟଇଣ୍ଡିଜ୍ ମଧ୍ୟରେ ଏଠାରେ ଖେଳାଯାଇଥିବା ଏକମାତ୍ର ଟେଷ୍ଟ ଅଢ଼େଇ ଦିନରେ ଶେଷ ହୋଇଛି। ବୋଲରଙ୍କ ଦମଦାର ପ୍ରଦର୍ଶନ ବଳରେ ୱେଷ୍ଟଇଣ୍ଡିଜ୍ ଏହି ମ୍ୟାଚକୁ ୯ ୱିକେଟରେ ଜିତି ନେଇଛି। ଆଫଗାନିସ୍ତାନ ଦ୍ୱାରା ଧାର୍ଯ୍ୟ ୩୧ ରନର ବିଜୟଲକ୍ଷ୍ୟକୁ ୱେଷ୍ଟଇଣ୍ଡିଜ୍ ୬.୨ ଓଭରରେ ୧ ୱିକେଟ୍ ହରାଇ ହାସଲ କରିନେଇଛି। କାର୍ଲସ୍ ବ୍ରାଥୱେଟ୍ (୮) ଏକମାତ୍ର ବ୍ୟାଟ୍ସମ୍ୟାନ୍ ଭାବେ ଆଉଟ୍ ହୋଇଥିବା ବେଳେ ଜନ୍ କ୍ୟାମ୍ପବେଲ୍ (୧୯) ଓ ଶାଇ ହୋପ୍ (୬) ଅପରାଜିତ ଥିଲେ। ଆଫଗାନିସ୍ତାନର ଆମୀର ହମଜା ଗୋଟିଏ ୱିକେଟ୍ ନେଇଥିଲେ।
ତୃତୀୟ ଦିବସରେ ୧୦୯/୭ରୁ ଖେଳ ଆରମ୍ଭ କରିଥିବା ଆଫଗାନିସ୍ତାନ ଆଉ ୧୧ ରନ୍ ଯୋଡ଼ି ଅଲଆଉଟ୍ ହୋଇଥିଲା। ଆଫଗାନିସ୍ତାନ ପକ୍ଷରୁ ଜାଭେଦ୍ ଅହମ୍ମଦି ସର୍ବାଧିକ ୬୨ ରନ୍ କରିଥିବାବେଳେ ଇବ୍ରାହିମ୍ ଜର୍ଦ୍ଦାନ୍ ୨୩ ଓ ନାସିର୍ ଜମାଲ୍ ୧୫ ରନ୍ କରିଥିବା ବେଳେ ଅନ୍ୟକୌଣସି ବ୍ୟାଟ୍ସମ୍ୟାନ୍ ଦୁଇଅଙ୍କ ଛୁଇଁପାରିନଥିଲେ।
ଇଣ୍ଡିଜର ରାକୀମ କର୍ନୱାଲ୍, କ୍ୟାପଟେନ୍ ଜେସନ୍ ହୋଲ୍ଡର ଓ ରୋଷ୍ଟନ୍ ଚେଜ୍ ୩ଟି ଲେଖାଏ ୱିକେଟ୍ ପାଇଥିଲେ। ଏହି ମ୍ୟାଚରେ ଆଫଗାନିସ୍ତାନ ଉଭୟ ଇନିଂସରେ ଯଥାକ୍ରମେ ୧୮୭ ଓ ୧୨୦ ରନ୍ କରିଥିବା ବେଳେ ଇଣ୍ଡିଜ୍ ପ୍ରଥମ ଇନିଂସରେ ୨୮୮ ରନ୍ କରିଥିଲା। ମ୍ୟାଚରେ ମୋଟ ୧୦ ୱିକେଟ୍ ନେଇଥିବା କର୍ନୱାଲ୍ ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ ହୋଇଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
