ଯାଜପୁର: ଗୁରୁଜୀଙ୍କୁ ମାଡ଼ ମାରି ଯୁବକ ଗିରଫ

ଯାଜପୁର: ଭୁବନେଶ୍ୱର ଧର୍ମବିହାର ଶିଶୁମନ୍ଦିର ଗୁରୁଜୀ ଓ ବସ୍‌ ଚାଳକଙ୍କୁ ଆକ୍ରମଣ ଘଟଣାରେ ଯାଜପୁର ଜିଲ୍ଲା ବରୀ ପୋଲିସ୍‌ ଆଜି ଅଭିଯୁକ୍ତକୁ ଗିରଫ କରିଛି। ତେବେ ଅନ୍ୟ ଦୁଇ ଜଣ ଫେରାର ହୋଇଯାଇଛନ୍ତି। ସେମାନଙ୍କୁ ଗିରଫ କରିବା ପାଇଁ ପୋଲିସ୍‌ ବିଭିନ୍ନ ସ୍ଥାନରେ ଚଢ଼ାଉ ଚଳାଇଛି।

ଆଜି ଶିଶୁ ମନ୍ଦିର ଛାତ୍ରଛାତ୍ରୀ, ଗୁରୁଜୀ ଓ ଗୁରୁମା’ମାନେ ଯାଜପୁର ରତ୍ନଗିରିକୁ ପିକ୍‌ନିକ୍‌ କରିବାକୁ ଯାଇଥିଲେ। ଏହି ସମୟରେ ୩ ଜଣ ଯୁବକ ବସ୍‌ ଚାଳକଙ୍କୁ ମାଡ଼ ମାରିଥିଲେ। ତେବେ ଗୁରୁଜୀ ଭଗବାନ ମୁଦୁଲି ସେମାନଙ୍କୁ ବିରୋଧ କରିବାରୁ ଯୁବକମାନେ ଏକ ବୋତଲରେ ତାଙ୍କୁ ଆକ୍ରମଣ କରିଥିଲେ। ଫଳରେ ଗୁରୁଜୀ ମୁଦୁଲି ଗୁରୁତର ଆହତ ହୋଇଥିଲେ। ତାଙ୍କୁ ବରୀ ମଡ଼ିକାଲରେ ଭର୍ତ୍ତି କରାଯାଇଥିଲା। ଅଭିଯୁକ୍ତଙ୍କ ଗିରଫ ଦାବିରେ ଗୁରୁଜୀ, ଗୁରୁମା’ ଓ ଛାତ୍ରଛାତ୍ରୀମାନେ ରତ୍ନଗିରି ଓ କୃଷ୍ଣଦାସପୁର ରାସ୍ତା ଅବରୋଧ କରିଥିଲେ। ଖବର ପାଇ ବରୀ ପୋଲିସ୍‌ ଅଭିଯୁକ୍ତ କ୍ଷୀରୋଦ ସାମଲଙ୍କୁ ଗିରଫ କରିବା ପରେ ରାସ୍ତରୋକ ପ୍ରତ୍ୟାହୃତ ହୋଇଥିଲା।