ଦାଦାବଟି ପାଇଁ ବୋମା ମାଡ଼ ଘଟଣାରେ ୫ ଗିରଫ

ପଟ୍ଟାମୁଣ୍ଡାଇ: ଦାଦାବଟି ପାଇଁ ବୋମା ମାଡ ଘଟଣାରେ କେନ୍ଦ୍ରାପଡା ପୋଲିସ ଆଜି ୫ଜଣକୁ ଗିରଫ କରି କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ ମାହାଙ୍ଗା ଥାନାର ସେକ୍‌ ବସିର୍‌ ଅଲ୍ଲୀ, ସେକ‌ ସନ୍ନି, ବାଲିଚନ୍ଦ୍ରପୁର ଥାନା ଅଞ୍ଚଳର ସେକ‌ ଜୁମ୍ମା, ପଟ୍ଟାମୁଣ୍ଡାଇ ଥାନା ଅଞ୍ଚଳର ମହମ୍ମଦ ଫିରଦୋଷ ଓରଫ ସେକ ପପୁ ଓ କେନ୍ଦ୍ରାପଡା ଥାନା ଅଞ୍ଚଳର ସେକ ସାଜିଦ ଓରଫ ଗେଡୁ ମାମା।

ଗତମାସ ୨୪ ତାରିଖ ରାତି ୯ଟା ବେଳେ ପଟ୍ଟାମୁଣ୍ଡାଇ ଡାକବଙ୍ଗଳା ଛକ ନିକଟସ୍ଥ ଏକ ଲୁଗା ଦୋକାନ ଉପରେ ଦୁଇ ଜଣ ଯୁବକ ନାଲି ପଲସରରେ ଆସି ୨ଟି ବୋମା ଫିଙ୍ଗି ପଳାଇ ଯାଇଥିଲେ। ଏନେଇ ଅଭିଯୋଗ ହେବା ପରେ ପୋଲିସ୍‌ ବିଭିନ୍ନ ସ୍ଥାନରେ ଚଢ଼ାଉ କରି ଅଭିଯୁକ୍ତଙ୍କୁ ଗିରଫ କରିବା ସହିତ ଦୁଇଟି ବାଇକ୍‌ ଓ ୫ଟି ମୋବାଇଲ ଜବତ କରିଥିଲା।

ଏମାନଙ୍କ ବିରୁଦ୍ଧରେ ୨୦୧୬ ମସିହାରେ ପଟ୍ଟାମୁଣ୍ଡାଇରେ ୪ଟି ସ୍ଥାନରେ ହୋଇଥିବା ବୋମା ମାଡ଼ ଘଟଣା, ଆଳି ଥାନା ପତ୍ରପୁର ଓ ମାହାଙ୍ଗା ଥାନା ଅଞ୍ଚଳରେ ଦାଦାବଟି ପାଇଁ ଧମକ ଦେବା ଅଭିଯୋଗ ରହିଛି ବୋଲି କେନ୍ଦ୍ରାପଡା ଏସ୍‌ପି ଦୟାନିଧି ଗୋଚ୍ଛାୟତ ଆଜି ଏକ ସାମ୍ୱାଦିକ ସମ୍ମିଳନୀରେ କହିଛନ୍ତି।