ବାଲେଶ୍ୱର: ପିଡିଏସ୍ ସାମଗ୍ରୀ ନ ମିଳିବାରୁ ଉତ୍ତ୍ୟକ୍ତ ଲୋକଙ୍କ ଥାନା ଘେରାଉ

ବାଲେଶ୍ୱର: ବାଲେଶ୍ୱର ଜିଲ୍ଲା ନଟାପଡ଼ା ପଞ୍ଚାୟତର ଶତାଧିକ ହିତାଧିକାରୀ ୨ ମାସ ଧରି ପିଡିଏସ୍ ସାମଗ୍ରୀ ନ ମିଳିବାରୁ ଗତକାଲି ଉତ୍ତ୍ୟକ୍ତ ଲୋକେ ସୋର ଥାନା ଘେରାଉ କରିଥିଲେ। ସେମାନଙ୍କୁ ୨ ମାସ ହେଲା ଯୋଗାଣ ସାମଗ୍ରୀ ମିଳି ନ ଥିବାବେଳେ ସ୍ଥାନୀୟ ସିଆଳ ଗୋଠ ସେଣ୍ଟରରୁ ୨ଟି ପିଡିଏସ୍ ଚାଉଳ ବୋଝେଇ ଟ୍ରକ୍ ଆସୁଥିବା ଜାଣି ଏହାକୁ ଅଟକାଇ ଥିଲେ। ଯାହାକୁ ନେଇ ସେଠାରେ ଉତ୍ତେଜନା ପ୍ରକାଶ ପାଇଥିଲା। ଏପରିକି ବୁଝାସୁଝା ପାଇଁ ଯାଇଥିବା ଯୋଗାଣ ଅଧିକାରୀଙ୍କୁ ମଧ୍ୟ ଲୋକେ ଘେରାଉ କରି ରଖିଥିଲେ। ଏହା ପରେ ସେମାନେ ଜାତୀୟ ରାଜପଥ ଅବରୋଧ କରିବା ସହ ଥାନା ଘେରାଉ କରିଥିଲେ। ଖବର ପାଇ ବାଲେଶ୍ୱର ଏଡିଏମ୍ ଓ ସିଏସ୍ଓ ଘଟଣାସ୍ଥଳରେ ପହଞ୍ଚି ପ୍ରତିଶୃତି ଦେବା ପରେ ଧାରଣା ହଟିଥିଲା।