କଳାହାଣ୍ଡି: ପ୍ରଦୂଷିତ ଜଳ ଯୋଗୁ ବ୍ୟାପୁଛି ଜଣ୍ଡିସ

ଧର୍ମଗଡ଼: କଳାହାଣ୍ଡି ଜିଲ୍ଲା ଗୋଲାମୁଣ୍ଡା ବ୍ଲକରେ ଜଣ୍ଡିସ ଆତଙ୍କ ଦେଖାଦେଇଛି । ଗୋଟିଏ ପରେ ଗୋଟିଏ ଗାଁକୁ ଜଣ୍ଡିସ ବ୍ୟାପିବାରେ ଲାଗିଛି । ଦୂଷିତ ଜଳ ଯୋଗୁ ଜଣ୍ଡିସ ବ୍ୟାପୁଥିବା ଅଞ୍ଚଳବାସୀ ଅଭିଯୋଗ କରିଛନ୍ତି । ବିଶେଷ କରି ଖମାର ହଳଦୀ ଓ ଡଙ୍ଗରପଡା ଗ୍ରାମରେ ଜଣ୍ଡିସ ବ୍ୟାପିଥିବା ଅଭିଯୋଗ ହୋଇଛି । ଖମାର ହଳଦୀ ଗାଁର ୨ଜଣ ଓ ଡଙ୍ଗରପଡା ଗାଁର ୧୦ଜଣ ଜଣ୍ଡିସ ଆକ୍ରାନ୍ତ ହୋଇଥିବା ଉପଖଣ୍ଡ ଚିକିତ୍ସା ଅଧିକାରୀ କହିଛନ୍ତି । ଦୂଷିତ ଜଳ ହିଁ ଜଣ୍ଡିସ ବ୍ୟାପିବାର କାରଣ ବୋଲି ଉପଖଣ୍ଡ ଚିକିତ୍ସା ଅଧିକାରୀ କହିଛନ୍ତି । ସରକାର ସମସ୍ତଙ୍କ ପାଖରେ ଶୁଦ୍ଧ ପାଣି ଯୋଗାଇ ଦେବାକୁ ଯୋଜନା କରୁଛନ୍ତି । ମାତ୍ର କଳାହାଣ୍ଡି ଜିଲ୍ଲାରେ ଏପରି ବହୁ ଅଞ୍ଚଳ ଅଛି ଯେଉଁଠି ଆଜି ବି ଲୋକେ ନାଳ, ପୋଖରୀ ପାଣି ବ୍ୟବହାର କରୁଛନ୍ତି । ଫଳରେ ଜଣ୍ଡିସ ବ୍ୟାପୁଥିବା ଅଭିଯୋଗ ହେଉଛି । ସ୍ଥିତି ଏପରି ହୋଇଛି ଯେ, ବିଭିନ୍ନ ଗାଁରେ ଜଣ୍ଡିସ ବ୍ୟାପି ୪୦ରୁ ଊର୍ଦ୍ଧ୍ୱ ଶିଶୁଙ୍କ ସମେତ ବହୁ ଲୋକ ଆକ୍ରାନ୍ତ ହୋଇଥିବା ଅଭିଯୋଗ ହେଉଛି ।