ମସ୍କୋ: ରୁଷ୍ରେ ଏକ ଯାତ୍ରୀବାହୀ ବିମାନରେ ନିଆଁ ଲାଗିଯିବା ଯୋଗୁ ୪୧ ଜଣ ଜୀବନ୍ତଦଗ୍ଧ ହୋଇ ଯାଇଛନ୍ତି। ସେମାନଙ୍କ ମଧ୍ୟରେ ଜଣେ ବିମାନ କର୍ମଚାରୀ ଓ ଦୁଇ ଜଣ ଶିଶୁ ଥିବା ଜଣାପଡ଼ିଛି। ରବିବାର ସନ୍ଧ୍ୟାରେ ଏହି ଘଟଣା ଘଟିଛି।
ଏରୋଫ୍ଲୋଟ୍ ଦ୍ୱାରା ପରିଚାଳିତ ଏହି ରୁଷିଆ ନିର୍ମିତ ସୁଖୋଇ ସୁପରଜେଟ୍ ବିମାନଟି ଶେରେମେତ୍ୟେଭୋରୁ ମୁରମନସ୍କ ଅଭିମୁଖେ ଯାତ୍ରା କରୁଥିଲା। ବିମାନରେ କ୍ର୍ୟୁ ମେମ୍ବରଙ୍କୁ ମିଶାଇ ମୋଟ ୭୮ ଜଣ ଥିଲେ। ସେମାନଙ୍କ ମଧ୍ୟରେ କିଛି ଛୋଟ ଛୁଆ ବି ଥିଲେ। ବିମାନଟି ଉଡ଼ାଣ ଭରିବାର କିଛି ସମୟ ପରେ ଏହା ପୁଣି ଶେରେମେତ୍ୟେଭୋରେ ଏମର୍ଜେନ୍ସୀ ଲ୍ୟାଣ୍ଡିଂ କରିଥିଲା। ତେବେ ଏହା ଠିକ୍ ଭାବେ ଅବତରଣ କରିପାରି ନଥିଲା। ଅବତରଣ ବେଳେ ବିମାନରେ ବିସ୍ଫୋରଣ ହୋଇଥିଲା ଓ ଏଥିରେ ନିଆଁ ଲାଗି ଯାଇଥିଲା।
ଏରୋଫ୍ଲୋଟ୍ ପକ୍ଷରୁ କୁହାଯାଇଛି ଯେ, ଯାନ୍ତ୍ରିକ ତ୍ରୁଟି ଯୋଗୁ ବିମାନଟି ଜରୁରୀ ଅବତରଣ କରିବାକୁ ବାଧ୍ୟ ହୋଇଥିଲା। ତେବେ ଅବତରଣ କରିବା ମାତ୍ରେ ଏଥିରେ ନିଆଁ ଲାଗି ଯାଇଥିଲା।
ବିମାନରେ ନିଆଁ ଲାଗିଯିବା ସତ୍ତ୍ୱେ ୩୭ ଜଣଙ୍କୁ ଉଦ୍ଧାର କରାଯାଇଥିଲା। ବିମାନବନ୍ଦର ପକ୍ଷରୁ କୁହାଯାଇଛି ଯେ କିଛି ଯାତ୍ରୀ ସେମାନଙ୍କ ହ୍ୟାଣ୍ଡ୍ ଲଗେଜ୍ ଆଣିବାକୁ ଚେଷ୍ଟା କରିଥିଲେ। ଫଳରେ ସେମାନେ ବିମାନରୁ ବାହାରିବାରେ ବିଳମ୍ବ ହୋଇଥିଲା।
ବିମାନଟି ଜଳୁଥିବାର ଭିଡିଓ ଏବେ ସୋଶାଲ୍ ମିଡିଆରେ ଭାଇରାଲ୍ ହେଉଛି।
ରୁଷ୍ରେ ବିମାନସେବା ଭାରି ଅସୁରକ୍ଷିତ। ଅନ୍ତର୍ଜାତୀୟ ବେସାମରିକ ବିମାନ ଚଳାଚଳ ସଂଗଠନର ରିପୋର୍ଟ ଅନୁଯାୟୀ, ୨୦୧୮ ଓ ୨୦୧୭ରେ ଏଠାରେ ବିମାନ ଦୁର୍ଘଟଣାରେ ୩୨୬ ଜଣଙ୍କ ମୃତ୍ୟୁ ଘଟିଛି। ଏହି ସମୟ ମଧ୍ୟରେ ଆମେରିକୀୟ ବିମାନ ଦୁର୍ଘଟଣାରେ ୬୧ ଜଣଙ୍କ ମୃତ୍ୟୁ ଘଟିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
