ସର୍ଦ୍ଦାର ପଟେଲଙ୍କ ଜୟନ୍ତୀ ଅବସରରେ ଘୋଷଣା ହେଲା ନୂଆ ଯୋଜନା ‘ଏକ ଭାରତ, ଶ୍ରେଷ୍ଠ ଭାରତ’

ନୂଆଦିଲ୍ଲୀ: ଲୌହ ମାନବ ସର୍ଦ୍ଦାର ବଲ୍ଲଭ ଭାଇ ପଟେଲ ଭାରତକୁ ଏକତା ସୂତ୍ରରେ ବାନ୍ଧି ରଖିଥିଲେ। ତାଙ୍କର ଏହି ମହାନ କାର୍ଯ୍ୟକୁ ମନେ ପକାଇବା ଯୁବପୀଢ଼ିଙ୍କ ଦାୟିତ୍ୱ। ସର୍ଦ୍ଦାର ପଟେଲଙ୍କ ୧୪୦ତମ ଜନ୍ମ ଜୟନ୍ତୀକୁ ଏକତା ଦିବସ ଭାବେ ସାରା ଦେଶ ପାଳନ କରୁଛି।  ଆଜି ଏହି ଅବସରରେ ପ୍ରଧାନମନ୍ତ୍ରୀ ମୋଦି ରାଜ୍ୟ-ରାଜ୍ୟ ମଧ୍ୟରେ ସାଂସ୍କୃତିକ ସମ୍ପର୍କକୁ ଯୋଡ଼ିବା ଲକ୍ଷ୍ୟରେ ନୂଆ ଯୋଜନା ‘ଏକ ଭାରତ, ଶ୍ରେଷ୍ଠ ଭାରତ’ ସମ୍ପର୍କରେ ଘୋଷଣା କରିଥିଲେ। ଏହି ଯୋଜନା ମାଧ୍ୟମରେ ଭାରତର ଶକ୍ତି ଓ ବିବିଧତାକୁ ଚିହ୍ନିବା ଓ ଦେଶକୁ ଶ୍ରେଷ୍ଠ ବନାଇବା ଆମର ଦାୟିତ୍ୱ ବୋଲି ମୋଦି କହିଥିଲେ। ଏହି ଅବସରରେ ରାଜପଥରେ ଏକ ବିରାଟ ଗଣଦୌଡ଼କୁ ପତାକା ଦେଖାଇ ଶୁଭାରମ୍ଭ କରିଥିଲେ ପ୍ରଧାନମନ୍ତ୍ରୀ । ଏହା ପୂର୍ବରୁ ଆଜି ସର୍ଦ୍ଦାର ପଟେଲଙ୍କ ସମାଧି ସ୍ଥଳରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ଉପ-ରାଷ୍ଟ୍ରପତି ହମିଦ ଅନସାରୀ, କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ ଓ ଉପାଧ୍ୟକ୍ଷ ରାହୁଲ ଗାନ୍ଧୀଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ଏହି ଜନନାୟକଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ।