ଆକ୍ରମଣ ଚେତାବନୀ, ମୁମ୍ୱାଇ ବିମାନବନ୍ଦରରେ କଡ଼ା ସୁରକ୍ଷା

ମୁମ୍ୱାଇ: ଆତଙ୍କବାଦୀ ଆକ୍ରମଣ ଧମକ ପରେ ମୁମ୍ୱାଇ ବିମାନ ବନ୍ଦରରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରି ଦିଆଯାଇଛି। ସୋମବାର ରାତିରେ ଜଣେ ବ୍ୟକ୍ତି ଏହି ସୂଚନା ଦେଇଥିଲେ। ଇଣ୍ଟରନେଟ୍ କଲ୍ ମାଧ୍ୟମରେ ଏହି ବ୍ୟକ୍ତି ଜଣଙ୍କ ବିମାନ ବନ୍ଦର କଂଟ୍ରୋଲ୍ ରୁମକୁ ଏହି ସୂଚନା ଦେଇଥିଲେ। ଉକ୍ତ ବ୍ୟକ୍ତି ଜଣଙ୍କ ନିଜକୁ ବିଶେଷ କୁମାର ବଲି ପରିଚୟ ଦେଇଥିଲେ। ସେ କହିଥିଲେ ଯେ ଉତ୍ତର ମୁମ୍ୱାଇର ଅନ୍ଧେରୀ ଅଂଚଳରେ ଦଳେ ଲୋକ ବିମାନବନ୍ଦର ଉପରେ ଆକ୍ରମଣ କରିବା ନେଇ ଯୋଜନ କରୁଛନ୍ତି। ମଙ୍ଗଳବାର ସକାଳ ୯ଟାରୁ ୧୦ଟା ମଧ୍ୟରେ ମୁମ୍ୱାଇ ଡୋମେଷ୍ଟିକ୍ ଏୟାରପୋର୍ଟ, ଅନ୍ତର୍ଜାତୀୟ ଏୟାରପୋର୍ଟ ସମେତ ତାଜ୍ ହୋଟେଲ୍ ନିକଟରେ ୫ଟି ଗାଡ଼ି ବିସ୍ଫୋରଣ କରିବାକୁ ସେମାନେ ଯୋଜନା କରିଛନ୍ତି। ୨୬/୧୧ ଆକ୍ରମଣଠାରୁ ବି ଏହା ବଡ଼ ଆକ୍ରମଣ ହୋଇପାରେ ବୋଲି କଲ୍ କରିଥିବା ବ୍ୟକ୍ତି ଜଣଙ୍କ କହିଥିଲେ। ତେବେ ପୋଲିସ୍ କହିଛି ଯେ ମଜାକରେ କେହି ଏଭଳି କରିଥାଇପାରେ। ଫୋନ୍ କରିଥିବା ବ୍ୟକ୍ତିଙ୍କୁ ଠାବ କରିବାକୁ ଉଦ୍ୟମ କରାଯାଉଛି। ତଥାପି ବିମାନବନ୍ଦର ପରିସରରେ ସୁରକ୍ଷା ବ୍ୟବସ୍ଥା ବଢ଼ାଇ ଦିଆଯାଇଛି।