ନୂଆଦିଲ୍ଲୀ: ନିର୍ବାଚନ ପୂର୍ବରୁ ବିଭିନ୍ନ ତଦନ୍ତକାରୀ ସଂସ୍ଥା ପକ୍ଷରୁ କରାଯାଉଥିବା ଚଢ଼ଉ ରାଜନୀତିକ ଦୃଷ୍ଟିକୋଣରୁ ନିରପେକ୍ଷ ହେବା ଦରକାର ଏବଂ ଏଭଳି କାର୍ଯ୍ୟାନୁଷ୍ଠାନ ପୂର୍ବରୁ ଅଧିକାରୀଙ୍କୁ ସୂଚନା ଦେବା ଜରୁରୀ ବୋଲି ନିର୍ବାଚନ କମିଶନ୍ କହିଛନ୍ତି। ମଧ୍ୟପ୍ରଦେଶରେ ଆୟକର ଚଢ଼ଉକୁ ନେଇ ବିବାଦ ପରେ ନିର୍ବାଚନ ନିୟନ୍ତ୍ରକ ବିଭିନ୍ନ ତଦନ୍ତକାରୀ ସଂସ୍ଥା ଏବଂ ପ୍ରବର୍ତ୍ତନ ନିର୍ଦ୍ଦେଶାଳୟକୁ ଏହି ନିର୍ଦ୍ଦେଶ ଦେଇଛନ୍ତି।
ଏକ ଚିଠିରେ ନିର୍ବାଚନ କମିଶନ କହିଛନ୍ତି, “ନିର୍ବାଚନ ସମୟରେ ସମସ୍ତ ଚଢ଼ଉ କାର୍ଯ୍ୟ, ଏପରିକି ନିର୍ବାଚନ ସମ୍ପର୍କିତ ଚଢ଼ଉ ନିରପେକ୍ଷ ଏବଂ ବିନା ପକ୍ଷପାତରେ ହେବା ଦରକାର। ଯଦି ନିର୍ବାଚନ ସମୟରେ କେହି ସନ୍ଦେହଜନକ ଭାବରେ ଅଧିକ ଅର୍ଥ ଠୁଳ କରିଥିବା ଅଭିଯୋଗ ହୁଏ, ତା ହେଲେ ନିର୍ବାଚନ ଆଚରଣ ବିଧି ଲାଗୁ ହୋଇଥିବା ଯାଏ ତଦନ୍ତକାରୀ ସଂସ୍ଥାମାନେ ନିର୍ବାଚନ କମିଶନଙ୍କୁ ଏହି ବିଷୟରେ ଜଣାଇବେ।”
କେନ୍ଦ୍ର ଅର୍ଥ ମନ୍ତ୍ରଣାଳୟର ଆୟକର ବିଭାଗର ପ୍ରଶାସନିକ ନିୟନ୍ତ୍ରଣରେ ଥିବା ତଦନ୍ତକାରୀ ସଂସ୍ଥାଙ୍କ ନାମ ବିଶେଷଭାବରେ ଏଥିରେ ଉଲ୍ଲେଖ କରାଯାଇଛି। ବିଭିନ୍ନ ରାଜ୍ୟ ବିଶେଷ କରି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ପୂର୍ବରୁ ଦାବି କରିଆସୁଥିଲେ ଯେ, କେନ୍ଦ୍ର ସରକାର ବିଭିନ୍ନ ସଂସ୍ଥାକୁ ନିଜ ସ୍ୱାର୍ଥରେ ବ୍ୟବହାର କରିଆସୁଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
