ନୂଆଦିଲ୍ଲୀ: ଭାରତ ରତ୍ନ ଅଟଳ ବିହାରୀ ବାଜପେୟୀଙ୍କ ୯୫ ତମ ଜୟନ୍ତୀ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅଟଳ ଭୂଜଳ ଯୋଜନାର ଶୁଭାରମ୍ଭ କରିଛନ୍ତି। ଏହି ଯୋଜନା ଜରିଆରେ ଭୂଜଳ ସଂରକ୍ଷଣ ଉପରେ ଗୁରୁତ୍ୱ ଦିଆଯିବା ସହିତ ପ୍ରତି ଘରେ ସ୍ୱଚ୍ଛ ପିଇବା ପାଣି ପହଞ୍ଚାଇବା ପାଇଁ ସରକାର ଲକ୍ଷ୍ୟ ରଖିଛନ୍ତି। ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବସିଥିବା ବୈଠକରେ ଏହି ନିଷ୍ପତ୍ତି ନିଆଯାଇଥିଲା।
ଏହି ଯୋଜନା ଜଳ ସଂକଟର ସମ୍ମୁଖୀନ ହେଉଥିବା ଉତ୍ତର ପ୍ରଦେଶ, ଗୁଜରାଟ, ହରିଆଣା, କର୍ଣ୍ଣାଟକ, ମଧ୍ୟ ପ୍ରଦେଶ, ରାଜସ୍ଥାନ ଏବଂ ମହାରାଷ୍ଟ୍ରରେ ଲାଗୁ ହେବ। ପାଣିରେ ପ୍ରଦୂଷଣର ମାତ୍ରା ସହିତ ଅନେତ ମାନକୁ ଆଧାର କରି ଏହି ରାଜ୍ୟରେ ଲାଗୁ କରିବା ପାଇଁ ସରକାର ନିଷ୍ପତ୍ତି ନେଇଛନ୍ତି।
ସରକାର କହିଛନ୍ତି, ଏହି ଯୋଜନା ଜରିଆରେ ଚାଷୀଙ୍କୁ ଚାଷ କାର୍ଯ୍ୟରେ ଏହି ଅଟଳ ଭୂଜଳ ଯୋଜନା ସହଯୋଗ କରିବ। ଚାଷୀଙ୍କ ଆୟକୁ ଦୁଇଗୁଣା କରିବାରେ ଏହି ଯୋଜନା ସହାୟକ ହେବ। ୭ଟି ରାଜ୍ୟର ୮,୩୫୦ଟି ଗାଁ ଅଟଳ ଭୂଜଳ ଯୋଜନା ଦ୍ୱାରା ଉପକୃତ ହେବେ। ୫ ବର୍ଷରେ ୬ ହଜାର କୋଟି ଟଙ୍କା ଏଥିପାଇଁ ଖର୍ଚ୍ଚ ହେବ। ମୋଟ ଟଙ୍କାର ୫୦ ପ୍ରତିଶତ ମୋଦି ସରକାର ବହନ କରିବେ ଏବଂ ବାକି ୫୦ ପ୍ରତିଶତ ଟଙ୍କା ବିଶ୍ୱ ବ୍ୟାଙ୍କ ଦେବ। ୧୨ ଡିସେମ୍ୱରରେ ବିଶ୍ୱ ବ୍ୟାଙ୍କ ଅଟଳ ଭୂଜଳ ଯୋଜନାକୁ ଅନୁମତି ଦେଇଛି।
ସେହିପରି ଗ୍ରାମ ପଞ୍ଚାୟତ ଗୁଡ଼ିକରେ ଜଳ ସୁରକ୍ଷା ଉପରେ ଗୁରୁତ୍ୱ ଦିଆଯିବ। ଭୂଜଳ ସୁରକ୍ଷା ପାଇଁ ଲୋକଙ୍କ ମଧ୍ୟରେ ସଚେତନତା କରିବା ପାଇଁ ଅନେକ କାର୍ଯ୍ୟକ୍ରମ ହାତକୁ ନିଆଯିବ ବୋଲି ସରକାର କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
