ଲକ୍ଷ୍ନୌ: ପାଠ୍ୟ ପୁସ୍ତକରେ ‘ଭଗବଦ୍ ଗୀତା’କୁ ସାମିଲ୍ କରାଯିବା ନେଇ ଏକ ପିଆଇଏଲକୁ ଖାରଜ କରି ଦେଇଛନ୍ତି ଆହ୍ଲାବାଦ ହାଇକୋର୍ଟ। ବୁଧବାର ଏହି ପିଆଇଏଲକୁ ଅସ୍ପଷ୍ଚ ଏବଂ ଭୁଲ୍ ବୋଲି ଦର୍ଶାଇଛନ୍ତି ହାଇକୋର୍ଟ। ବ୍ରହ୍ମା ଶଙ୍କର ଶାସ୍ତ୍ରୀ ନାମକ ବ୍ୟକ୍ତି ଏହି ପିଆଇଏଲ ବା ଜନସ୍ୱାର୍ଥ ମାମଲା ଦାୟର କରିଥିଲେ। ଯେଉଁଥିରେ ସମାଜର ସାମଗ୍ରିକ ଲାଭ ପାଇଁ ଭଗବଦ୍ ଗୀତାକୁ ସମସ୍ତ ପାଠ୍ୟ ଖସଡ଼ାରେ ସାମିଲ୍ କରିବାକୁ ସେ ଦାବି କରିଥିଲେ।
ଜଷ୍ଟିସ ପଙ୍କଜ ମିତ୍ତଲ ଏବଂ ଜଷ୍ଟିସ ସୌରଭ ଲାଭାନିଆଙ୍କୁ ନେଇ ଗଠିତ ଖଣ୍ଡପୀଠ ଏହି ଆବେଦନକୁ ଅସ୍ପଷ୍ଟ ବୋଲି କହିଛନ୍ତି। ବେଞ୍ଚ କହିଛନ୍ତି ଯେ ଆବେଦନକାରୀ ସଂପୃକ୍ତ ଶିକ୍ଷା ବୋର୍ଡ ସହ ଏ ବାବଦରେ ଆଲୋଚନା କରିବା ଦରକାର। ପାଠ୍ୟ ଖସଡ଼ାରେ କଣ ରହିବ ସେ ଅଧିକାର ବୋର୍ଡ ପାଖରେ ରହିଛି ବୋଲି ଖଣ୍ଡପୀଠ କହିଛନ୍ତି।
ପ୍ରାଥମିକ ଶିକ୍ଷା ପାଖରୁ ଆରମ୍ଭ କରି ଉଚ୍ଚଶିକ୍ଷା ଯାଏ ସମସ୍ତ ବିଷୟରେ ବିଦ୍ୟାର୍ଥୀ ମାନଙ୍କୁ ଭଗବଦ୍ ଗୀତା ଶିକ୍ଷା ଦିଆଯାଉ ବୋଲି ପିଆଇଏଲରେ ଦାବି ହୋଇଥିଲା।