ନୂଆଦିଲ୍ଲୀ: ମୋଦି ସରକାରଙ୍କ ଡିଜିଟାଲ ଇଣ୍ଡିଆ ଅଭିଯାନକୁ ଆଗକୁ ବଢ଼ାଇବା ପାଇଁ ସରକାର ଆଉ ଏକ ନିଷ୍ପତ୍ତି ନେଇଛନ୍ତି। ଦେଶର ଉତ୍ତର ପୂର୍ବରେ ୩୭୪ଟି ଗାଁରେ ମୋବାଇଲ୍ ନେଟଓ୍ୱର୍କ ନାହିଁ। ଏବେ ଏହି ସବୁ ସ୍ଥାନରେ ବ୍ରଡବ୍ରାଣ୍ଡ ଇଣ୍ଟରନେଟ୍ ଏବଂ 4ଜି ସେବା ଯୋଗାଇବା ପାଇଁ କେନ୍ଦ୍ର କ୍ୟାବିନେଟ ନିଷ୍ପତ୍ତି ନେଇଛି। ଏବାବାଦ୍ ଦେଶରେ ଇଣ୍ଟରନେଟର ଚାହିଦା ବଢ଼ୁଥିବା ଦେଖି ସାର୍ବଜନୀନ ଡାଟା କେନ୍ଦ୍ର ଖୋଲିବାକୁ ନିଷ୍ପତ୍ତି ନେଇଛି। ଆଉ ଏହି ଡାଟା ସେଣ୍ଟର ଖୋଲିବା ପାଇଁ କୌଣସି ଲାଇସେନ୍ସ ବା ଦେୟ ଦେବାକୁ ପଡ଼ିବନି। ବୁଧବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବସିଥିବା ବୈଠକରେ ଏହି ନିଷ୍ପତ୍ତି ନିଆଯାଇଛି।
କେନ୍ଦ୍ର ଆଇଟି ମନ୍ତ୍ରୀ ରବିଶଙ୍କର ପ୍ରସାଦ ଏହାପରେ କହିଛନ୍ତି ଦେଶରେ ଓ୍ୱାଇ ଫାଇ ନେଟଓ୍ୱର୍କ ଇଣ୍ଟରଫେସ୍ ତିଆରି ହେବ। ଏଥିପାଇଁ କ୍ୟାବିନେଟରେ ନିଷ୍ପତ୍ତି ନିଆଯାଇଛି। ଏହି ସାର୍ବଜନୀନ ୱାଇ-ଫାଇ ଆକସେସ୍ ନେଟୱାର୍କ ଇଣ୍ଟରଫେସକୁ PM-WANI ବୋଲି ମଧ୍ୟ କୁହାଯାଉଛି।
ଉତ୍ତର ପୂର୍ବ ଭାରତର ଅନେକ ସ୍ଥାନରେ ନେଟଓ୍ୱର୍କ ନାହିଁ। ତେଣୁ ଏହି ସବୁ ସ୍ଥାନରେ ବ୍ରଡବ୍ୟାଣ୍ଡ ସଂଯୋଗ ଏବଂ ଅରୁଣାଚଳ ପ୍ରଦେଶରେ 4G ସେବା ଯୋଗାଇବା ପାଇଁ କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି। ଲାକ୍ଷ୍ମଦ୍ୱୀପ ଏଗାରଟି ଦ୍ୱୀପପୁଞ୍ଜରେ ହାଇ ସ୍ପିଡ୍ ବ୍ରଡବ୍ୟାଣ୍ଡ ସେବା ଯୋଗାଇବା ପାଇଁ ସମୁଦ୍ରରେ ଅପ୍ଟିକାଲ୍ ଫାଇବର କ୍ୟାବଲିଂ ସ୍ଥାପନ ପାଇଁ କେନ୍ଦ୍ର କ୍ୟାବିନେଟ୍ ଅନୁମୋଦନ ଦେଇଛି। ସୂଚନା ଓ ପ୍ରସାରଣ ମନ୍ତ୍ରୀ ପ୍ରକାଶ ଜାଭଡେକର ଏହି ସୂଚନା ଦେଇଛନ୍ତି। ଏହି ଫାଇବର କେବୁଲ ଆଣ୍ଡାମାନ ଏବଂ ନିକୋବର ଦ୍ୱୀପପୁଞ୍ଜକୁ ସଂଯୋଗ କରିବା ପାଇଁ ରଖାଯାଇଛି।
ଆଇଟି ମନ୍ତ୍ରୀ ରବି ଶଙ୍କର ପ୍ରସାଦ କହିଛନ୍ତି ଯେ କୋଚି ଏବଂ ଲାକ୍ଷାଦ୍ୱୀପ ଦ୍ୱୀପପୁଞ୍ଜ ମଧ୍ୟରେ ଅପ୍ଟିକାଲ ଫାଇବର କେବୁଲ ସଂଯୋଗ ହେବ। ଏଥିସହିତ ଉତ୍ତର-ପୂର୍ବ ଅଞ୍ଚଳର ଟେଲିକମ୍ ସେବାକୁ ବଢ଼ାଇବା ପାଇଁ କ୍ୟାବିନେଟ ଅନୁମତି ଦେଇଛି। ଅରୁଣାଚଳ ପ୍ରଦେଶ ଏବଂ ଆସାମର ଦୁଇଟି ଜିଲ୍ଲାରେ ମୋବାଇଲ୍ କଭରେଜ୍ ଯୋଗାଇବା ପାଇଁ କ୍ୟାବିନେଟ୍ USOF ଯୋଜନାକୁ ଅନୁମୋଦନ ଦେଇଛି। ୨୩୭୪ଟି ଗାଁରେ ମୋବାଇଲ୍ କଭରେଜ୍ ଯୋଗାଇବା ପାଇଁ ଟେଲିକମ୍ ବିକାଶ ଯୋଜନା ଆରମ୍ଭ କରାଯାଇଛି ବୋଲି ସରକାର ନିଷ୍ପତ୍ତି ନେଇଛନ୍ତି।
ଏହି ପ୍ରକଳ୍ପର କାର୍ଯ୍ୟକାରିତା ପାଇଁ ପାଞ୍ଚ ବର୍ଷରେ ୧୦୭୨ କୋଟି ଟଙ୍କା ଖର୍ଚ୍ଚ ହେବ। ଏହି ପ୍ରକଳ୍ପକୁ ୟୁନିଭର୍ସିଆଲ ସର୍ଭିସ ବାଧ୍ୟତାମୂଳକ ପାଣ୍ଠିରୁ ଅର୍ଥ ପ୍ରଦାନ କରାଯିବ। ଏହି ପ୍ରକଳ୍ପ ନାଗରିକମାନଙ୍କୁ ସେମାନଙ୍କ ଘରେ ଇ-ସୁଶାସନ ସେବା ଯୋଗାଇବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ।