ରାଞ୍ଚି: ଝାଡ଼ଖଣ୍ଡର ଗୋଡ୍ଡା ଜିଲ୍ଲା ଅନ୍ତର୍ଗତ ଲାଲମାଟିଆରେ ଇଷ୍ଟର୍ଣ୍ଣ କୋଲ୍ଫିଲ୍ଡ ଲିମିଟେଡ୍ ଦ୍ୱାରା ପରିଚାଳିତ ଏକ କୋଇଲା ଖଣି ଗତକାଲି ରାତିରେ ଧସି ଯିବାରୁ ୫୦ରୁ ଅଧିକ ଶ୍ରମିକ ଏହା ତଳେ ଫସି ରହିଥିବା କୁହାଯାଉଛି। ୫ ଜଣଙ୍କ ମୃତଦେହ ଉଦ୍ଧାର କରାଯାଇଛି।
ଶ୍ରମିକଙ୍କ ସହ ବହୁତ ଗାଡ଼ି ଓ ମେସିନ୍ ମଧ୍ୟ ଧସି ଯାଇଥିବା ଖଣି ତଳେ ପୋତି ହୋଇଯାଇଛି। ଆହତ ଅବସ୍ଥାରେ ଉଦ୍ଧାର ହୋଇଥିବା ଶ୍ରମିକମାନଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି।
ସିଫ୍ଟ ବଦଳ ବେଳେ ଏ ଘଟଣା ଘଟିଥିବା କୁହାଯାଉଛି। ଉଦ୍ଧାର କାର୍ଯ୍ୟରେ ସ୍ଥାନୀୟ ପୋଲିସ୍ ଓ ଅଗ୍ନିଶମ ବାହିନୀ ନିୟୋଜିତ ହୋଇଛନ୍ତି। ଏନ୍ଡିଆର୍ଏଫ୍ ଟିମ୍କୁ ବି ଏହି କାର୍ଯ୍ୟରେ ନିୟୋଜିତ କରାଯାଇଛି। ଉଦ୍ଧାର ଓ ରିଲିଫ୍ କାର୍ଯ୍ୟକୁ ତ୍ୱରାନ୍ୱିତ କରିବା ଲାଗି ଝାଡ଼ଖଣ୍ଡ ମୁଖ୍ୟମନ୍ତ୍ରୀ ରଘୁବର ଦାସ ନିର୍ଦ୍ଦେଶ ଦେଇଛନ୍ତି।