ନୂଆଦିଲ୍ଲୀ: ଦେଶର ରାଜଧାନୀ ଦିଲ୍ଲୀ ସବୁଠୁ ଥଣ୍ଡା ସହର ପାଲଟିଛି। ଆଜି ସକାଳ ୮ଟା ୩୦ ସୁଦ୍ଧା ଲୋଧୀ ରୋଡର ତାପମାତ୍ରା ୧.୭ ଡିଗ୍ରୀ ସେଲସିୟସ ରେକର୍ଡ କରିଛି ଭାରତୀୟ ପାଣିପାଗ ବିଭାଗ । ସେହିପରି ସଫଦରଜଙ୍ଗ ଏବଂ ପାଲାମରେ ତାପମାତ୍ରା ୪.୨ ଡିଗ୍ରୀ ସେଲସିୟମ ରେକର୍ଡ କରାଯାଇଛି। ୧୯୦୧ ପରେ ଦିଲ୍ଲୀ-ଏନସିଆରର ତାପମାତ୍ରା ସବୁଠୁ କମ୍ ରହିଛି ବୋଲି ପାଣିପାଗ ବିଭାଗ କହିଛି।
ଶୁକ୍ରବାର ଦିଲ୍ଲୀ ସଫଦରଜଙ୍ଗରେ ତାପମାତ୍ରା ୨.୪ ଡିଗ୍ରୀ, ପାଲାମରେ ୩.୧ ଡିଗ୍ରୀ ସେଲସିୟସ ଏବଂ ଆୟାନ ନଗରର ତାପମାତ୍ରା ୧.୯ ଡିଗ୍ରୀ ରହିଥିଲା ବୋଲି ଆଇଏମଡି କହିଛି।
ପାଣିପାଗ ବିଭାଗର ରିପୋର୍ଟ ଅନୁଯାୟୀ ୩୦ ଡିସେମ୍ୱର, ୨୦୧୩ରେ ଦିଲ୍ଲୀ ସଫଦରଡଙ୍ଗର ତାପମାତ୍ରା ୨.୪ ଡିଗ୍ରୀ ସେଲସିୟସ ରହିଥିବାବେଳେ ଡିସେମ୍ୱର ୧୧, ୧୯୯୬ରେ ଏହିଠାରେ ତାପମାତ୍ରା ୨.୩ ଡିଗ୍ରୀ ସେଲସିୟସ ରହିଥିଲା।
ଚଳିତ ଡିସେମ୍ବରରେ ଗତ ୧୪ ଦିନ ଧରି ଦିଲ୍ଲୀରେ ହାଡ଼ଭଙ୍ଗା ଶୀତ ଅନୁଭୂତ ହୋଇଛି। ଆହୁରି ୩ ଦିନ ଏଭଳି ଥଣ୍ଡା ରହିବ ବୋଲି ଜଣାପଡ଼ିଛି। ତେବେ ବର୍ଷର ଶେଷ ରାତି ନହେଲେ ନୂଆବର୍ଷର ପ୍ରଥମ ଦିନରେ ପ୍ରବଳ ଥଣ୍ଡା ହେବ ବୋଲି ଜଣାପଡ଼ିଛି। ଏହା ପୂର୍ବରୁ ୧୯୯୭ରେ ଡିସେମ୍ୱରରେ ଲଗାତର ୧୩ ଦିନ ଧରି ଜାଡ଼ ଅନୁଭୂତ ହୋଇଥିଲା।
ଅନ୍ୟପଟେ ଦିଲ୍ଲୀରେ ପ୍ରଦୂଷଣ ସ୍ତର ବଢ଼ିଛି ବୋଲି ଜଣାପଡ଼ିଛି। ଆଜି ବାୟୁମଣ୍ଡଳର ପ୍ରଦୂଷଣ ସ୍ତର ଗମ୍ଭୀର ହେବ ବୋଲି ଅନୁମାନ କରାଯାଉଛି। ଡିସେମ୍ୱର ୩୦ ଯାଏ ପ୍ରଦୂଷଣ ସ୍ତର ଗମ୍ଭୀର ରହିବ ବୋଲି ଜଣାପଡ଼ିଛି। ୩୧ ଡିସେମ୍ୱର ପବନ ବୋହିବ ବୋଲି ପାଣିପାଗ ବିଭାଗ ଅନୁମାନ କରିଛି। ତେଣୁ ପ୍ରଦୂଷଣର ସ୍ତର କମିପାରେ। ସିପିସିବି ବାୟୁର ଗୁଣବତ୍ତାକୁ ନେଇ ଏକ ବୁଲେଟିନ ଜାରି କରିଛି। ଯେଉଁଥିରେ ଦିଲ୍ଲୀର ଏକ୍ୟୁଆଇ ୩୭୩, ଫରିଦାବାଦର ୩୯୨, ଗାଜିଆବାଦର ୩୮୪, ଗ୍ରେଟର ନୋଏଡାର ୩୮୨ ଏବଂ ଗୁରୁଗ୍ରାମରେ ବାୟୁର ଗୁଣବତ୍ତା ୨୯୨ ରହିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
