କାଏରୋ: ଇଜିପ୍ଟ ସେନା ଭୁଲରେ ୧୨ ଜଣ ପର୍ଯ୍ୟଟକଙ୍କୁ ମାରି ଦେଇଛି। ଆତଙ୍କବାଦୀ ମନେ କରି ଇଜିପ୍ଟ ସେନା ସେମାନଙ୍କୁ ହତ୍ୟା କରିଛି। ଏକ ଆତଙ୍କବା ବିରୋଧୀ ଅପରେସନ୍ ବେଳେ ଏହି ଅଭାବନୀୟ ଘଟଣା ଘଟି ଯାଇଛି। ଇଜିପ୍ଟର ଆଭ୍ୟନ୍ତରୀଣ ମନ୍ତ୍ରଣାଳୟ ପକ୍ଷରୁ ଆଜି ଏହି ସୂଚନା ଦିଆଯାଇଛି। ଘଟଣାର ତଦନ୍ତ ପାଇଁ ଏକ କମିଟି ଗଠନ କରାଯାଇଥିବା ନେଇ ମଧ୍ୟ ସରକାରଙ୍କ ପକ୍ଷରୁ ସୂଚନା ଦିଆଯାଇଛି।
ମନ୍ତ୍ରଣାଳୟ ପକ୍ଷରୁ କୁହାଯାଇଛି, ୨୨ ଜଣ ପର୍ଯ୍ୟଟକ ଚାରୋଟି ଗାଡ଼ିରେ ୱେଷ୍ଟର୍ଣ୍ଣ ଡିର୍ଜଟର ୱାହାଟର ନିଷେଦ୍ଧାଞ୍ଚଳରେ ବୁଲୁ ଥିବା ବେଳେ ସେନାର ଯବାନମାନେ ସେମାନଙ୍କ ଉପରକୁ ଗୁଳି କରିଥିଲେ। ସେମାନଙ୍କ ମଧ୍ୟରୁ ୧୨ ଜଣଙ୍କ ମୃତ୍ୟୁ ଘଟିଥିବା ବେଳେ ୧୦ ଜଣ ଆହତ ହୋଇଛନ୍ତି। ମୃତ ଓ ଆହତଙ୍କ ମଧ୍ୟରେ ମେକ୍ସିକୋର ମଧ୍ୟ କିଛି ପର୍ଯ୍ୟଟକ ରହିଛନ୍ତି। ସ୍ଥାନୀୟ ଏକ ହସପିଟାଲରେ ଆହତମାନଙ୍କର ଚିକିତ୍ସା ଚାଲିଛି।
ମେକ୍ସିକୋ ରାଷ୍ଟ୍ରପତି ଓ ବୈଦେଶିକ ମନ୍ତ୍ରୀ ଏହି ଘଟଣାକୁ ତୀବ୍ର ନିନ୍ଦା କରିଛନ୍ତି। ମେକ୍ସିକୋ ବୈଦେଶିକ ମନ୍ତ୍ରୀ କହିଛନ୍ତି ଯେ ଏହି ଘଟଣାରେ ତାଙ୍କ ଦେଶର ଦୁଇ ଜଣ ନାଗରିକ ପ୍ରାଣ ହରାଇଛନ୍ତି।