ହିମାଚଳ ପ୍ରଦେଶ ମୁଖ୍ୟମନ୍ତ୍ରୀ ବୀରଭଦ୍ର ସିଂହଙ୍କ ଗିରଫଦାରୀ ଉପରେ ରହିତାଦେଶକୁ ସୁପ୍ରିମକୋର୍ଟରେ ଚାଲେଞ୍ଜ କଲା ସିବିଆଇ

ନୂଆଦିଲ୍ଲୀ: ଦୁର୍ନୀତି ମାମଲାକୁ ନେଇ ହିମାଚଳ ପ୍ରଦେଶ ମୁଖ୍ୟମନ୍ତ୍ରୀ ବୀରଭଦ୍ର ସିଂହଙ୍କ ଗିରଫଦାରୀ ଉପରେ ରହିତାଦେଶକୁ ଚାଲେଞ୍ଜ କରି ସିବିଆଇ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଛି। ମୁଖ୍ୟ ବିଚାରପତି ଜଷ୍ଟିସ୍ ଏଚ୍.ଏଲ୍. ଦତ୍ତୁ ଓ ଜଷ୍ଟିସ୍ ଅରୁଣ ମିଶ୍ରଙ୍କୁ ନେଇ ଗଠିତ ବେଞ୍ଚ ମାମଲାକୁ ବିଚାର ଲାଗି ଗ୍ରହଣ କରିଛନ୍ତି। ବୀରଭଦ୍ରଙ୍କୁ ଗିରଫ କିମ୍ୱା ଜେରା ନ କରିବା ପାଇଁ ହିମାଚଳ ପ୍ରଦେଶ ହାଇକୋର୍ଟ ନିର୍ଦ୍ଦେଶ ଦେଇଥିବାରୁ ତାଙ୍କ ବିରୋଧରେ ଥିବା ଦୁର୍ନୀତି ମାମଲାର ତଦନ୍ତ ଠପ୍ ହୋଇଯାଇଥିବା ସିବିଆଇ କୋର୍ଟଙ୍କୁ ଜଣାଇଥିଲା। ଜଣେ ଅଭିଯୁକ୍ତଙ୍କୁ ଆଇନର ସୁରକ୍ଷା ମିଳିଲେ ମାମଲାର ତଦନ୍ତ କିପରି ହେବ ବୋଲି ସିବିଆଇ ପ୍ରଶ୍ନ ଉଠାଇଥିଲା। ଆସନ୍ତା ୨୬ ତାରିଖରେ ମାମଲାର ପରବର୍ତ୍ତୀ ଶୁଣାଣି ହେବ।