ନୂଆଦିଲ୍ଲୀ: ଦୁଇଟି ଦୁଷ୍କର୍ମ ମାମଲାରେ ଜେଲରେ ସଜ୍ଜା କାଟୁଥିବା ଡେରା ସଚ୍ଚା ସୌଦାର ମୁଖ୍ୟ ଗୁରୁମିତ୍ ରାମ ରହିମଙ୍କ ଧରମ ଝିଅ ହନିପ୍ରୀତ ନିଖୋଜ ଅଛନ୍ତି। ତାଙ୍କୁ ଖୋଜିଖୋଜି ପୋଲିସ୍ ନାକେଦମ ହେଲାଣି। ହେଲେ ଏକ ସିସିଟିଭି ଫୁଟେଜ୍ରୁ ହନିପ୍ରୀତ ଦିଲ୍ଲୀରେ ଥିବା ଦାବି କରାଯାଉଛି। ଭିଡିଓଟି ଗ୍ରେଟର କୈଳାସରୁ ମିଳିଛି। ଏଥିରେ ହନିପ୍ରୀତ ଏକ କଳା ରଙ୍ଗର ଡ୍ରେସ୍ ପିନ୍ଧି ଜଣେ ଓକିଲଙ୍କ ଘରକୁ ଯାଉଥିବା ଦେଖିବାକୁ ମିଳୁଛି। ଏହି ଭିଡିଓ ଫୁଟେଜ ଆସିବା ପରେ ପୋଲିସ୍ ଯାଞ୍ଚ ଆରମ୍ଭ କରିଦେଇଛି।
ଆଜି ଭୋରୁ ପୋଲିସ ଗ୍ରେଟର କୈଳାସ ଓ ସ୍ଥାନୀୟ ପାର୍କରେ ଚଢାଉ କରିଥିଲା। ଏହାସହ ସକାଳ ପ୍ରାୟ ସାଢେ ୭ଟାରେ ସେଠାରେ ଥିବା ଡେରା ଆଶ୍ରମରେ ମଧ୍ୟ ଚଢାଉ କରାଯାଥିଲା।
ସୂଚନାଯୋଗ୍ୟ, ହନିପ୍ରୀତ ଦିଲ୍ଲୀରେ ଥିବା ଗତକାଲିଠାରୁ ତାଙ୍କ ଓକିଲ ପ୍ରଦୀପ ଆର୍ଯ୍ୟ କହି ସାରିଛନ୍ତି। ସେ କହିଛନ୍ତି- “ହନିପ୍ରିତ ଦିଲ୍ଲୀରେ ଅଛନ୍ତି। ଲଜପଥ ନଗରରେ ଥିବା ତାଙ୍କ ଅଫିସ୍କୁ ଆସି ହନିପ୍ରୀତ ମୋ ସହ ଦେଖା କରିଛନ୍ତି। ଏହାସହ ଆଗୁଆ ଜାମିନ ଆବେଦନ ପାଇଁ କାଗଜପତ୍ରରେ ଦସ୍ତଖତ ମଧ୍ୟ କରିଛନ୍ତି।”